AZƏRBAYCAN ÇEMPİONATI ƏRƏFƏSİNDƏ

01.11.2004 [19:34]
Çap et
A⁺ A^-

Respublika Olimpiya İdman liseyində idman gimnastikası üzrə Bakı çempionatı başa çatmışdır. Azərbaycan Gimnastika Federasiyasının mətbuat xidmətindən AZƏRTAC-ın müxbirinə bildirmişlər ki, yarışlarda 54 idmançı mübarizə aparmışdır. Birinciliyin bütün qalibləri çoxnövçülüyün nəticələrinə görə müəyyən edilmişlər.

İdman ustaları arasında liseyin nümayəndəsi Nizami Abbasov, ustalığa namizədlər arasında isə Şakir Şıxəliyev birinci yeri tutmuşlar.

Yaşlı birinci dərəcəli idmançıların yarışında Ruslan Balakişiyev qalib gəlmişdir. İkinci dərəcəli idmançılar arasında Faiq Ağayev, üçüncü dərəcəli idmançıların yarışında isə Davud İsmayılov birinci olmuşlar. Hər üçü liseyin nümayəndəsidir.

Yeniyetmələr arasında üçüncü dərəcəli idmançıların yarışında gimnastika məktəbinin yetirməsi Sərtan Taşqın, ikinci dərəcəlilər arasında Kənan Daşdəmirov, birinci dərəcəlilər arasında isə Şamil İsmayılov (hər ikisi liseyin yetirməsidir) birinci yeri tutmuşlar.

Bu il gimnastlar üçün sonuncu yarış noyabrın 18-20-də keçiriləcək Azərbaycan çempionatı olacaqdır.