Bakı, 12 avqust (AZƏRTAC). Polşanın Spala şəhərində sərbəst güləş üzrə Vaçlav Zialkovskinin xatirəsinə həsr olunmuş 22-ci beynəlxalq turnir keçirilmişdir.

Azərbaycan Güləş Federasiyasından AZƏRTAC-a bildirmişlər ki, böyük məşqçi Firdovsi Umudov və məşqçi David Kurtsiyanın rəhbərliyi altında turnirdə iştirak edən sərbəst güləşçilərdən ibarət komandamız üç qızıl, bir gümüş və bir bürünc medal qazanmışlar.

Yığmamız 64 xalla komanda hesabında turniri ilk sırada tamamlamışdır, Rusiya yığması 41 xalla ikinci, Belarus komandası isə 34 xalla üçüncü olmuşdur.

Təmsilçimiz Ağahüseyn Mustafayev (66 kq) ardıcıl olaraq moldovalı Mixail Sava, rusiyalı İlyas Bekbulatov, türk Mustafa Kaya, italiyalı Markuez Frank və finalda ukraynalı Andrey Kviatovskini məğlub edərək, turnirin qızıl medalına sahib olmuşdur.

Aleksandr Qostiyev (84 kq) də qarşılaşdığı bütün rəqiblərindən üstün olmuşdur. O, ardıcıl olaraq türkiyəli Ahmet Bilici, almaniyalı Martin Obst, amerikalı Kris Perri və digər təmsilçimiz Məhəmmədhacı Xatiyevi məğlub etmişdir. Finalda isə Türkiyə təmsilçisi Serdar Bökeni üzərində qələbə qazanan A.Qostiyev fəxri kürsünün ən yüksək pilləsinə qalxmışdır.

Digər təmsilçimiz Cəmaləddin Məhəmmədov (120 kq) ardıcıl olaraq Çulvunbat Jarqalsayxanı (Monqolustan), Lyuben İlievi (Bolqariya), Johannes Kesselini (Almaniya), ABŞ təmsilçisi Tervel Dlagnevi (ABŞ) və Aleksey Nikolayevi (Belarus) məğlub edərək qızıl medal qazanmışdır.

Əşrəf Əliyev (74 kq) qazax təmsilçisi Dastan Balabekovu, həmyerlisi Cəbrayıl Həsənovu və Emin Əzizovu, Fransa idmançısı Luca Lampisni məğlub etmişdir. Lakin finalda bolqar idmançısı Kiril Terziyevə uduzan Ə.Əliyev gümüş medalla kifayətlənmişdir.

74 kq çəki dərəcəsində digər təmsilçimiz Cəbrayıl Həsənov isə bürünc medalın sahibi olmuşdur.

Digər təmsilçilərimiz Mircəlal Həsənzadə (55 kq) və Məhəmmədhacı Xatiyev turniri beşinci sırada tamamlamışlar.

Qeyd edək ki, görüşlərin idarə edilməsində beynəlxalq dərəcəli hakim Vaqif Zeynalov iştirak etmişdir.