Ali qonağı universitetdə mehribanlıqla, gül-çiçəklə qarşıladılar.

Universitetin akt salonunda keçirilən görüşü AİU-nun rektor əvəzi, professor Telman Hüseynov açaraq, ali qonağı və onu müşayiət edən nümayəndə heyətinin üzvlərini çoxsaylı professor-müəllim və tələbə heyəti adından salamladı. O bildirdi ki, Azərbaycan Dövlət İqtisad Universiteti 74 ildir fəaliyyət göstərir. Hazırda bu ali təhsil müəssisəsinin 12 fakültəsində 15 minə yaxın tələbə bazar iqtisadiyyatının tələblərinə uyğun olan 50 ixtisas üzrə təhsil alır. Onlara 58 kafedrada 800-dən çox müəllim dərs deyir ki, bunlardan 59-u professor, 52-si elmlər doktoru, 395-i isə elmlər namizədi və dosentdir.

T.Hüseynov üniversitetin zəngin maddi-texniki bazasından, tədrisin və elmi araşdırmaların beynəlxalq standartlara uyğun aparılmasından danışdı, dünyada gedən qlobal iqtisadi proseslərlə daha yaxından tanış olmaq və tədrisin səviyyəsini beynəlxalq standartlara uyğunlaşdırmaq məqsədi ilə 500-dən çox kömpüterin lokal şəbəkədə birləşdirilərək fasiləsiz olaraq İnternet sisteminə qoşulduğunu, qısa müddət ərzində dünyanın bir sıra tanınmış ali təhsil mərkəzləri ilə sıx əlaqələr qurulduğunu söylədi. O dedi ki, hazırda Yunanıstanda oxuyan 6 nəfər azərbaycanlıdan biri AİU-nun tələbəsidir və Afina Universitetinin doktoranturasında təhsil alır.

Universitetin rektor əvəzi Yunanıstan Prezidentinə müraciətlə dedi ki, bu bina bizim üçün, bütün Azərbaycan xalqı üçün çox əzizdir. Çünki ulu öndərimiz Heydər Əlirza oğlu Əliyev vaxtilə məhz bu binada təhsil almışdır. Siz bura təşrif buyuran ikinçi, prezidentsiniz. İki il bundan öncə, məhz iyun ayında, universitetimizin 70 illik yubileyində Azərbaycan xalqının ümummilli lideri cənab Heydər Əliyev bizim görüşümüzə gəlmişdi. O, universitetin professor-müəllim heyəti qarşısında çox geniş məzmunlu nitq söylədi. Üstündən iki il keçməsinə baxmayaraq, biz indi də həmin nitqin təsiri altındayıq. Sizdən əvvəl heç bir əcnəbi ölkə prezidenti bizim qonağımız olmamışdır. Buraya təşrif gətirən ilk xarici ölkə prezidenti kimi Sizin adınız bizim universitetin tarixinə düşəcəkdir.

Yunanıstan Prezidenti KONSTANTİNOS STEFANOPULOS çıxış edərək dedi ki, mənim üçün çox böyük şərəf və sevincdir ki, bu universitetdəyəm. Biz iqtisadi sahədən başlayaraq, bütün sektorlarda əlaqələrimizi inkişaf etdirəcəyik. Mən verilən məlumatları çox diqqətlə dinlədim. Ümidvaram ki, Azərbaycan İqtisad Universiteti ilə Yunanıstanın universitetləri arasında münasibətlər inkişaf edəcəkdir. Tələbə mübadiləsi əməkdaşlığımızın bir hissəsi olacaqdır. Əminəm ki, bu işdən hər iki tərəf faydalanacaq və bu da əməkdaşlığımıza daha da təkan verəcəkdir.Ali qonaq qloballaşmadan danışaraq bildirdi ki, heç kəs qloballaşmanın dəqiq mənasını bilmir. Lakin onun elmi cəhətdən bir mənası var. Qloballaşma dinlərin birləşməsi deyil, insanların birgə inamı deyil, sülhə nail olmaq üçün dövlətlərin razılaşması da deyildir. Belə görünür ki, qloballaşma maliyyə sektoruna aiddir. Bu, dünyada gedən proseslərdə çox böyük əhəmiyyət kəsb edir. Qloballaşmanın iqtisadi mənası o deməkdir ki, bu, üstünlük təşkil edən ümumi azad bazardır. Yəni bütün sahələrdə azadlıq başa düşülməlidir. Bu, təkcə iş adamlarına, biznesmenlərə deyil, bütün insanlara səmərə gətirir. Hökumətlərin bu sahədə çox vacib rolu var. Yəni onlar elə bir siyasət aparmalıdır ki, deyilən dəyərlər insanlar arasında bərabər bölüşdürülsün. Burada iş adamlarının fəaliyyəti vacibdir. Lakin onların da fəaliyyəti vergi siyasətinin düzgün qurulmasından sonra həyata keçirilə bilər.

Cənab Konstantinos Stefanopulos görüşə toplaşanların professorlar və iqtisadiyyat sahəsində fəaliyyət göstərən insanlar olduğunu vurğulayaraq dedi ki, burada yunan iş adamlarını da görürəm və çox şadam. Təşəkkür edirəm ki, onlar bizim nümayəndə heyətinə qoşulub buraya gəlmişlər. Azərbaycanın da iş adamları buradadırlar. Bakıya gələn iş adamlarından ibarət nümayəndə heyəti mənim Prezident olduğum dövrdə xaricə səfər edən ən böyük heyətdir. Bizim iş adamlarımız bir çox şirkətlərdən gəlmişlər. Onların arasında neft, təbii qaz şirkətlərinin nümayəndələri vardır. Özəl sektordan olan iş adamları öz həmkarları ilə əməkdaşlıq etmək üçün buraya gəliblər və bu səfəri o zaman uğurlu hesab edərik ki, iqtisadi sahədə uğur qazanılsın. Xoşbəxtlikdən, bizim xalqlarımız və iş adamlarımız arasında heç bir ziddiyyət yoxdur. Ona görə də yeganə iş onların özlərinin əməkdaşlıq etməsidir.

Yunanıstan Prezidenti Bakıda keçirilən görüşlərin uğurlu olduğunu, qurulan əməkdaşlığın iki dövlətin və xalqın mənafeyinə xidmət etdiyini, yunan iş adamlarının yaxşı təcrübəsinin olduğunu vurğuladı.

Ali qonaq dedi ki, Azərbaycan çox sürətlə inkişaf edən bir ölkədir. Azərbaycanın təbii sərvətləri təkcə neft və qazla məhdudlaşmır. Azərbaycanın əsas sərvəti onun savadlı, ağıllı insanlarıdır ki, onlar qarşıya qoyduqları məqsədə çatmaq üçün çalışır və buna nail olurlar. Mən Azərbaycanla tanış olduğum müddətdə görürəm ki, bizim mentalitetimiz bir-birindən çox da fərqlənmir. Ümid edirəm ki, əlaqələrimiz gələcəkdə də inkişaf edəcək və xalqlarımıza, dövlətlərimizə fayda gətirəcəkdir. Biz bu səfər çərçivəsində Azərbaycanla Yunanıstan arasında iqtisadi əməkdaşlığın əsasını qoyduq. Əminəm ki, bunun üzərində biz böyük bir bina tikəcəyik. Bu əməkdaşlıq təkcə iki xalqa səmərə gətirməyəcək, qonşuluğumuzda olan ölkələr də bundan faydalanacaqlar.

Sonda Yunanıstan Prezidenti Konstantinos Stefanopulos bu görüşə görə universitetin rəhbərliyinə, iştirakçıların hamısına təşəkkür etdi və dedi ki, mən Azərbaycan Prezidenti cənab İlham Əliyevə dərin minnətdarlığımı bildirirəm. Çünki məhz onun siyasəti nəticəsində Azərbaycanda Yunanıstana qarşı səmimi və xoş hisslər var. Azərbaycana tərəqqi, İqtisad Universitetinə, bütün Azərbaycan xalqına uğurlar diləyirəm.

X X X

Azərbaycanın iqtisadi inkişaf naziri Fərhad Əliyev və Yunanıstanın xarici işlər nazirinin müavini Yevripidis Stilianidis çıxışlarında ölkələrimiz arasında iqtisadi münasibətlərin yaranması və inkişaf etdirilməsi üçün hər iki ölkənin prezidentlərinin fəaliyyətini yüksək qiymətləndirdilər. Bildirildi ki, Bakıda keçirilən biznes forumda 100-ə yaxın yunan və 200-dək azərbaycanlı iş adamı iştirak etmiş və bu tədbirin nəticəsi olaraq, qeyri-neft sektorunu əhatə edən 7 memorandum imzalanmışdır və daha 3-4 sənəd də imzalanacaqdır.

Bunun çox yaxşı göstərici olduğunu və Azərbaycanla Yunanıstan arasında əməkdaşlığın yeni mərhələyə çıxması xüsusi vurğulandı. Ulu öndərimiz Heydər Əliyevin “Bizim dinimiz islamdır, yolumuz isə Qərbədir” müdrik kəlamı xatırladılaraq, bu yığcam fikirdə Azərbaycanın gələcək yolu aydın şəkildə göstərilmişdir. Bu gün Prezident İlham Əliyev həmin siyasəti davam etdirir. Azərbaycanda neft sektoru inkişaf etdikcə, qeyri-neft sektoru da inkişaf edir. Növbəti beş ildə ölkədə 600 min yeni iş yerinin yaradılması nəzərdə tutulmuşdur. Xalqın rifahını daha da yaxşılaşdırmaq, onlar üçün daha yaxşı şərait yaratmaq qarşıda duran əsas vəzifələrdir.

Görüşdə Prezident Administrasiyasının şöbə müdiri Fatma Abdullazadə, təhsil naziri Misir Mərdanov, Yunanıstanın Bakıdakı səfiri Merkurios Karafotias iştirak edirdilər.