Moskva, 29 mart (AZƏRTAC). Martın 29-da Sankt-Peterburqdakı Tavriya sarayında MDB-yə üzv olan dövlətlərin Gənclər Parlamentlərarası Assambleyasının (MDB GPA) ilk iclası olmuşdur. GPA MDB-yə üzv olan dövlətlərin Parlamentlərarası Assambleyasının yeni, daimi fəaliyyət göstərən məsləhət orqanıdır. 

Xatırladırıq ki, 2012-ci il noyabrın 22-də MDB dövlətlərinin Parlamentlərarası Assambleyası Şurasının iclasında Gənclər Parlamentlərarası Assambleyasının yaradılması haqqında qərar qəbul olunmuşdur. MDB Parlamentlərarası Assambleyasının bu yeni orqanı gənc parlament üzvlərini və gənclər hərəkatlarının liderlərini Birliyin dövlətləri arasında əməkdaşlığın inkişafı prosesinə cəlb etmək məqsədilə yaradılmışdır.

MDB GPA qanun yaradıcılığı fəaliyyətində və Birlik ölkələri gənclərinin hüquqlarına və qanuni mənafelərinə dair qərarlar qəbul edilməsində MDB-nin Parlamentlərarası Assambleyasına kömək göstərəcək, MDB-nin dövlət və dövlətlərarası sosial-iqtisadi və ictimai-siyasi proseslərinə dair tövsiyələr hazırlayacaqdır.

MDB GPA-nın birinci iclasında iştirak etmək üçün Milli Məclisin deputatı Sevinc Fətəliyeva başda olmaqla Azərbaycandan Sankt-Peterburqa rəsmi nümayəndə heyəti gəlmişdir. Nümayəndə heyətinə Rusiyanın Azərbaycanlı Gənclər Təşkilatı (RAGT) İdarə Heyətinin üzvü Emin Hacıyev, Azərbaycan Tələbə Gənclər Təşkilatları İttifaqı sədrinin müavini Nərgiz Hüseynova, Azərbaycan Gənclər Təşkilatları Milli Şurasının baş katibi Seymur Hüseynov və “İrəli” ictimai birliyi Mərkəzi təftiş komissiyasının sədri Xaqani Fərəcov daxildirlər.

Nümayəndə heyəti Azərbaycan Milli Məclisinin MDB PA-dakı nümayəndəsi Aydın Cəfərovla işgüzar müşavirələr formatında görüşlər keçirmişdir.

Birinci iclas çərçivəsində Gənclər Parlamentlərarası Assambleyasının əlaqələndiricisi seçilmiş, cari il üçün iş planı və əsas tədbirlərin cədvəli müəyyənləşdirilmişdir. Uzun sürən diskussiyaların yekunları üzrə əlaqələndiricinin əlifba sırası qaydasında rotasiya yolu ilə seçilməsi təklif olunmuşdur. Səsvermə nəticəsində Azərbaycan Milli Məclisinin deputatı Sevinc Fətəliyeva yekdilliklə əlaqələndirici seçilmişdir.

Bundan başqa, Smolnıda Azərbaycan nümayəndə heyətinin Sankt-Peterburq Administrasiyasının və Gənclər Kollegiyasının nümayəndələri ilə görüşü keçirilmişdir.

Fəridə Abdullayeva

AZƏRTAC-ın xüsusi müxbiri

Moskva