Kiyev, 14 iyun (AZƏRTAC). Ukraynanın Baş naziri Nikolay Azarov iyunun 13-də axşam “ABC: Ukraine&Partners” Birinci Beynəlxalq Biznes-Konfransın iştirakçılarının şərəfinə təşkil edilmiş təntənəli qəbulda iştirak etmişdir. Tədbirdə Azərbaycanı sənaye və energetika naziri Natiq Əliyevin başçılıq etdiyi nümayəndə heyəti təmsil etmişdir.

Əvvəlcə “ABC: Ukraine&Partners” Birinci Beynəlxalq Biznes-Konfrans çərçivəsində “Olimpiyski” Milli İdman Kompleksinin ən iri konfrans salonu olan “Olimpiyskiy dvorik”də “Ukraynanın yanacaq-energetika kompleksi: inkişaf və modernləşmə perspektivləri” mövzusunda panel diskussiyası keçirilmişdir. Diskussiyada nazir Natiq Əliyev, Azərbaycanın Ukraynadakı müvəqqəti işlər vəkili Nazim Əliyev, Azərbaycan Dövlət Neft Şirkətinin (ARDNŞ) Kiyevdəki nümayəndəliyinin rəhbəri Elçin Məmmədov, Ukraynanın energetika və kömür sənayesi naziri Eduard Stavitski, Ukraynanın ekologiya və təbii sərvətlər naziri Oleq Proskuryakov və başqaları iştirak etmişlər.

Nazir Natiq Əliyev yaxın tarixə ekskurs edərək, Azərbaycanın ümummilli lider Heydər Əliyev tərəfindən işlənib hazırlanmış neft strategiyasından, ölkəmizin karbohidrogen xammalının Avropa və Ukraynaya daşınması üzrə qlobal nəqliyyat layihələrindən, neft və qaz təchizatı mənbələrinin şaxələndirilməsindən söz açmışdır. O, respublikanın nəhəng “qara qızıl” və “mavi yanacaq” ehtiyatları, uğurla fəaliyyət göstərən, istilik-energetika kompleksinə prioritet əhəmiyyət verən Azərbaycan və Ukrayna Prezidentləri Şurası, Ukraynanın tranzit ölkə kimi gözəl perspektivləri barədə də ətraflı məlumat vermişdir.

Azərbaycan nazirinin çıxışı mütəxəssislər, habelə Ukrayna və xarici KİV-lərin təmsilçiləri tərəfindən böyük maraqla qarşılanmışdır.

Diskussiyanın iştirakçıları - Azərbaycan nümayəndə heyəti, Ukrayna Nazirlər Kabinetinin üzvləri, müxtəlif ölkələrin hökumət başçıları, beynəlxalq iqtisadi təşkilatların rəhbərləri, Ukraynanın tərəfdaşları olan ölkələrin nazirləri, aparıcı investisiya, maliyyə-bank və biznes təşkilatlarının top-menecerləri, ticarət-sənaye palatalarının, assosiasiyaların başçıları iqtisadiyyatın enerji sektorunun inkişafı və ekologiya üçün potensial təhlükələrin minimuma endirilməsi, Ukraynanın enerji təhlükəsizliyinin qaz-nəqliyyat sisteminin optimallaşdırılması yolu ilə təmin edilməsi məsələlərini və s. müzakirə etmişlər.

Ukrayna hökumətinin başçısı Nikolay Azarov bu gün, iyunun 14-də konfrans çərçivəsində keçiriləcək “Ukrayna ilə dünyanın işgüzar tərəfdaşlığının yolları və perspektivləri: sabit inkişafın təmin edilməsi üçün qarşılıqlı faydalı strategiyanın axtarılması və həyata keçirilməsi” mövzusunda plenar iclasda iştirak edəcəkdir.

N.Azarov forumun yekunlarına dair mətbuat konfransı keçirəcəkdir.

Biznes-konfrans iyunun 14-də panel diskussiyalarından və digər tədbirlərdən sonra başa çatacaqdır.

Zeynal Ağazadə

AZƏRTAC-ın xüsusi müxbiri

Kiyev