İQTİSADİYYAT
Azərbaycan nümayəndə heyəti Beynəlxalq Mülki Aviasiya Təşkilatının sessiyasında iştirak etmişdir
Bakı, 14 oktyabr (AZƏRTAC). Azərbaycan Respublikası Dövlət Mülki Aviasiya Administrasiyasının (DMAA) direktoru Fuad Quliyevin rəhbərlik etdiyi nümayəndə heyəti Beynəlxalq Mülki Aviasiya Təşkilatı (ICAO) Assambleyasının Kanadanın Monreal şəhərində keçirilmiş 38-ci sessiyasında iştirak etmişdir.
DMAA-nın mətbuat xidmətindən AZƏRTAC-a bildirmişlər ki, sessiyada ICAO-nun 2010-2013-cü illəri əhatə edən dövrdəki fəaliyyətinə dair hesabatlar dinlənilmiş, mülki aviasiyanın təhlükəsiz və iqtisadi cəhətdən səmərəli fəaliyyəti məsələləri müzakirə olunmuşdur.
Nümayəndə heyətimiz Azərbaycanın maraqlarından çıxış edərək Avropa İttifaqının Avropa Mülki Aviasiya Konfransı (ECAC), Dövlətlərarası Aviasiya Komitəsi (DAK) və Türkiyə ilə birlikdə təqdim etdiyi bir sıra sənədləri dəstəkləmişdir.
Sessiya çərçivəsində dövlətlərin növbəti üç il müddətinə ICAO Şurasına seçilməsi elektron səsvermə sisteminin tətbiqi ilə reallaşmışdır.
Nümayəndə heyətinin ICAO-nun baş katibi Raymon Bencamin ilə görüşündə Azərbaycanın aviasiya strukturları ilə ICAO arasında inkişaf edən münasibətlər müzakirə edilmişdir. Həmçinin Azərbaycan Respublikasının Ermənistan tərəfindən işğal olunmuş ərazisindəki Xocalı aeroportuna uçuşların yerinə yetirilməsi məsələsinə toxunulmuşdur. ICAO-nun baş katibi ərazi bütövlüyü Birləşmiş Millətlər Təşkilatı, digər beynəlxalq təşkilatlar və dövlətlər tərəfindən tanınan, BMT Təhlükəsizlik Şurasının Dağlıq Qarabağla bağlı dörd qətnaməsi ilə təsdiq edilən Azərbaycan Respublikasının ərazisi üzərindən icazəsiz uçuşların yerinə yetirilməsinin yolverilməz olduğunu bəyan etmişdir.
Görüşdə ICAO-nun Parisdə yerləşən Avropa və Şimali Atlantika Bürosunun direktoru Luis Fonseka de Almeyda iştirak etmişdir.
Azərbaycan Respublikasının Ermənistan tərəfindən işğal olunmuş ərazisindəki Xocalı aeroportuna uçuşların yerinə yetirilməsi məsələsi Beynəlxalq Hava Nəqliyyatı Assosiasiyasının (IATA) baş direktoru Toni Tayler ilə görüşdə də müzakirə edilmişdir. IATA rəhbərliyi ICAO-nun mövqeyini dəstəklədiyini və işğal altında olan ərazi ilə müntəzəm hava əlaqəsinin qurulması cəhdlərinə mənfi münasibətini təsdiq etmişdir.
Avropa İttifaqının ICAO-dakı nümayəndəliyi tərəfindən təşkil olunmuş görüşdə Vahid Aviasiya Məkanı haqqında Sazişin (ECAA Agreement) razılaşdırılmasının davam etdirilməsi və daha sonra imzalanmasının mümkünlüyü məsələsi müzakirəyə çıxarılmışdır.
Azərbaycan nümayəndə heyəti “Black Sea Caspian Rotation Group” çərçivəsində qeyri-rəsmi görüşlər keçirmişdir.
Sessiya çərçivəsində Azərbaycan nümayəndə heyətinin digər ölkələrin və təşkilatların nümayəndə heyətləri ilə də ikitərəfli görüşləri olmuşdur.