Bakı, 19 mart (AZƏRTAC). Azərbaycanın iqtisadi inkişaf naziri Şahin Mustafayevin rəhbərlik etdiyi nümayəndə heyəti Qətər Dövlətində səfərdə olmuşdur.

Nazirliyin mətbuat xidmətindən AZƏRTAC-a bildirmişlər ki, səfər çərçivəsində Azərbaycan nümayəndə heyəti bir sıra görüşlər keçirmiş, müxtəlif müəssisələrin fəaliyyəti ilə tanış olmuşdur.

Qətərin Baş naziri və xarici işlər naziri Şeyx Hamad bin Jassim Al-Thani ilə keçirilmiş görüşdə Birgə İnvestisiya Fondunun yaradılması, kənd təsərrüfatı, infrastruktur, turizm, elm, təhsil, texnologiya sahəsində əməkdaşlıq məsələləri, əlaqələrin genişləndirilməsi perspektivləri müzakirə edilmişdir.

Qətərin Baş naziri və xarici işlər naziri Şeyx Hamad bin Jassim Al-Thani Azərbaycan nümayəndə heyətinin səfərindən məmnunluğunu ifadə etmiş, ölkəsinin Azərbaycan ilə əlaqələrin genişləndirilməsində maraqlı olduğunu, ölkəmizdəki iqtisadi inkişafın Qətərdə maraqla izləndiyini vurğulamış, iki ölkə arasında müxtəlif sahələrdə əlaqələrin daha da inkişafı üçün geniş potensialın olduğunu bildirmişdir.

Görüşdə Qətərin Azərbaycanın ərazi bütövlüyünü dəstəklədiyi qeyd edilmişdir.

İqtisadi inkişaf naziri Şahin Mustafayev Azərbaycanda xarici ölkələrlə, o cümlədən Qətər Dövləti ilə əlaqələrin genişlənməsinə önəm verildiyini vurğulamış, ölkələrimiz arasında siyasi əlaqələrin yüksək səviyyədə olduğunu, qarşılıqlı dostluq və hörmət prinsiplərinə əsaslandığını bildirmişdir.

Prezident İlham Əliyevin Qətərə, Qətər Dövlətinin əmiri Şeyx Həməd bin Xəlifə Al Taninin Azərbaycana rəsmi və işgüzar səfərlərini xatırladan nazir Şahin Mustafayev keçirilmiş görüşlərin, aparılmış müzakirələrin, imzalanmış sənədlərin iki ölkə arasında əlaqələrin inkişafında xüsusi önəm kəsb etdiyini diqqətə çatdırmışdır.

Qətər Dövlətinin sənaye və energetika naziri Mohammed bin Saleh Al-Sada ilə Azərbaycan nümayəndə heyəti arasında keçirilmiş görüşdə ölkələrimiz arasında iqtisadi sahədə, o cümlədən sənaye sahəsində əməkdaşlığa dair fikir mübadiləsi aparılmışdır.

Nazir Şahin Mustafayev Azərbaycanın Avropanın enerji təhlükəsizliyinin təmin olunmasında etibarlı tərəfdaş olduğunu bildirmiş, ölkəmizin enerji potensialı barədə məlumat vermiş, Azərbaycanın enerji ixracatçısı olduğunu vurğulamışdır.

Şahin Mustafayev, həmçinin Azərbaycanda Sumqayıt Kimya Sənaye Parkının yaradılması istiqamətində görülən işlər barədə məlumat vermiş, Qətərin neft-kimya sənayesi sahəsində böyük təcrübəyə malik olduğunu qeyd edərək dost ölkənin şirkətlərini sənaye parkına investisiya yatırmağa dəvət etmişdir.

Qətər Dövlətinin sənaye və energetika naziri Mohammed bin Saleh Al-Sada isə ölkəsinin Azərbaycan ilə iqtisadi əlaqələrin genişlənməsində maraqlı olduğunu vurğulamış və bunun üçün hər iki ölkənin böyük potensiala malik olduğunu qeyd etmişdir.

Azərbaycan nümayəndə heyətinin Qətər Dövlətinin iqtisadiyyat və maliyyə naziri Yousif Hussain Kamal ilə keçirilmiş görüşündə nazir Şahin Mustafayev hazırda ölkələrimiz arasında müxtəlif sahələrdə, o cümlədən iqtisadi sahədə əməkdaşlığın uğurla davam etdiyini, iki dövlət arasında indiyədək 10-dan çox sənədin imzalandığını vurğulamışdır.

Nazir Şahin Mustafayev infrastruktur, kənd təsərrüfatı, ticarət, turizm, elm, təhsil və texnologiya, Birgə İnvestisiya Fondunun yaradılması sahəsində əməkdaşlığın inkişaf etdirilməsi üçün böyük potensialın olduğunu vurğulamışdır.

Görüşdə Qətərdə həyata keçiriləcək infrastruktur layihələrində Azərbaycan şirkətlərinin iştirak edə biləcəyi, kənd təsərrüfatı sahəsində birgə emal müəssisələrinin yaradılması, turizm sahəsində əməkdaşlıq, Birgə İnvestisiya Fondunun yaradılması ilə Azərbaycana, Qətərə və üçüncü ölkələrə sərmayə qoyuluşu imkanları, elm və təhsil sahəsində əməkdaşlıq məsələləri də müzakirə edilmişdir.

Görüşdə nazir Şahin Mustafayev Azərbaycan iqtisadiyyatı barədə də məlumat vermişdir.

Qətərin biznes və ticarət naziri şeyx Jassim bin Abdulaziz Al-Thani ilə Azərbaycan nümayəndə heyətinin görüşündə iş adamları arasında əməkdaşlıq, AZPROMO və Azərbaycan İnvestisiya Şirkəti ilə Qətərin müvafiq qurumları arasında əməkdaşlıq məsələləri müzakirə edilmiş, hər iki ölkənin biznes dairələri arasında əlaqələrin daha da genişləndirilməsi üçün biznes forum və sərgilərin təşkil edilməsinin əhəmiyyəti vurğulanmışdır.

Azərbaycan nümayəndə heyəti, həmçinin Qətərin “Mesaieed” sənaye şəhərciyində olmuş, burada 10-dan çox müəssisənin fəaliyyəti ilə tanış olmuşdur.

“Mesaieed” sənaye şəhərciyinin direktoru Abdulaziz Al-Mufta ilə görüşdə Azərbaycan nümayəndə heyətinə sənaye şəhərciyi və burada fəaliyyət göstərən müxtəlif müəssisələr barədə məlumat verilmişdir.

Nazir Şahin Mustafayev Azərbaycanda da Balaxanı Sənaye, Sumqayıt Kimya Sənaye və Sumqayıt Yüksək Texnologiyalar parklarının yaradılması istiqamətində zəruri işlərin görüldüyünü qeyd etmiş, bu parkların yaradılmasının ölkədə rəqabətqabiliyyətli və ixracyönümlü məhsul istehsalının artırılmasına müsbət təsir göstərəcəyini vurğulamışdır.

Qətər İnvestisiya Qurumunun “Qatari Diar” İnvestisiya Şirkətinin icraçı direktoru vəzifəsini icra edən Khalid Al-Sayed ilə görüşdə Azərbaycan nümayəndə heyətinə məlumat verilmişdir ki, şirkət yarandığı dövrdən dünyanın müxtəlif ölkələrində bir sıra layihələrə milyardlarla dollar sərmayə yatırmışdır.

Görüşdə nazir Şahin Mustafayev Azərbaycanda da xarici investisiya qoyuluşunu dəstəkləmək, sahibkarlığı daha da inkişaf etdirmək məqsədi ilə AZPROMO və Azərbaycan İnvestisiya Şirkətinin fəaliyyət göstərdiyini vurğulamışdır. Bu qurumlar yerli və xarici sahibkarlara müxtəlif biznes xidmətlərinin göstərilməsi, iş adamlarının işgüzar əlaqələrinin genişləndirilməsi, ölkə iqtisadiyyatının qeyri-neft sahəsində müddətli investisiya qoyuluşlarının həyata keçirilməsi, yerli və xarici investisiyaların qeyri-neft sektoruna cəlb edilməsi sahəsində uğurla fəaliyyət göstərirlər.

Qətərin “ASHGHAL” şirkətinin prezidenti Nasser Ali Al-Mavlavi ilə görüşdə isə qurumun fəaliyyəti və müxtəlif sahələrdə həyata keçirdiyi layihələr barədə Azərbaycan nümayəndə heyətinə məlumat verilmişdir.

Səfər çərçivəsində nümayəndə heyətinin üzvü, təhsil nazirinin müavini Qulu Novruzov Qətərin ali təhsil və təhsil naziri Saad bin İbrahim Al Mahmoud və Qətər Fondunun vitse-prezidenti Ahmad Hasnah ilə görüşmüşdür.

Görüşlərdə iki ölkə arasında təhsil və elm sahəsində əməkdaşlıq və bu sahədə təcrübə mübadiləsinə dair fikir mübadiləsi aparılmışdır.