ELM VƏ TƏHSİL
Azərbaycan özəl təhsil sektoruna xarici yatırımlar üçün əlverişli ölkədir
Azərbaycan özəl təhsil sektoruna xarici yatırımlar üçün maraqlı ölkədir.
Bu fikir politoloq və iqtisadiyyat üzrə mütəxəssis Tamerlan Vahabovun Avstriyanın Vyana və Qrats şəhərlərində işgüzar səfəri zamanı yerli mütəxəssis və iş adamları, eləcə də Qrats Universitetinin professorları ilə görüşlərində səslənib. Mütəxəssis səfər zamanı Avstriyanın elm dairələrini təmsil edən və alman dili, marketinq, mühasibatlıq, maliyyə, kompyuter elmi və digər sahələr üzrə özəl tədris layihələri həyata keçirən iş adamları ilə əməkdaşlıq imkanları ətrafında fikir mübadiləsi aparıb.
Avstriyalı mütəxəssis və iş adamları ilə görüşlərdə qarşı tərəf Azərbaycan bazarında maraqlı olduğunu qeyd edib. Buna əsas kimi Azərbaycanda əhali arasında özəl sektorda fəaliyyət göstərən ixtisas kurslarına və alman dilinə marağın getdikcə artması əsas göstərilib. Alman dilinin Avropanın iqtisadi cəhətdən inkişaf etmiş Almaniya, Avstriya və İsveçrə kimi ölkələrində dövlət dili olması da bu dilin cəlbediciliyini artırır.
T.Vahabov qeyd edib ki, Azərbaycan rəhbərliyinin siyasi iradəsi nəticəsində ölkədə təhsil sahəsində köklü islahatlara başlanıb və bu da xarici sərmayəçilər üçün maraq və mühüm əhəmiyyət kəsb edən amildir. Onun sözlərinə görə, sərmayəçilərin əsas prioritet və təməl gözləntilərindən olan maliyyə, ümumi iqtisadi, siyasi sabitlik, güclü hüquqi baza və bürokratik əngəllərin aradan qaldırılması kimi faktorlar artıq Azərbaycanda bu sektorda özünü ciddi şəkildə büruzə verən proseslərdir. Təhsil Nazirliyinin ölkədə təhsil sisteminin ən müasir beynəlxalq standartlara uyğun modernləşdirilməsi sahəsində apardığı məqsədyönlü fəaliyyət də mühüm önəm daşıyır.
Avstriyalı mütəxəssislər də öz növbəsində Azərbaycan rəhbərliyinin insan kapitalının zənginləşdirilməsi və bunun üçün əlverişli şəraitin yaradılması sahəsində məqsədyönlü fəaliyyətini məmnunluqla qeyd ediblər. Bundan əlavə, Azərbaycanda dayanıqlı iqtisadi inkişaf nəticəsində əhalinin alıcılıq qabiliyyətinin yüksəldiyini və insanların bir çox ölkələrlə müqayisədə təməl biliklərin qənaətbəxş olduğunu vurğulayan iş adamları respublikamızın investisiya baxımından maraqlı ölkə olduğunu qeyd ediblər.
Elgün Niftəliyev
AZƏRTAC-ın xüsusi müxbiri
Vyana