RƏSMİ XRONİKA
AZƏRBAYCAN PREZİDENTİ İLHAM ƏLİYEV BAKININ ƏTRAFINDA BƏZİ YERLƏRİ SU BASMASI İLƏ ƏLAQƏDAR YARANMIŞ VƏZİYYƏTLƏ TANIŞ OLMUŞDUR
Bakının Sabunçu, Suraxanı və Əzizbəyov rayonları ərazisinin bir sıra yerlərində əsasən qrunt sularının yığılması nəticəsində əmələ gəlmiş gölməçələr ekoloji vəziyyətə mənfi təsir etməklə yanaşı, paytaxtın ümumi mənzərəsinə də xələl gətirir.
Azərbaycan Prezidenti İlham Əliyev mayın 16-da mövcud vəziyyətlə yaxından tanış olmuşdur. Dövlətimizin başçısı həmin ərazilərə axan suyun qarşısının vaxtında alınmaması və gölməçələrin qurudulmaması ilə bağlı müvafiq strukturların rəhbərlərinə iradlarını bildirdi.
İLHAM ƏLİYEV: Bu sizi narahat etmir?
NİZAMƏDDİN RZAYEV (“Azərsu” Səhmdar Cəmiyyətinin prezidenti): Narahat edir.
İLHAM ƏLİYEV: Bəs niyə tədbir görmürsünüz? Çətinliklərə görə belə məsuliyyətsizlik etmək olmaz. Su basıb buranı, gəlib artıq yola çıxıbdır. Gərək bunu sizə mən deyim ki, tədbir görəsiniz? Bir gündə nə qədər qurudulur?
Mən o vaxt sizə demişdim və siz də başladınız buranı qurutmağa və xeyli hissəsini qurutmuşdunuz.
HACIBALA ABUTALIBOV: Bəli, tam qurumuşdu.
İLHAM ƏLİYEV: Hətta keçən il də elə buraya gəlmişdik. Burada su yox idi. Düz oraya, çənlərə qədər getdik. Sonra isə mən görürəm ki, su oranı basıb, bir aydan sonra yəqin ki, bu yolu da basacaqdır.
HACIBALA ABUTALIBOV: Əlbəttə, siz deməsəydiniz, yolu su basacaqdı.
İLHAM ƏLİYEV: Amma bunu mən deməməliyəm. Bunu sən gərək edəsən, bu sənin vəzifəndir. Mən səni belə yüksək vəzifəyə təyin etmişəm. Tədbir görün, həm burada, həm orada su axmasının qarşısını alın. Oranı da su basmışdır.
HACIBALA ABUTALIBOV: Artıq işə başlayıblar.
İLHAM ƏLİYEV: Elə etmək lazımdır ki, su yığılmasın.
NİZAMƏDDİN RZAYEV: Baş üstə, cənab Prezident.
İLHAM ƏLİYEV: Yoxsa, buranı qurudacaqsınız, sonra yenə nasos işləməyəcək və yenidən buranı su basacaqdır.
Son vaxtlar paytaxtımızın magistral yolları sürətlə abadlaşır. Dövlətimizin başçısı belə bir vaxtda Böyükşor gölünə yenidən yeraltı suların yığılmasının aeroport yolunun buradan keçən hissəsi üçün təhlükə doğurduğunu nəzərə alaraq, təxirə salınmadan bunun qarşısının alınması barədə konkret tapşırıqlar verdi.
İLHAM ƏLİYEV: Aeroport yolu genişlənəcək, mən artıq göstəriş vermişəm. Gərək gələcəkdə buraya su yığılmasın. Yoxsa yol salınacaq, ondan sonra su yığılarsa, yolu altdan yuyub dağıdacaqdır.
Mən kanalizasiya təsərrüfatını verdim “Azərsu”ya. İstəyirdim ki, bu sahədə işlər daha da səmərəli olsun. Nəticədə nə oldu? İcra hakimiyyətinin tabeliyində olanda heç olmasa bura qurudulurdu, indi, sizə veriləndən sonra başlı-başına buraxmısınız, su basıb şəhəri. Ona görə birlikdə tədbir görün, birdəfəlik bu məsələ həll olunsun.
Suraxanı rayonu ərazisindəki süni gölü isə təkcə qrunt suları deyil, həm də ətrafdakı yaşayış məntəqələrindən axıdılan kanalizasiya suları yaratmışdır. Prezident İlham Əliyev bu problemin də tezliklə həlli ilə əlaqədar göstəriş verdi.
İLHAM ƏLİYEV: Qrunt sularını haraya axıtmaq lazımdır. Şəhərdə belə yerlər kifayət qədərdir. Mən hər yerə baxa bilmərəm, amma xəbərim var, belə yerlər çoxdur. Xüsusi proqram hazırlayıb onları qurutmaq və əraziləri normal vəziyyətə salmaq lazımdır. Ondan sonra qrunt sularının axmasının səbəbi aradan qaldırılmalıdır ki, yenidən belə vəziyyət yaranmasın.
Yol boyu bir neçə yerdə anoloji vəziyyətlə yaxından tanış olan Prezident İlham Əliyev xüsusilə havaların getdikcə istiləşdiyi bir vaxtda belə gölməçələrin ətraf mühitə mənfi təsirinin artmasının, antisanitariya şəraiti yaratmasının qarşısını almaq üçün Bakı Şəhəri İcra Hakimiyyətinin və “Azərsu” SC-nin rəhbərlərinə kompleks tədbirlər görməyi tapşırdı.