AZƏRBAYCAN PREZİDENTİ İLHAM ƏLİYEVİN BƏYANATI
- Hörmətli cənab Prezident!
Hörmətli qonaqlar!
Mən sizin hamınızı Azərbaycanda salamlayıram və “Xoş gəlmisiniz!” deyirəm.
Bildiyiniz kimi, ilk dəfədir ki, Koreya Respublikasının Prezidenti Azərbaycana rəsmi səfər edir. Bu onu göstərir ki, bizim aramızda olan əlaqələr çox yüksək səviyyədədir. Mən əminəm ki, bu səfərdən sonra əlaqələrimiz daha da inkişaf edəcək və bütün sahələri əhatə edəcəkdir.
Bu gün biz çox səmərəli danışıqlar apardıq. İkitərəfli əlaqələrin gələcək inkişaf perspektivlərini müzakirə etdik, siyasi, iqtisadi, mədəni sahələrdə əməkdaşlığın perspektivləri geniş müzakirə olundu. Deyə bilərəm ki, müzakirələr çox faydalı keçdi. Əminəm ki, bu səfərdən sonra əlaqələrimizin inkişafı daha da sürətlə gedəcəkdir.
Biz ikitərəfli münasibətlərə böyük əhəmiyyət veririk. Təsadüfi deyil ki, bu yaxınlarda Koreya Respublikasında Azərbaycan səfirliyinin təsis edilməsi haqqında qərar qəbul olunmuşdur. Şübhəsiz, siyasi əlaqələrin yüksək pilləyə qalxması üçün güclü iqtisadi təməl olmalıdır və bu gün imzaladığımız sənədlər bu təməlin yaradılmasına xidmət edəcəkdir. İmzalanmış ikitərəfli sənədlər, demək olar ki, iqtisadi sahənin bütün istiqamətlərini əhatə edir.
Eyni zamanda, bu gün Koreya Respublikasının və Azərbaycanın iş adamlarının görüşü nəzərdə tutulubdur və ümid edirəm ki, bu görüşdən sonra real, artıq konkret layihələr üzərində ciddi işləyəcəyik. Energetika, nəqliyyat, infrastruktur layihələri - bütün bunlar ikitərəfli maraq doğurur və ümid edirəm ki, bu səfərdən sonra bütün bu istiqamətlərdə konkret addımlar atılacaqdır.
Koreya Respublikası iqtisadi cəhətdən dünyanın qabaqcıl ölkələrindən biridir, çox böyük nailiyyətlər qazanmışdır. Ancaq onu da bilirik ki, onun ilkin addımları, ilkin start vəziyyəti o qədər də asan deyildi. Ancaq Koreya Respublikası iqtisadi böhrandan iqtisadi inkişafa keçidin bu yolunu çox müvəffəqiyyətlə başa vurmuşdur və onların təcrübəsi bizim üçün də çox böyük əhəmiyyət kəsb edir.
Azərbaycanın da müasir tarixi buna oxşardır. Bizim keçmişimiz bir-birinə bənzəyir. Azərbaycan da iqtisadi tənəzzüldən, böhrandan çıxaraq, iqtisadi inkişafa qədəm qoyubdur. Belə olan halda, əlbəttə, Koreya Respublikasının təcrübəsi bizim üçün çox maraqlıdır və önəmlidir. Bütün sahələrdə uğurlu əməkdaşlıq etmək üçün hər cür şərait var - siyasi iradə, iqtisadi maraqlar var, real, konkret layihələr ətrafında fikir mübadiləsi aparılır. Əminəm ki, bu səfərdən sonra bizim əlaqələrimiz çox yüksək pilləyə qalxacaqdır. Sağ olun.
Bölmənin digər xəbərləri
