AZƏRBAYCAN PREZİDENTİ İLHAM ƏLİYEVİN BƏYANATI
Bizə göstərdiyiniz qonaqpərvərliyə görə Sizə minnətdaram. Burada, Brüsseldə yenidən olmağımdan və ikitərəfli əlaqələrimiz, regional proseslərə dair fikir mübadiləsi aparmaq imkanından çox məmnunam.
Bu gün biz Azərbaycan ilə Avropa İttifaqı arasında əməkdaşlığın yeni mərhələsinə başlayırıq. Əminəm ki, bundan sonra olduqca uzun müddət ərzində həyata keçirəcəyimiz daha sıx tərəfdaşlıq, əməkdaşlıq və əlaqələr Azərbaycana siyasi və demokratik islahatları, ölkənin müasirləşdirilməsini, güclü siyasi və iqtisadi sistemin qurulmasını davam etdirmək imkanı yaradacaqdır.
Avropa İttifaqının Cənubi Qafqaz regionuna aid yeni qonşuluq siyasəti gələn beş il ərzində ölkəmizdə siyasi və iqtisadi inkişaf meyarlarının Avropa İttifaqındakı göstəricilərə uyğunlaşdırılmasının əsasını qoyacaqdır. Bu, bizim məqsədimiz və gündəliyimizdə duran məsələlərdir. Avratlantik məkana inteqrasiya sahəsində Azərbaycanın neçə illər ərzində apardığı siyasət həm ölkəmiz, həm də bütövlükdə regional əməkdaşlıq üçün çox böyük nəticələr vermişdir.
Hazırda əməkdaşlığımızın elementlərindən biri enerji sahəsindəki əlaqələrdir. Avropanın etibarlı tərəfdaşı və dostu olan Azərbaycan hamımız üçün get-gedə daha mühüm məsələyə çevrilən enerji təhlükəsizliyində vacib rol oynamaqdadır.
Ümumiyyətlə, mən əməkdaşlığımızı olduqca səmərəli və mühüm hesab edirəm. Bu əməkdaşlıq müstəqilliyimizin qısa dövrü, yəni 15 ili ərzində ölkəmizdə sürətlə inkişaf edən iqtisadiyyat, güclü siyasi sistem qurmaq imkanını yaratdı və Avratlantik məkana inteqrasiya arzumuzu möhkəmləndirdi.
Mən Azərbaycanın böyük dostu cənab Xavyer Solananı ölkəmizə səfərə dəvət etdim. O, Azərbaycanda dəfələrlə olubdur. Əminəm ki, gələcək səfəri zamanı cənab Solana ölkəmizdəki bir çox dəyişiklikləri görəcək və biz öz dialoqumuzu olduqca səmimi və açıq formada davam etdirəcəyik. Avropa və Azərbaycanın gələcəyi naminə əməkdaşlığımız irəli gedəcəkdir. Sağ olun.
X X X
Sonra jurnalistlərin suallarına cavab verildi.
“AZAD AVROPA” RADİOSU: Sualım Prezident Əliyevədir. Siz Rusiya ilə müqayisədə ölkənizi Avropa İttifaqı üçün enerji təchizatında alternativ kimi görürsünüzmü?
İLHAM ƏLİYEV: Biz ölkəmizi heç vaxt hər hansı digər ölkənin alternativi hesab etməmişik. Biz, sadəcə, öz işimizi yerinə yetirmişik. Ölkəmiz və bütün region üçün düzgün olan işləri görmüşük. Bizim indiki enerji infrastrukturumuz böyük həcmdə neft və qazı Avropa və dünya bazarlarına çıxarmaq imkanı yaradır. Bu siyasətin əsası 1994-cü ildə qoyulmuşdur. Artıq 10 ildir ki, biz bu siyasəti həyata keçiririk. Bir daha demək istəyirəm ki, həmin siyasətin məqsədi ölkəmizin tələbatının ödənilməsindən, sürətli iqtisadi inkişafdan ibarətdir. Bu gün isə Avropadakı və dünyadakı vəziyyət 10 il əvvəl olan vəziyyətdən fərqlənir. Bu səbəbə görə də enerji təhlükəsizliyi məsələləri get-gedə daha böyük əhəmiyyət kəsb edir. Azərbaycan isə öz neft və qaz ehtiyatları, mövcud olan enerji infrastrukturu və boru kəmərləri ilə, təbii ki, dünyanın və regionun enerji təhlükəsizliyində mühüm rol oynaya bilər.
FƏRİD İSKƏNDƏROV (Azərbaycanın “Space” telekanalı): Azərbaycanın Avropa İttifaqı üçün vacibliyi nədən ibarətdir və enerji sahəsindən başqa, digər sahələrdəki əməkdaşlığın gələcək perspektivlərini necə görürsünüz?
XAVYER SOLANA: Prezidentin dediyi kimi, Azərbaycan ilə Avropa İttifaqı arasındakı münasibətlər yeni mərhələyə qədəm qoyur. Yeni qonşuluq siyasətinə dair tədbirlər planının həyata keçirilməsi gələn həftənin ikinci günündən etibarən başlanacaqdır və bu təkcə enerji sahəsinə aid deyildir. Burada bir çox digər müddəalar da vardır. Prezident həmçinin vurğuladı ki, siyasi, iqtisadi və digər sahələrdə dəyişikliklərin olması üçün çox işlər görülür və bu faydalıdır. Biz Azərbaycanla ikitərəfli münasibətlərimizi dərinləşdirmək əzmindəyik və bu, təkcə enerji sahəsini əhatə etmir. Baxmayaraq ki, o, vacib sahədir. Azərbaycan yalnız enerji məhsulları ölkəsi deyil, regionun mühüm ölkəsidir. Biz Cənubi Qafqaz regionunun üç ölkəsi – Azərbaycan, Ermənistan və Gürcüstan ilə münasibətlərin dərinləşməsində maraqlıyıq. Biz nəinki siyasi münasibətlər, o cümlədən regional əlaqələr də qurmalıyıq.
Bu barədə Prezidentlə söhbət etdik və o, bununla razılaşdı. Ölkənizdə hazırda gedən sürətli inkişaf regional inteqrasiyada öz rolunu oynayacaqdır.
“NEZAVİSİMAYA QAZETA” (Rusiya): Sualım Prezident Əliyevədir. Sizin Dağlıq Qarabağ münaqişəsinin həlli ilə bağlı konsepsiyanız nədən ibarətdir?
İLHAM ƏLİYEV: Mövqeyimiz tam aydındır və hər zaman beynəlxalq hüquq normaları və prinsiplərinə arxalanır. Dünyanın istənilən yerində münaqişənin həllinə ehtiyac duyularsa, beynəlxalq hüquq normaları və prinsipləri həmin münaqişəyə tətbiq olunmalıdır. Azərbaycanın ərazi bütövlüyü, yalnız Ermənistan istisna olmaqla, beynəlxalq ictimaiyyət, Birləşmiş Millətlər Təşkilatı və bütün ölkələr tərəfindən tanınır. Münaqişə yalnız bu əsaslarla həll oluna bilər. Azərbaycanın işğal olunmuş torpaqları qaytarılmalı, işğala son qoyulmalı, etnik təmizləmə siyasətindən əziyyət çəkmiş bir milyon azərbaycanlı qaçqın və məcburi köçkün öz doğma torpaqlarına qayıtmalıdır. Bu halda, Dağlıq Qarabağ ermənilərinə dünyada mövcud olan ən yüksək muxtariyyət statusu verilə bilər. Bu, beynəlxalq təcrübədir. Milli azlıqlar və muxtariyyətlər Avropada bir çox ölkədə var. Azlıq olmaq o demək deyil ki, siz torpağın müəyyən hissəsini qoparıb özünüzü müstəqil elan edə bilərsiniz. Bir sözlə, tərəfdar çıxdığımız bu əsas prinsiplər bunlardır və münaqişənin həlli üçün yaxşı zəmin ola bilər. Sağ olun.
Bölmənin digər xəbərləri
