AZƏRBAYCAN PREZİDENTİ İLHAM ƏLİYEVİN BƏYANATI
-Hörmətli Dmitri Anatolyeviç!
Hörmətli qonaqlar!
Xanımlar və cənablar!
Mən Rusiya Prezidentini Azərbaycanda bir daha ürəkdən salamlamaq istərdim. Biz Rusiya Prezidentinin rəsmi səfərinə çox böyük əhəmiyyət veririk. Əminik ki, bu səfər Rusiya ilə Azərbaycan arasında dostluq, mehriban qonşuluq əlaqələrinin möhkəmlənməsi işinə xidmət edəcəkdir.
Biz çox səmərəli danışıqlar apardıq, ikitərəfli məsələlərin, regional əməkdaşlıq, beynəlxalq münasibətlər məsələlərinin çox geniş spektrini müzakirə etdik. Məmnuniyyətlə qeyd etmək istərdim ki, gündəliyin bütün bəndləri üzrə bizim mövqelərimiz üst-üstə düşür.
Rusiya ilə Azərbaycan arasında münasibətlərin formatı genişlənir və zənginləşir. Biz siyasi müstəvidə fəal əməkdaşlıq edirik, iqtisadi əlaqələrimiz, əmtəə dövriyyəsi artır, onun strukturu, nəqliyyat və humanitar sahələrdə, təhlükəsizliyin təmin edilməsi və regionumuzda təhlükəsizlik tədbirlərinin gücləndirilməsi sahəsində əməkdaşlıq yaxşılaşır. Bunlar daim müzakirə edilən məsələlərin heç də tam siyahısı deyildir.
Bu gün çox mühüm sənədlər imzalanmışdır, onlar gələcəkdə əməkdaşlığımızın inkişaf istiqamətlərini müəyyən edəcəklər. İmzalanmış sənədlər arasında mən Rusiya ilə Azərbaycan arasında dostluq və strateji tərəfdaşlıq haqqında birgə Bəyannaməni xüsusi qeyd etmək istərdim. Bu Bəyannamənin adı çox şeydən xəbər verir. Biz bir-birimizi dost ölkələr, bir-birini strateji tərəfdaş adlandıran ölkələr hesab edirik. Bu, sadəcə, rəsmiyyət deyil, bizim münasibətlərimizin mahiyyətini əks etdirir.
Bu münasibətlərin möhkəm təməli, dərin tarixi var və bu gün onlar dostluq, mehriban qonşuluq, hüquq bərabərliyi və qarşılıqlı fayda prinsiplərinə əsaslanır. Bəyannamə ikitərəfli əməkdaşlığımızın bütün sahələrini əhatə edir və çox sevindirici haldır ki, Azərbaycanda bir nömrəli məsələ sayılan Ermənistan-Azərbaycan, Dağlıq Qarabağ münaqişəsinin həlli məsələsi də bu Bəyannamədə öz əksini tapmışdır. Həmin sənəddə deyilir ki, münaqişə beynəlxalq hüququn prinsip və normaları əsasında, BMT Təhlükəsizlik Şurasının qətnamələri, ATƏT-in qərarları əsasında, dövlətlərin ərazi bütövlüyü, suverenliyi və sərhədlərin toxunulmazlığı prinsiplərinə uyğun olaraq həll edilməlidir. Biz bu mövqeyinə görə Rusiyaya təşəkkür edirik. Əminik ki, bu mövqe, eləcə də ATƏT-in Minsk qrupunun həmsədri kimi Rusiyanın münaqişənin həllində fəal iştirakı öz səmərəsini verəcəkdir.
Bu gün biz ənənəvi və potensial enerji əməkdaşlığı məsələlərini fəal müzakirə etdik. Elektrik energetikası sahəsində əməkdaşlığın zəngin tarixi və yaxşı perspektivləri var, neft-qaz sahəsində əməkdaşlıq da tarixi nailiyyətlərə əsaslanır və bu gün biz qarşılıqlı maraq doğuran, karbohidrogen ehtiyatlarından maksimum səmərə ilə istifadə olunmasına xidmət edəcək yeni layihələri nəzərdən keçiririk.
Xəzər dənizinin statusunun tənzimlənməsi ilə bağlı məsələlər də ölkələrimizi birləşdirir. Biz həm Qafqazda, həm də Xəzərdə qonşuyuq. Regionda proseslərin inkişafı və iqtisadi inteqrasiya məsələləri xeyli dərəcədə bizim ölkələrimiz arasında qarşılıqlı əlaqələrin səviyyəsindən asılıdır.
Bizim münasibətlərimizin humanitar formatı genişlənir. Bu gün mən Dmitri Anatolyeviçə dedim ki, Azərbaycanda təhsilin rus dilində aparıldığı 300-dən çox məktəb var. Onlardan 19-u xalis rus məktəbidir, həmin məktəblərdə tədris yalnız rus dilində aparılır. Bu yaxınlarda Azərbaycanda Moskva Dövlət Universitetinin filialının yaradılması haqqında qərar qəbul edilmişdir. Cənubi Qafqazda ən böyük rus icması Azərbaycandadır, burada rus dilində çoxlu qəzet nəşr edilir. Başqa sözlə desək, Azərbaycanın rusdilli vətəndaşlarının hərtərəfli inkişafı üçün zəruri olan bütün işlər görülür. Buna görə də əməkdaşlığın humanitar formatı, təbii ki, münasibətlərimizdə mühüm yer tutur. Biz gələcəkdə də bu əməkdaşlığı yeni formalarla və yeni layihələrlə zənginləşdirmək üçün səy göstərəcəyik.
Bir sözlə, ikitərəfli münasibətlərimiz haqqında və onların burada, Qafqazda oynadığı rol haqqında çox danışmaq olar. Mən sizin vaxtınızı almaq istəmirəm. Onu demək istəyirəm ki, müzakirə edilən bütün məsələlər barədə bizim qarşılıqlı anlaşmamız var, nailiyyətləri və ən başlıcası, gələcək perspektivləri ümumi mövqedən qiymətləndiririk. Əminəm ki, səfər uğurlu başladığı kimi, uğurlu da davam edəcək və münasibətlərimizin daha da inkişaf etdirilməsi və dövlətlərimizin daha da yaxınlaşması işində çox mühüm addım olacaqdır.
Diqqətinizə görə təşəkkür edirəm.
######
 |
 |
Bölmənin digər xəbərləri
