AZƏRBAYCAN PREZİDENTİ İLHAM ƏLİYEVİN BƏYANATI
-Hörmətli xanımlar və cənablar!
İlk növbədə məni Moskvaya səfərə və bu görüşü keçirməyə dəvət etdiyinə görə Dmitri Anatolyeviç Medvedevə təşəkkürümü bildirmək istərdim. Dmitri Anatolyeviçin qeyd etdiyi kimi, bizim təmaslarımız çox intensiv xarakter daşıyır və bu, ölkələrimiz arasında münasibətlərin xarakterini əks etdirir. Biz bir neçə dəfə görüşmüşük və hər dəfə çoxlu mövzuları müzakirə etmişik.
Təbii ki, ikitərəfli münasibətlərlə bağlı məsələlər diqqət mərkəzindədir. Rusiya ilə Azərbaycan arasında münasibətlər çox dinamik, müsbət şəkildə inkişaf edir və regional proseslərə də müsbət təsir göstərir. Bizim qarşılıqlı iqtisadi əlaqələrimiz, siyasi dialoqumuz çox fəaldır, biz humanitar sahədə əməkdaşlıq edirik və bütün bu istiqamətlərdə, eləcə də başqa sahələrdə davamlı irəliləyiş olduğunu görürük.
Rusiyanın və Azərbaycanın iqtisadi potensialının artması təsərrüfat subyektlərinin, şirkətlərin dinamik inkişafına şərait yaradır, qarşılıqlı investisiyalar, birgə layihələr müzakirə edilir. Bu da təbii ki, bizim münasibətlərimizi daha da möhkəmlədəcəkdir.
Biz qonşu dövlətlərik, bizim həm quruda, həm də dənizdə ümumi sərhədimiz var və qonşular arasında münasibətlər çox vacibdir. Qonşular arasında münasibətlər heç də həmişə istənilən kimi olmur. Lakin mən belə hesab edirəm ki, Rusiya ilə Azərbaycan arasında münasibətlər nümunəvi xarakter daşıyır və qonşular arasında münasibətlərə nümunə ola bilər. Biz bundan çox razıyıq və ümidvarıq ki, gələcəkdə də bu münasibətləri inkişaf etdirmək, onları yeni məzmunla, yeni layihələrlə zənginləşdirmək, bununla da ölkələrimizin davamlı inkişafına və regionda inteqrasiyanın daha da güclənməsinə şərait yaratmaq üçün maksimum səy göstərəcəyik.
Əlbəttə, bu gün regionda yaranmış vəziyyət müəyyən narahatlıq doğurur və Azərbaycan bu gərginliyin azaldılmasına öz töhfəsini verməyə hazırdır. Biz hesab edirik ki, regionda fikir ayrılıqlarına səbəb olan məsələlər dinc yolla, dialoq yolu ilə, təmas nöqtələri tapmaq yolu ilə və əlbəttə, qarşılıqlı hörmət əsasında həll edilməlidir.
Bu gün biz ikitərəfli xarakter daşıyan məsələlərlə yanaşı, regional prosesləri, Ermənistan-Azərbaycan, Dağlıq Qarabağ münaqişəsinin həlli məsələsini də müzakirə etdik. Biz ümid edirik ki, ATƏT-in Minsk qrupunun həmsədri kimi Rusiya tənzimləmə prosesində fəal rolunu davam etdirəcəkdir. Qafqaz regionunda baş verən proseslər nə qədər mürəkkəb olsa da, bizə belə gəlir ki, bu gün münaqişənin bütün dövlətlərin mənafeyinə cavab verən və beynəlxalq hüquq prinsiplərinə əsaslanan şəkildə həlli üçün yaxşı imkanlar var. Mən əminəm ki, əgər münaqişə yaxın vaxtlarda həll olunarsa, kifayət qədər geniş formatda regional əməkdaşlıq üçün yeni perspektivlər yaranacaq, bu isə bütün ölkələrin xeyrinə olacaqdır. Biz bu regionda öz qonşularımızla bərabər yaşayırıq və yaşayacağıq, heç kəs bu regiondan heç yerə köçüb getməyəcəkdir. Ona görə də səmərəli qarşılıqlı əlaqələr, mehriban qonşuluq, əməkdaşlıq mexanizmlərini axtarıb tapmaq lazımdır. Bir daha demək istəyirəm, əgər bizim regionda bütün qonşu ölkələr arasında münasibətlər Rusiya ilə Azərbaycan arasındakı münasibətlər kimi olsaydı, sizi inandırıram, heç vaxt nəinki münaqişə, hətta heç bir anlaşılmazlıqlar da olmazdı.
Buna görə bir daha demək istəyirəm ki, biz münasibətlərimizin səviyyəsini çox yüksək qiymətləndiririk, bu münasibətləri daha da möhkəmlətməyə çalışırıq və öz tərəfimizdən həmin məqsədə nail olmaq üçün bundan sonra da lazım olan hər şeyi edəcəyik. Heç şübhəsiz, bu baxımdan humanitar sahə ilə bağlı məsələlər də çox böyük əhəmiyyət kəsb edir. Dmitri Anatolyeviçin qeyd etdiyi kimi, Azərbaycanda rus dilinə, rus mədəniyyətinə çox qayğıkeş münasibət bəslənir və bu münasibətlər təkcə sözdə deyil, əməli işdə də özünü göstərir. Bəlkə də bu məsələlər geniş ictimaiyyətə həmişə məlum olmur, ola bilsin ki, biz indi piar deyilən məsələ ilə o qədər də fəal məşğul olmuruq, lakin hesab edirik ki, ən yaxşısı öz işini vicdanla və namusla görməkdir, informasiya isə hər bir halda öz oxucusunu tapacaqdır.
Mən bu dəvətə görə, adətən olduğu kimi, yenə də bütün məsələləri çox açıq, səmimi, yoldaşcasına müzakirə etməyə imkan verən şərait yaradılmasına görə Rusiya Prezidentinə bir daha təşəkkür etmək istəyirəm. Bu cür müzakirələr bizim münasibətlərimizin ruhunu və xarakterini əks etdirir. Sağ olun.
######
 |
 |
 |
 |
Bölmənin digər xəbərləri
