RƏSMİ XRONİKA
AZƏRBAYCAN PREZİDENTİ İLHAM ƏLİYEVİN ÇIXIŞI
-Hörmətli cənab mer!
Hörmətli merin xanımı!
Hörmətli dostlar, xanımlar və cənablar!
Mənim ölkənizə səfərim başa çatır. Dünən və bu gün mən olduqca fəal görüşlər keçirdim və danışıqlar apardım, vacib tədbirlərdə iştirak etdim.
Bizim Prezidentlə çox səmərəli danışıqlarımız oldu, bir çox sənədlər imzalanmışdır. Bu, bizim güclü ikitərəfli əməkdaşlığımız üçün olduqca yaxşı başlanğıcdır. Ötən ilin may ayında Koreya Respublikasının Prezidenti Azərbaycana səfər etdikdən sonra biz, bəlkə də təsəvvür etmirdik ki, münasibətlərimiz bu qədər sürətlə inkişaf etsin. Lakin hazırda biz olduqca möhkəm siyasi münasibətlərin şahidiyik. İqtisadi əməkdaşlığın genişləndirilməsinə çox ciddi maraq var. Eyni zamanda, özəl sektor səviyyəsində birgə layihələr üzrə işləmək arzusu var. Siyasi və hökumət səviyyəsində qəbul olunmuş qərarlardan asılı olmayaraq, əgər biznes dairələrinin birgə əməkdaşlığa maraqları olmasa, onda onları heç kim məcbur edə bilməz.
Bizim aramızda güclü siyasi münasibətlər var və hər iki prezidentin səfərləri bunun bariz nümunəsidir. Bir ildən az müddət ərzində Cənubi Koreyanın Azərbaycanda və Azərbaycanın Cənubi Koreyada səfirliyi açılmışdır və onlar hazırda fəaliyyət göstərir. Həmin müddət ərzində iki ölkə arasında rəsmi hökumət nümayəndə heyətlərinin qarşılıqlı səfərləri olmuşdur.
Konkret layihələrə dair bir çox anlaşma memorandumları imzalanmışdır. Onlar enerji, neft və qaz, nəqliyyat, tikinti və digər sahələri əhatə edir.
Eyni zamanda, biz bu gün Koreya-Azərbaycan biznes forumunu keçirdik. Həmin tədbir zamanı iki tərəfin işgüzar dairələri bir yerə toplaşmış, birgə işləməyə marağını ifadə etmişlər. Şirkətlər arasında bir neçə saziş və müqavilələr imzalanmışdır. Siyasi, iqtisadi və biznes amillərinin bir-biri ilə uzlaşması gələcəkdə uğurlu əməkdaşlıq üçün yaxşı zəmindir.
Sabah Pusan şəhərində nümayəndə heyətimiz Azərbaycanda həyata keçirilməsini planlaşdırdığımız layihələrin burada artıq yerinə yetirildiyini görəcəkdir. Yəni, dəniz limanlarının tikintisi və gəmiqayırma sahələri nəzərdə tutulur. Bütün bunlar münasibətlərin ciddiliyini, işbirliyinin aparılmasına olan böyük marağı və yaxın vaxtlarda həyata keçirilməsinə başlaya biləcəyimiz konkret layihələrin mümkünlüyünü nümayiş etdirir.
Yekun olaraq demək istəyirəm ki, gözəl ölkənizə səfər etməkdən çox şadam. Seulda və burada, Pusanda biz olduqca səmimi qonaqpərvərliyi hiss etdik və ümidvarıq ki, səmərəli əməkdaşlığımız möhkəmlənəcək və davam etdiriləcəkdir.
Çox sağ olun.
X X X
HU NAM ÇAK: Hörmətli Azərbaycan Respublikasının Prezidenti!
Hörmətli birinci xanım!
Xanımlar və cənablar!
Şəhərimizin bütün sakinləri adından Sizi və nümayəndə heyətinizi bir daha səmimi qəlbdən salamlayıram. Sizin Pusana səfəriniz bizim üçün böyük şərəfdir.
Azərbaycanın və Cənubi Koreyanın tarixində bir çox oxşar anlar olubdur. Hər iki xalq müstəqillik qazandıqdan sonra bütün maneələri qətiyyətlə aradan qaldırmağa qadir oldu. Ümid edirəm ki, diplomatik münasibətlərin 15-ci ildönümünə biz yeni nailiyyətlər əldə edəcəyik, dostluğumuzu gücləndirəcək və ikitərəfli əməkdaşlığımızı genişləndirəcəyik.
Ümid edirəm ki, qədim odlar yurdu olan Azərbaycan və Cənubi Koreya birlikdə Asiyada və dünyada əmin-amanlığın təmin edilməsinə daha böyük töhfə verəcəklər. İndi isə, mən ikitərəfli dostluq münasibətlərinin və ölkələrimizin inkişafı şərəfinə badə qaldırmaq istəyirəm.