AZƏRBAYCAN PREZİDENTİ İLHAM ƏLİYEVİN GİRİŞ NİTQİ
- Mən dünən və bu gün bölgədə səfərdəyəm. Dünən Qəbələ, Oğuz, bu gün isə İsmayıllı rayonunda işlərin gedişi ilə tanış oldum. Bildiyiniz kimi, ilyarım bundan əvvəl regionların sosial-iqtisadi inkişafı proqramı qəbul olunub və uğurla icra edilir. Əlbəttə ki, bu proqramda əsas məsələlər öz əksini tapıbdır. Bizim əsas istiqamətlərimiz göstərilib və rayonlar üzrə də vəzifələr bölünübdür. Ancaq eyni zamanda, həyat yerində durmur, yeni məsələlər meydana çıxır ki, bunlar da operativ qaydada öz həllini tapmalıdır. Ona görə bu zona müşavirəsində biz bu məsələləri müzakirə etməliyik.
Mən bir müddət əvvəl Şamaxı rayonunda da səfərdə idim, orada vəziyyətlə tanış olmuşam. Bu dörd rayonun dördündə də son ilyarım ərzində rəhbər işçilər dəyişildi və icra hakimiyyətinin yeni başçıları təyin edildi. Mənim yerlərdəki bütün nümayəndələrimdən tələbim odur ki, səmərəli işləsinlər, qarşıda duran vəzifələri icra etsinlər, rayonların inkişafında fəal iştirak etsinlər və insanların problemlərinin həllində fəal olsunlar.
Tanış olduğum bölgələrdə inkişaf görünür. Mən bunu xüsusən Qəbələ rayonu haqqında demək istəyirəm. Burada abadlıq-quruculuq işləri geniş vüsət alıbdır. Çünki mən bundan əvvəlki illərdə də Qəbələdə olmuşam və bu fərqi görürəm. Eyni zamanda, Qəbələdə tikilən emal müəssisələri, zavodlar, fabriklər regionun, rayonun inkişafında və Azərbaycanın iqtisadi potensialının inkişafında mühüm rol oynayacaqdır.
Şamaxıda da işlər yaxşı gedir, yeni müəssisələr işə salınır. Xatırlayıram, televizor istehsalı zavodunun açılışında iştirak etdim. İndi çox böyük qürur hissi ilə deyə bilərik ki, Şamaxıda istehsal olunan televizorlar dünyanın müxtəlif ölkələrinə ixrac edilir.
Oğuz və İsmayıllı rayonlarında inkişafın ilk əlamətləri görünməkdədir. Bu rayonlarda icra hakimiyyətlərinin başçıları may ayında təyin olunublar və cəmi üç aydır işləyirlər. Əlbəttə, üç ayda çox iş görmək olmaz. Amma artıq planlar nəzərdə tutulub və insanlarla ünsiyyətdə olarkən görürəm ki, müsbət dəyişiklikləri onlar da hiss edirlər. Bu, çox vacibdir. Yeni rəhbərlər yeni yanaşmalarla yaşamalı və işləməlidirlər. Belə olan halda, Azərbaycanın bütün regionları sürətlə inkişaf edəcəkdir. Çünki inkişaf üçün çox gözəl şərait var. Azərbaycanda gedən proseslər müsbət istiqamətdə inkişaf edir. İqtisadi inkişaf baxımından biz bu gün dünyada lider ölkəyik. Bu, təkcə makroiqtisadi göstəricilərdə deyil, insanların gündəlik həyatında da öz əksini tapır. Büdcəmiz artır, maliyyə vəziyyətimiz yaxşılaşır. Bu il və gələcək illərdə regionların inkişafına daha da çox vəsaitlər nəzərdə tutulacaqdır.
Ona görə mən istəyirdim ki, bu bölgəyə səfərimə yekun vuraraq, burada işgüzar şəraitdə fikir mübadiləsi aparaq. İcra hakimiyyətlərinin başçıları çıxış etsinlər, qarşıda duran problemlər haqqında məruzə etsinlər. Eyni zamanda, bu müşavirədə kənd təsərrüfatı, gənclər, idman və turizm nazirləri də iştirak edirlər. Bu bölgə üçün hər iki istiqamət çox vacibdir. Turizmin, kənd təsərrüfatının inkişafı bölgəyə yeni imkanlar gətirəcəkdir. İndi kənd təsərrüfatının inkişafına çox böyük diqqət göstəririk, lazımi texnika, avadanlıq alınır. Eyni zamanda, turizm obyektləri də yaranır və bu iş gələcəkdə daha sürətlə getməlidir.
İndi isə sözü Qəbələ Rayonu İcra Hakimiyyətinin başçısı Tofiq İbrahimova verirəm.
Bölmənin digər xəbərləri
