AZƏRBAYCAN PREZİDENTİ İLHAM ƏLİYEVİN GİRİŞ NİTQİ
Bildiyiniz kimi, iki il bundan əvvəl regionların sosial-iqtisadi inkişafı Dövlət Proqramı tərtib edilmişdir və o, uğurla icra edilir. Bir müddət bundan əvvəl proqramın ikiillik yekunları müzakirə olunmuşdur. Biz bir daha gördük ki, iki il ərzində regionların inkişafında böyük dəyişikliklər baş vermişdir. 340 min iş yerinin açılması, əlbəttə ki, regionlarda işsizliyin aradan qaldırılmasına xidmət edir. Eyni zamanda, yeni sənaye müəssisələrinin işə salınması da qeyri-neft sektorunun inkişafında bizə böyük dayaqdır. Beləliklə, ölkəmizin iqtisadiyyatı hərtərəfli inkişaf edir.
Artıq bu məsələ regionlarda öz həllini tapır və bildiyiniz kimi, beşillik proqram uğurla icra edilir. Artıq bunun iki ili arxadadır. Qarşıdan gələn illərdə proqramın qalan hissəsi də icra olunacaqdır. Buna şübhə yoxdur. Çünki birinci iki ilin uğurlu nəticələri bunu deməyə əsas verir.
Beləliklə, 2008-ci ildə proqram başa çatanda, şübhəsiz ki, bizim regionlarımız çox sürətlə inkişaf edəcək və beləliklə, Azərbaycanın davamlı inkişafı təmin olunacaqdır. Ondan sonrakı mərhələlərdə yəqin ki, yeni məsələlər ortaya çıxacaq və biz onları da həll edəcəyik.
Belə geniş proqramın icra olunması, əlbəttə ki, bütün strukturların yüksək fəaliyyətini tələb edir. Mən bütövlükdə məmnunam ki, bu məsələyə dair fikir birliyi var və bütün strukturlar proqramın icrasında fəal iştirak edirlər.
Eyni zamanda, bildiyiniz kimi, Bakı şəhərinin ətraf qəsəbələrinin də problemləri kifayət qədərdir və onların həlli yolları, əlbəttə ki, bizi düşündürür. Bu məqsədlə bir müddət bundan əvvəl şəhər icra hakimiyyətində mənim təşəbbüsümlə geniş müşavirə keçirildi, qəsəbələrin nümayəndələri, ağsaqqalları o müşavirədə iştirak etdilər. Mənim tərəfimdən vəzifə qoyuldu ki, qısa müddət ərzində Bakıətrafı qəsəbələrin inkişaf proqramı hazırlansın və biz bunu təsdiq edək, icra edək. Hökumətə, Bakı Şəhər İcra Hakimiyyətinə və aidiyyəti orqanlara tapşırıq verilmişdir. Artıq proqram hazırdır. Biz bu gün onu müzakirə və təsdiq edəcəyik.
Bakıətrafı qəsəbələrin problemləri tezliklə həll olunmalıdır. Burada 47 qəsəbə var və onlarda 700 min insan yaşayır. Bu, həm əhali baxımından, həm də ərazi baxımından çox böyük bir sahədir və əlbəttə ki, diqqətdən kənarda qalmamalıdır. Mən hesab edirəm ki, proqram çox dəqiqdir. Orada bütün məsələlər öz əksini tapır, proqramda konkret məsələlər və onların həlli yolları qoyulubdur. Beləliklə, çalışmalıyıq ki, iki il ərzində - 2006-2007-ci illərdə bu proqram icra olunsun və bütün sosial və iqtisadi problemlər öz həllini tapsın.
Bizim iş üslubumuz belədir: problemi müəyyən etmək, onun həlli üçün lazım olan yolları müəyyən etmək, axtarmaq və tədbirlər planı hazırlamaq. Bunu etmək üçün artıq bizim maliyyə imkanlarımız da var. Bildiyiniz kimi, Azərbaycanın büdcəsi ildə 70 faiz artır. Bu ilin büdcəsi 4 milyard dollardır. Yəqin ki, bir müddət bundan sonra biz büdcəyə dəyişikliklər edəcəyik. Çünki bizim iqtisadiyyatımız sürətlə artır və əlbəttə ki, 2007-ci ildə də büdcəmiz artacaqdır. Bütün bunlar bizə imkan verir ki, bu əlavə vəsaitləri lazım olan yerlərə yönəldək və Azərbaycanın iqtisadiyyatı inkişaf etsin, insanlar daha da yaxşı yaşasınlar.
İndi isə Bakı Şəhər İcra Hakimiyyətinin başçısı Hacıbala Abutalıbova söz verilir.
Bölmənin digər xəbərləri
