Doğrudan da bu gün çox gözəl bir gündür. Biz növbəti dəfə görüşürük və bu gün bu bölgədən olan sahibkarlara yeni kreditlər də veriləcəkdir. Bu, çox gözəl bir ənənədir. Artıq bir neçə ildir ki, Azərbaycanın dövlət büdcəsindən ayrılmış vəsait ölkəmizdə sahibkarlığın inkişafına xidmət edir. Əlbəttə, biz sahibkarlığın inkişafına geniş kontekstdə baxırıq. Sahibkarlığın təşviqi, sahibkarlar üçün əlverişli şəraitin, gözəl sərmayə mühitinin yaradılması, yersiz yoxlamalardan sizi qorumaq, Azərbaycanda sahibkarlardan ötrü sözün əsil mənasında gözəl şərait yaratmaq bizim üçün əsas, prioritet məsələlərdir. Ancaq bununla yanaşı, əlbəttə, ilkin kapital olmadan hansısa bir işi başlamaq çətindir, yaxud da ümumiyyətlə mümkün deyildir. Özü də nəzərə alsaq ki, Azərbaycan ancaq son 15 il ərzində müstəqil respublika kimi yaşayır. Azərbaycanda bazar iqtisadiyyatı prinsipləri tətbiq edilir, amma nə qədər ki, tam bərqərar olunmayıb, əlbəttə, ilkin kapital mövzusu aktuallaşır. Kreditlərin güzəştli şərtlərlə verilməsi bu məqsədi güdür. Həm bu ilkin kapital çox təmiz kapital olur, heç kimdə şübhə doğurmur, eyni zamanda, dövlət öz tərəfindən sahibkarlara köməyini göstərir.

Bildiyiniz kimi, ayrılan məbləğlər ildən-ilə artır. Bu ilin büdcəsindən təxminən 100 milyon dollar həcmində kreditlər ayrılacaqdır. Biz gələn il bunu artıracağıq. Bildiyiniz kimi, biz bu kreditlərin həcmini ildə təxminən 2 dəfə artırırıq. Bizim iqtisadi potensialımız möhkəmləndikcə, büdcəmiz artdıqca, əlbəttə, bu məqsədlərə ayrılan vəsaitlər də artacaqdır. Birinci mərhələdə biz çalışırdıq ki, ayrılan kreditlərin həcmi çox böyük olmasın, yəni çox sahibkarı əhatə etsin. Ancaq indi görürük ki, Azərbaycanın inkişafı yeni yanaşmalar tələb edir və az vəsaitlə böyük işlər görmək mümkün deyildir. Ona görə biz kreditlərin yuxarı həddini qaldırdıq. Biz başlayanda bu, təxminən 100 min dollar təşkil edirdi. İndi 3 milyona yaxındır və böyük layihələr həyata keçirmək mümkündür. Sadəcə olaraq, siz gərək öz layihələrinizi təqdim edəsiniz, onları əsaslandırasınız. Əlbəttə, texniki-iqtisadi əsaslandırma böyük layihələr üçün nəzərdə tutulmalıdır və müvafiq banklar vasitəsilə bu kreditlər veriləcəkdir. Sahibkarlığın inkişafı hər bir ölkənin inkişafında ən mühüm rol oynayır.

Bizdə özəlləşdirmə prosesi daha da sürətlə getməlidir. Özəl sektor daha da sürətlə formalaşmalıdır. İndi ümumi daxili məhsulda özəl sektorun payı 75 faizdir. Bu, yüksək göstəricidir. Amma daha da yüksək ola bilər. Çünki inkişaf etmiş ölkələrin təcrübəsinə nəzər salsaq görərik ki, harada inkişaf var, uğur var. O ölkələrdə ki, birinci növbədə, özəl sektor inkişaf edir və ikinci növbədə, kiçik və orta sahibkarlıq inkişaf edir. Dünyanın ən inkişaf etmiş ölkələrinin iqtisadiyyatında ən böyük çəkiyə malik olan məhz kiçik və orta sahibkarlıqdır. Azərbaycan bu yolu tutubdur.

Əlbəttə ki, ölkəmizdə genişmiqyaslı layihələr - ölkəmiz üçün, bölgə üçün, dünya üçün əhəmiyyətli neft-qaz layihələri, digər böyük infrastruktur layihələri həyata keçirilir. Kənd təsərrüfatında artıq böyük müəssisələr tikilir, istifadəyə verilir. Bu yaxınlarda bölgənin ən müasir, ən böyük şəkər zavodu tikilib istifadəyə verilmişdir. Bütün bunlar böyük investisiya tələb edən müəssisələrdir.

Ancaq bununla yanaşı, kiçik və orta sahibkarlığın inkişafı hər bir ölkə üçün, o cümlədən Azərbaycan üçün lazımdır. Bunun həm böyük iqtisadi mənası var, eyni zamanda, sosial mənası var. Çünki biz xalq üçün işləyirik, xalq üçün çalışırıq. Biz istəyirik ki, sahibkarlara köməyimiz, eyni zamanda, ölkədə mövcud olan sosial problemləri də həll etsin, işsizlik, yoxsulluq aradan qaldırılsın. Siz müəssisələrinizdəki işçilərə yüksək maaş verəsiniz. Azərbaycanda minimum əmək haqqı ildən-ilə qalxır və qalxacaqdır. Siz də buna hazır olmalısınız. Vaxt gələcək, Azərbaycanda minimum əmək haqqı yüksək olacaqdır. Siz də məcbur olub o minimum əmək haqqını işçilərə verməlisiniz. Bu, eyni zamanda, ölkənin sosial problemlərini həll edir. Siz də buna maraqlısınız, biz də maraqlıyıq. Biz dövlət kimi, siz sahibkarlar kimi. Çünki insanların alıcılıq qabiliyyəti artdıqca, sizin istehsal etdiyiniz məhsullar daha da sürətlə satılacaqdır. Siz öz sahələrinizi genişləndirəcəksiniz, daha da çox vergi ödəyəcəksiniz. O vergilər büdcəyə daxil olacaq, yeni infrastruktur layihələri icra olunacaqdır.

Mən bu gün Şəkidə elektrik stansiyasının tikintisi ilə tanış oldum. Böyük bir region üçün layihədir. Bütün regionu elektrik enerjisi ilə təmin edəcəkdir. Elektrik enerjisinin olmadığı yerdə heç bir müəssisəni genişləndirmək, yaratmaq mümkün deyildir. Əgər elektrik enerjisi fasilələrlə verilirsə, əgər məhdudiyyət qoyulursa, heç bir müəssisəni inkişaf etdirmək mümkün deyildir. Şəki elektrik stansiyası bütün bölgəyə xidmət edəcək, Şəki, Oğuz, Zaqatala, Qax, Balakən rayonlarını enerji ilə təmin edəcəkdir. Eyni zamanda digər bölgələrə, elektrik enerjisi daha böyük həcmdə veriləcəkdir.

Dövlət öz üzərinə düşən vəzifəni icra edir. Sahibkarlara yaxşı şərait yaradır. Bilirsiniz ki, mənim sahibkarlarla görüşlərim tez-tez olur. Həmişə mən öz dəstəyimi verirəm. Bütün icra orqanlarına, xüsusilə yerli icra orqanlarına tapşırıram ki, sahibkarlara mane olmasınlar. Əksinə, kömək etsinlər, problemlərini həll etsinlər. Çünki bizim ölkəmizin gələcəyi bunu tələb edir. Ölkəmizin inkişafı ancaq bu yolla təmin oluna bilər. Kreditlər ayrılır, dövlət tərəfindən yeni infrastruktur yaradılır. İndi magistral yollar, kəndarası yollar salınır - bütün bunlar həm də sahibkarlığa xidmət edir.

Bu diyar çox gözəl diyardır, çox zəngin, füsunkar təbiəti var. Turizmin inkişafına böyük diqqət göstərilməlidir. Amma yol yoxdursa, turizmi inkişaf etdirmək mümkün deyildir. Bu yolu siz tikə bilməzsiniz. Bu, sizin işiniz deyil, bunu dövlət etməlidir və edir. Sizə vəsait ayrılır, bundan sonra da ayrılacaqdır. Yəni sahibkarlara yaxşı şəraitin yaradılması bizim üçün əsas məsələlərdən biridir. Sizdən də tələb olunur ki, öz işinizlə, əməyinizlə ölkə iqtisadiyyatına töhfə verəsiniz. Yaxşı, müasir tələblərə cavab verən müəssisələr yaradasınız, onları yaxşı işlədəsiniz, işçilərə yaxşı əmək haqqı verəsiniz. Onların iş şəraiti yaxşı olmalıdır, məişət problemləri də həll edilməlidir. Azərbaycanda biznesin aparılması yüksək səviyyədə olmalıdır. Bunu dünyada mövcud olan meyarlar tələb edir. Biz isə istəyirik ki, Azərbaycan müasirləşsin, dünyanın ən qabaqcıl texnologiyaları ölkəmizdə tətbiq olunsun. Azərbaycanda yaradılan yeni müəssisələr dünya standartlarına cavab versin. Məhsullar daxili tələbatı ödəsin və əgər keyfiyyət imkan verərsə, xaricə də ixrac olunsun.

Azərbaycanın çox gözəl gələcəyi var. Bizim təbii sərvətlərimiz iqtisadiyyatımıza böyük dəstəkdir, böyük təkandır. Belə gözəl şəraitdən istifadə etmək lazımdır. Prezident sahibkarları dəstəkləyir. İcra orqanlarına tapşırıq vermişəm ki, heç bir müdaxilə etməsinlər, əksinə, kömək etsinlər.

Büdcəmiz ildən-ilə artır, kreditlərin həcmi də artır. Bilmirəm, hansı başqa ölkədə sahibkarlara yardım məqsədi ilə büdcədən xüsusi vəsait ayrılır. Mən bilmirəm, bəlkə haradasa var, amma hər halda, bu, kütləvi xarakter daşımır. Yerli infrastrukturun yaranması da sizə, elə bil ki, yeni şərait yaradır. Siz də bütün bu gözəl imkanlardan istifadə etməlisiniz və yeni müəssisələr, fabriklər, zavodlar tikməlisiniz. Əgər haradasa sizi sıxışdırırlarsa, sizə imkan vermirlərsə və ya süni maneələr yaradırlarsa, yaxud da kimsə biznesinizə şərik olmaq istəyirsə, siz gərək susmayasınız. Siz gərək öz səsinizi qaldırasınız, fəal olasınız, müvafiq orqanlara müraciət edəsiniz. Əgər onlardan cavab gəlməsə, mənə müraciət edin. Mən sizin arxanızda durmuşam, sizi dəstəkləyirəm və siz də bu gözəl imkanlardan istifadə etməlisiniz.

Mən şübhə etmirəm ki, Azərbaycanın davamlı iqtisadi inkişafı çox uğurlu olacaqdır. Bütün imkanlar var, regionların sosial-iqtisadi inkişafı proqramı uğurla icra edilir, sahibkarlıq inkişaf edir. Əminəm ki, yaxın gələcəkdə Azərbaycan sahibkarları daha da böyük nailiyyətlər qazanacaqlar və doğma Vətənimizi inkişaf etdirəcəklər. Bu işdə sizə uğurlar arzulayıram.

X X X

Sonra Azərbaycan Prezidenti İlham Əliyev regiondan olan 11 sahibkara kreditlərin ayrılması barədə Sahibkarlığa Kömək Milli Fondunun qərarını təqdim etdi.

Görüşdə müvəkkil bankların rəhbərləri də iştirak edirdilər.

Sahibkarlar adından çıxış edən Kifayət Niftəliyeva dövlətimizin başçısının Şəki-Zaqatala iqtisadi zonasının iş adamları ilə keçirdiyi bu görüşün ölkədə sahibkarlığın inkişaf etdirilməsi baxımından son dərəcə əhəmiyyətli olduğunu bildirdi. O, yerli sahibkarların yalnız Azərbaycan dövlətinə və şəxsən Prezidentə arxalandıqlarını, onlara göstərilən etimadı isə faydalı sahibkarlıq fəaliyyətləri ilə doğruldacaqlarını bildirdi.

Dövlətimizin başçısı görüşə yekun vurdu.