Bu səfərin əsas məqsədi ondan ibarətdir ki, biz görülən işlərə qiymət verək, onları təhlil edək və əlavə tədbirlər haqqında müvafiq tapşırıqlar və qərarlar verək. Həyat bunu tələb edir. Çünki həyat yerində durmur. Regionların sosial-iqtisadi inkişafı proqramı iki ildən çoxdur ki, qəbul edilibdir. Əlbəttə, yeni problemlər, yeni məsələlər üzə çıxır. Biz gərək bunlara operativ reaksiya verək və mövcud olan problemlərin aradan qaldırılması üçün dərhal tədbirlər görək.

Son iki il ərzində, regionların inkişafı proqramının təsdiqindən sonra region üçün əhəmiyyətli və onun gələcəyini təmin edən mühüm qərarlar qəbul edilmişdir. Onlardan biri indi artıq Şəkidə tikilən elektrik stansiyası barədədir. Regionların inkişafı proqramında stansiya nəzərdə tutulmurdu. Bu yaxınlarda bizim qəbul etdiyimiz qərara əsasən müxtəlif bölgələrdə, o cümlədən Şəkidə stansiya tikilməyə başladı. Stansiyanın tikintisi bölgənin enerjiyə olan tələbatını tam ödəyəcəkdir. Bu, gələcəyə yönəldilib, yəni bölgənin gələcək inkişaf perspektivini də müəyyən edəcəkdir.

Bilirsiniz ki, mənim göstərişimlə bir müddət bundan əvvəl demək olar ki, bütün bölgələrdə yeni tibb ocaqları tikilməyə başladı. Müxtəlif bölgələrdə tikinti artıq başlayıbdır. O cümlədən bu günlərdə həm Balakəndə böyük xəstəxananın tikintisinə başladıq, həm də Zaqatalada müasir müalicə-diaqnostika kompleksinin təməlini qoyduq. Bu, bir daha onu göstərir ki, bizim siyasətimiz sosialyönümlü siyasətdir. Əlbəttə, biz iqtisadiyyatın inkişafına çox çalışırıq və qəbul edilmiş bütün proqramların məqsədi bundan ibarətdir. Ancaq bütün bu işlərlə yanaşı, biz gərək insan amilini də unutmayaq. Çünki biz xalq üçün işləyirik, xalq üçün yaşayırıq. Xalqın da müasir tibbi xidmətə böyük ehtiyacı vardır.

Bütövlükdə, səhiyyə sisteminin müasirləşməsi, orada vəziyyətin sağlamlaşdırılması çox vacibdir. Müalicə-diaqnostika mərkəzlərinin tikintisi bu məqsədi güdür və bunu təmin edəcəkdir. Bundan əlavə, biz 2004-cü ilin fevralında proqramı qəbul edərkən məktəb tikintisi geniş şəkildə nəzərdə tutulmurdu. Ancaq son bir il ərzində Azərbaycanda 300-dən çox yeni məktəb tikilib və bu proqram davam etdirilir. Bu il də 100-dən çox məktəb tikilməlidir və biz bütövlükdə, bütün məktəb infrastrukturunu yeniləşdirməliyik. Uşaqlar müasir məktəblərdə oxumalıdırlar, lazım olan bütün avadanlıq, ləvazimat, binalarda istilik sistemi olmalıdır. Mən bunu ona görə deyirəm ki, bütün bu məsələlər regionların sosial-iqtisadi inkişaf proqramında nəzərdə tutulmurdu. Bəlkə də bunun təbii səbəbləri var, bəlkə də müəyyən subyektiv məqamlar da var. Ancaq bütün bu yeniliklər artıq reallıqdır. Bizim məqsədimiz, ilk növbədə, proqramda təsdiq edilmiş məsələləri həyata keçirmək, eyni zamanda, yeni meydana çıxan və sonradan qəbul edilmiş qərarlar əsasında lazımi infrastrukturu və obyektləri yaratmaqdır.

Ona görə mən istəyirəm ki, bugünkü müşavirədə biz hər iki məsələyə toxunaq. İlk növbədə, görülən işlərdən danışaq, gərək həm proqramda nəzərdə tutulmuş, həm də diqqətdən kənarda qalmış məsələlər həll olunsun. Mən həmişə deyirəm, əgər hər bir rayonun problemi həll olunarsa, ölkənin problemləri də həll edilər.

Bütövlükdə, demək istəyirəm ki, bölgənin inkişafı çox müsbətdir. Mən bu rayonlarda, şəhərlərdə olarkən, burada gedən abadlıq işləri ilə də maraqlanıram. Görürəm ki, səliqə-sahman var, abadlıq işləri görülür. Misal üçün, mən xüsusilə Şəki şəhərini qeyd etmək istəyirəm. Burada çox böyük abadlıq işləri görülübdür, binalar təmir olunur, yollar, gözəl parklar salınır. Bu, başqa rayonlarda da var. Amma gərək daha da sürətlə getsin.

İndi biz müasir dövlət qururuq. Bütün infrastruktur müasir standartlara cavab verməlidir. Mövcud olan binalara da əl gəzdirmək, təmir etmək lazımdır ki, abadlıq olsun. Xüsusilə nəzərə alsaq ki, bu bölgənin çox gözəl təbiəti, təbii şəraiti var. Bu gözəl təbiət özlüyündə hər bir kəndə, hər bir şəhərə yaraşıq verir. Müasir yanaşma olmalıdır. Yeni binalar gərək böyük zövqlə tikilsin, yəqin ki, istifadəsiz olan binalar sökülməlidir, daxmalar qalmamalıdır. Yəni ümumi görünüşə xələl gətirən yarımçıq tikililər, yaxud da 20-40 il bundan əvvəl tikilmiş yararsız binalar, - əlbəttə, onlar əgər istifadəsizdirsə, - sökülməlidir. Yeni infrastruktur yaradılmalıdır.

X X X

Şəki Şəhəri İcra Hakimiyyətinin başçısı NAZİM İBRAHİMOV regionların sosial iqtisadi inkişafı dövlət proqramı çərçivəsində Şəki şəhərində və rayonda görülən quruculuq işlərindən, həlli vacib olan problemlərdən, istehsal-təsərrüfat göstəricilərindən, əhalinin ümumi rifah halının və sosial həyat şəraitinin yüksəldilməsinə xidmət edən amillərdən danışdı. O dedi ki, dövlət proqramına uyğun olaraq, Şəki rayonunda 7068 daimi iş yerinin açılması nəzərdə tutulmuşdur. 2006-cı il aprelin 1-dək həyata keçirilən tədbirlər nəticəsində Şəkidə 10 min 928 yeni iş yeri açılmışdır. Onun da 3748-i daimidir ki, bu da açılması nəzərdə tutulan daimi iş yerlərinin 53 faizini təşkil edir.

Cənab Prezident, Sizin Şəkiyə olan diqqətinizə əsaslanaraq, biz bu il və qarşıdakı illərdə həyata keçirilməsi nəzərdə tutulan tədbirləri müəyyənləşdirmişik. Şəkidə dövlət universitetinin açılması, hava limanının beynəlxalq standartlara uyğun olaraq yenidən qurulması, Aşağı karvansaranın və Şəkixanovların evinin bərpası, gücü 250 ton olan şəkər çuğunduru zavodunun, 3500 yerlik şəhər stadionunun, atçılıq idmanı kompleksinin tikintisi, Aşağı Göynük kənd xəstəxanasının əsaslı təmiri, Şəki-Oğuz yolunun inşası, şəhərin mərkəzi ilə axan çayların kənarındakı istinad divarlarının bərpası və perspektivdə nəzərdə tutulan digər məsələləri planlaşdıranda biz Sizin köməyinizə, Sizin qayğınıza arxalanmışıq.

Zaqatala Rayonu İcra Hakimiyyətinin başçısı ASİF ƏSGƏROV çıxışında vurğuladı ki, rayonun sosial-iqtisadi inkişafının əsası ümummilli lider Heydər Əliyev tərəfindən qoyulmuşdur və indi Azərbaycan Prezidentinin yaxından diqqət və qayğısı sayəsində bu inkişaf daha yüksək sürətlə getməkdədir. O dedi:

- Cənab Prezident, Zaqatala rayonu ulu öndərimiz Heydər Əliyevin qayğısı və diqqəti sayəsində 1970-80-ci illərdə çox böyük iqtisadi və mədəni yüksəlişə nail olmuşdur. Uzun illər ucqar əyalət şəhəri olan Zaqatala məhz Heydər Əliyevin respublikaya rəhbərlik etdiyi dövrdə sözün əsil mənasında simasını dəyişərək, Avropayönümlü sənaye şəhərinə çevrilmişdir. O illər rayonda tütün fermentasiya zavodu, ətriyyat-kosmetika fabriki, fındıq emalı və konserv zavodları, tikiş fabriki və bir sıra sənaye müəssisələri tikilərək istifadəyə verilmişdir.

Cənab Prezident!

Bu gün Azərbaycan, təməli xalqımızın ümummilli lideri Heydər Əliyev tərəfindən qoyulmuş Yeni Azərbaycan quruculuğu konsepsiyası əsasında inkişaf edir. Məhz o sağlam təməl üzərində Sizin rəhbərliyiniz altında müasir, iqtisadi və siyasi cəhətdən güclü Azərbaycan qurulur. Həyata keçirdiyiniz uğurlu siyasət respublikamızın hər yerində olduğu kimi, Zaqatalada da öz bəhrəsini verir. Rayonumuzda genişmiqyaslı tikinti-quruculuq işləri aparılır. Birbaşa Sizin tapşırığınız və dəstəyinizlə tikilən Olimpiya İdman Kompleksi, hörmətli Mehriban xanımın qayğısı sayəsində Heydər Əliyev Fondunun vəsaiti hesabına şəhər 1 nömrəli orta məktəbinin əsaslı şəkildə yenidən qurulması və ucqar Faldarlı kəndində 240 yerlik yeni məktəb binasının tikintisi gənc nəslin sağlamlığına və təhsilinə verdiyiniz dəyərin ən parlaq təcəssümüdür.

Balakən Rayonu İcra Hakimiyyətinin başçısı ASİF MƏMMƏDOV regionların sosial-iqtisadi inkişafı Dövlət proqramına uyğun olaraq rayonda görülən tədbirlərdən, çatışmazlıqlardan, həlli vacib olan məsələlərdən danışdı.

- Möhtərəm cənab Prezident, Sizin fərmanınızla təsdiq edilən Dövlət proqramının icrası bölgələrdə iqtisadiyyatın dinamik inkişafına təkan vermişdir ki, bunun da ən bariz nümunəsi yeni açılan iş yerləridir. Dövlət proqramının qəbulundan sonra keçən dövr ərzində Balakən rayonunda 1697 daimi, 1500-dək müvəqqəti və mövsümi iş yerləri açılmışdır.

Sizin köməyinizlə 2005-ci ildə rayonda 1 elektron ATS, 5 poçt binası, 2 məktəb binası tikilmiş, əlillər və şəhid ailələri üçün 8 mənzilli yaşayış binasının inşasına başlanılmışdır. Lakin bununla belə, rayonda yeni iş yerlərinin açılması, xüsusilə abadlıq və quruculuq sahəsində xeyli iş görülməli, bir sıra problemlər öz həllini tapmalıdır.

Möhtərəm Prezident, Sizin bu bölgəyə gəlişiniz insanlarda xoş əhval-ruhiyyə yaratmaqla yanaşı, bizim fəaliyyətimizə də böyük təkan verəcəkdir. Balakənlilər adından Sizi əmin etmək istərdim ki, qısa müddət ərzində rayonda köklü dəyişikliklər ediləcəkdir. Balakənə növbəti səfərinizdə inanılmaz dəyişikliklərin şahidi olacaqsınız. Sizi əmin edirik ki, Balakənin respublikanın ən sabit, iqtisadi cəhətdən inkişaf etmiş rayonuna çevrilməsi üçün bütün imkanlarımızı səfərbər edəcəyik.

Qax Rayonu İcra Hakimiyyətinin başçısı ABBAS GÖYÜŞOV rayonun sosial-iqtisadi həyatının müxtəlif sahələrində əldə edilən nailiyyətlərdən və qarşıda duran vəzifələrdən danışdı:

- Cənab Prezident, rayonun təhsil sisteminin daha da yaxşılaşdırılması məqsədi ilə Dövlət proqramında nəzərdə tutulmuş bütün tədbirlər cari ildə tamamilə yerinə yetiriləcəkdir. 2005-ci ildə Heydər Əliyev Fondunun vəsaiti hesabına respublikada tikilən 132 orta məktəb binasından biri bizim rayondadır. Bu il də Fondun hesabına iki, dövlət vəsaiti hesabına bir, Yaponiya səfirliyinin vəsaiti hesabına bir məktəb binasının tikilməsi nəzərdə tutulmuşdur.

Zati-aliləri, rayonumuzun flora və faunasının zənginliyi, coğrafi şəraiti, tarixi və mədəniyyət abidələrinin çoxluğu turizm üçün geniş imkanlar açır. Xalqımızın ümummilli lideri Heydər Əliyevin 2002-ci il 27 avqust tarixli Sərəncamı ilə təsdiq edilmiş Dövlət proqramında nəzərdə tutulmuş istiqamətlərdən biri Şəki-Qax-Zaqatala turizm marşrutudur. Onun icrasını təmin etmək məqsədi ilə rayonumuzda sahibkarlar tərəfindən İlisu kəndi ərazisində “Uludağ”, “Yaşıl park”, “Güləşçi”, “İlisu”, “Ulu” pansionat və istirahət mərkəzlərinin birinci hissələri tikilmiş, Qaşqaçay, Ləkit, Zərnə kəndlərində də turizmin inkişafı üçün lazımi işlər görülməkdədir.

İcra hakimiyyətinin başçısı rayonda mövcud olan çatışmazlıqlardan danışaraq dedi ki, möhtərəm Prezident, şəhərə yeni su xətti çəkilmişdir. Ancaq keçən əsrin 60-70-ci illərində çəkilən yeraltı su boruları hazırda çürüdüyünə görə, əhalini içməli su ilə tam təmin edə bilmirik. Bu, həmin dövrdə çəkilmiş kanalizasiya xəttinə də aiddir.

Möhtərəm cənab Prezident, Qax kənd təsərrüfatı rayonudur, burada əhalinin əsas məşğuliyyəti bağçılıq və tərəvəzçilikdir. 2005-ci ildə 6 min tondan çox fındıq yığılmış, əhali bu sahədən 12 milyon ABŞ dollarınadək vəsait əldə etmişdir. Keçən il rayonumuzda 400 ədəd minik maşını qeydiyyata alınmışdır. Ancaq bağçılıq və tərəvəzçilikdə vəziyyət yaxşı deyil, rayonda hər il min tonlarla məhsul məhv olur. Bu sahəyə iqtisadi inkişaf, kənd təsərrüfatı nazirlikləri, digər əlaqədar qurumlar kömək etsələr, respublika, habelə xarici iş adamları cəlb olunarsa, həm işsizliyin ləğvinə, həm də əhalinin sosial-rifah halının yaxşılaşmasına çox böyük təsiri olar.

X X X

Dövlətimizin başçısı müşavirəyə yekun vurdu.