AZƏRBAYCAN PREZİDENTİ İLHAM ƏLİYEVİN NİTQİ
- Mən sizin hamınızı ürəkdən salamlayıram. Mən bu gün Qəbələdə idim. İndi də Qəbələ rayonundayam. İctimaiyyətlə müxtəlif görüşlər keçirmişəm, müxtəlif yerlərdə olmuşam. Yeni müəssisələrin, obyektlərin təməlinin qoyulması mərasimində iştirak etmişəm.
Qəbələ rayonu çox sürətlə inkişaf edir. Çox böyük abadlıq, quruculuq işləri gedir və günün birinci yarısında bu məsələlərlə məşğul idim. Günün ikinci yarısında mənim proqramımda Oğuz rayonuna səfər vardı, amma fikirləşdim ki, mütləq gərək gəlim sizin yanınıza. Nicə gəldim ki, sizinlə görüşüm, sizə öz hörmət və məhəbbətimi bildirim.
Nic çox qədim məskəndir. Bura çox zəngin tarixə malik bir yerdir. Çox şadam ki, burada da işlər yaxşı gedir.
Azərbaycanın gərək hər bir yerində, hər bir bölgəsində, hər bir rayonunda, hər bir kəndində quruculuq və abadlıq işləri getsin, insanlar daha da yaxşı yaşasınlar və Azərbaycan dövləti daha da möhkəmlənsin. Buna nail olmaq üçün biz əlimizdən gələni edirik. İqtisadi islahatlar həyata keçirilir, yeni müəssisələr, iş yerləri açılır və beləliklə Azərbaycanın bütün bölgələri sürətlə inkişaf edir. İlyarım bundan əvvəl regionların sosial-iqtisadi inkişaf proqramı qəbul edilmişdir və bu proqram uğurla icra olunur. Mən istəyirəm ki, müsbət dəyişikliklər hər bir kənddə hiss edilsin, hər bir kəndin həyatında irəliləyiş, tərəqqi olsun, bizi narahat edən əsas problemlər - işsizlik, yoxsulluq azalsın, aradan qaldırılsın. Bu, Azərbaycanın paytaxtında da, ən ucqar rayonunda da, bütün kəndlərində də olmalıdır.
Bir məsələyə də toxunmaq istəyirəm. Azərbaycanın gələcəyi üçün indi ölkədə hökm sürən sabitlik, əmin-amanlıq, asayiş bundan sonra da qorunmalıdır. Ölkəmizdə vətəndaş həmrəyliyi var. Bu, çox böyük sərvətdir, çox böyük nemətdir. Azərbaycan çoxmillətli dövlətdir. Azərbaycanda müxtəlif millətlərin nümayəndələri əsrlər boyu yaşamış, yaratmışlar. Biz hamımız bir ailəyik, hamımız qardaşıq və bu qardaşlıq hissləri daha da möhkəmlənir. Sovet İttifaqı zamanında Azərbaycan müstəqil dövlət deyildi, bir böyük ölkənin bir hissəsi idi. Bu gün isə Azərbaycan müstəqil dövlət kimi öz siyasətini özü aparır. O cümlədən milli siyasətə böyük diqqət göstərilir. Azərbaycanda yaşayan bütün xalqlar eyni hüquqa malikdir, eyni səviyyədə yaşayır və bundan sonra belə də olacaqdır. Azərbaycan Respublikasının Prezidenti kimi mən bundan sonra da əlimdən gələni edəcəyəm ki, Azərbaycanda yaşayan hər bir xalqın nümayəndəsi özünü rahat hiss etsin, özünü yaxşı hiss etsin.
Azərbaycanın ən böyük nailiyyətlərindən, sərvətlərindən biri də odur ki, bizim ölkəmizdə milli və dini baxımdan həmişə mehribanlıq olubdur. Bu zəmində heç vaxt ayrı-seçkilik, ziddiyyət olmayıbdır. Milli və dini dözümlülük bizim ölkəmizin inkişafına böyük töhfədir. Hamımız bilirik ki, heç də bütün ölkələrdə vəziyyət buna bənzər deyildir. Dünyada elə ölkələr var ki, orada yaşayan müxtəlif xalqlar bir-biri ilə yola getmir, müxtəlif dinlərin nümayəndələri ünsiyyətdə olmurlar. Onlar təcrid olunmuş vəziyyətdə yaşayırlar. Bu, həmin ölkələrin bəlası, faciəsidir. Böyük xoşbəxtlikdir ki, Azərbaycanda yaşayan bütün xalqlar ölkəmizin bütün yerlərində özünü doğma evindəki kimi hiss edir. Bu, bizim böyük nailiyyətimizdir. Biz bəlkə də buna öyrəşmişik, gündəlik həyatda buna fikir vermirik və düz də edirik ki, fikir vermirik. Çünki bu amil, bu problem Azərbaycanda yoxdur. Çünki Azərbaycanda yaşayan bütün xalqlar mənim qardaşlarımdır və Azərbaycan Respublikasının Prezidenti kimi mən Azərbaycanda yaşayan bütün xalqların təminatçısı və dövlət başçısıyam.
Mən ilk dəfədir ki, Nicdəyəm. Çox eşitmişəm, bilirəm ki, Nicin çox böyük tarixi var, çox böyük mədəniyyəti var, nailiyyətləri var, tarixi irsi çox zəngindir. Ona görə bu gün çox xoşbəxtəm ki, özüm gəlmişəm sizin yanınıza, sizinlə birlikdəyəm. Görürəm ki, burada əhval-ruhiyyə də yaxşıdır, ab-hava da yaxşıdır. Bütövlükdə rayonda görülən işlər məni çox sevindirir. Rayon rəhbərliyi yaxşı işləyir, çalışır ki, bütün problemləri həll etsin. O cümlədən, sizin də problemlərinizin həllində çox böyük işlər görür. Mən də çalışacağam ki, sizin problemlərinizi bundan sonra daha da sürətlə həll edək. Sizi narahat edən, sizə çətinlik yaradan, maneçilik törədən hansı məsələ varsa, indi mənə deyin ki, Bakıya qayıdanda bunların hamısını həll edim.
Əgər bir sözünüz yoxdursa, onda sizin hamınıza uğurlar, cansağlığı arzulayıram. Arzu edirəm ki, həmişə olduğu kimi xoşbəxt yaşayaq, Azərbaycan inkişaf etsin.
X X X
Sonra Udi Mədəniyyət Mərkəzinin rəhbəri Georgi Kuçari çıxış etdi.
Bölmənin digər xəbərləri
