AZƏRBAYCAN PREZİDENTİ İLHAM ƏLİYEVİN NİTQİ
- Hörmətli cənab Prezident! Əziz Mixail, əziz Sandra! Əziz dostlar! Biz artıq səhərdən Tbilisidəyik və əlbəttə, bir çox mühüm görüşlər keçirmişik, müzakirə edilməli olan bir çox məsələləri müzakirə etmişik. Zənnimcə, ən başlıcası budur ki, biz xalqlarımızın nə qədər yaxın olduqlarını, ölkələrimizin nə qədər sıx bağlı olduğunu, inteqrasiya etdiyini və prezidentlər arasında qarşılıqlı anlaşmanın, dostluğun, əməkdaşlığın səviyyəsinin nə qədər yüksək olduğunu bir daha yəqin etdik. Gürcüstan Prezidenti ilə tanışlığımızın müddəti çox da uzun deyildir. Lakin bu tanışlığın elə ilk günündən bizim aramızda çox səmimi münasibətlər, dostluq, qardaşlıq münasibətləri yarandı. Bu hisslər, bu münasibətlər möhkəmlənir. Harada görüşməyimizdən, hansı tədbirlərdə iştirakımızdan asılı olmayaraq, biz görüşməyə, fikir mübadiləsi aparmağa, mühüm məsələləri müzakirə etməyə həmişə vaxt tapırıq. Elə bunun özü də ölkələrimizin bir-birinə necə yaxın olduğunu bir daha göstərir. Qardaş gürcü torpağında olduğum elə ilk anlardan mənə böyük hörmət, diqqət, böyük qonaqpərvərlik göstərildiyini hiss etdim. Mənə və nümayəndə heyətimizin üzvlərinə göstərilən qonaqpərvərliyə görə, ilk növbədə, Prezidentə, habelə bütün gürcü qardaşlarımıza minnətdaram. Mən bu gün qeyd etdim ki, son vaxtlar həyata keçirdiyim bütün səfərlər arasında ən böyük nümayəndə heyəti Gürcüstana gəlmişdir. Bu da təbiidir, çünki ölkələrimiz bütün səviyyələrdə əməkdaşlıq etməlidir. İndiki halda prezidentlər ən yaxşı nümunə göstərirlər. Bütün nazirlərimiz, deputatlarımız da bu nümunəyə qoşulmalıdırlar. Daimi əlaqə olmalıdır, daimi ünsiyyət olmalıdır, bir çox cəhətdən oxşar olan sosial-iqtisadi problemlərimizin həlli zamanı beynəlxalq aləmdə səylər əlaqələndirilməlidir. Ölkələrimiz çətin inkişaf dövrü keçirir və əcdadlarımızın uğrunda qətiyyətlə və fədakarlıqla mübarizə apardıqları və itirilmiş olan müstəqillik bərpa edilmişdir, indi möhkəmləndirilir. Bizim vəzifəmiz, yeni nəslin vəzifəsi müstəqilliyi möhkəmlətmək, inkişaf etdirməkdir, onu təkmilləşdirmək və dönməz etməkdir. Odur ki, Gürcüstanın yeni rəhbərliyinin bu istiqamətdə qazandığı uğurlar bizim hamımızı, Azərbaycandakı dostlarınızı çox sevindirir. Biz regionun problemlərinə eyni mövqedən yanaşırıq. Bizi bu da birləşdirir. Bizim qayğılarımız da birdir, problemlərimiz də birdir. Ölkələrimiz təcavüzkar separatizmdən eyni dərəcədə əziyyət çəkmişlər. Əminəm ki, ölkələrimiz bu çətin vəziyyətdən çıxış yolu tapacaq, Gürcüstanın ərazi bütövlüyü, Azərbaycanın ərazi bütövlüyü bərpa ediləcəkdir. Mən Mixail Saakaşvilinin mart ayında Azərbaycana səfərini böyük səmimiyyətlə xatırlayıram. Onda azərbaycanlılar, Azərbaycan xalqı yeni gürcü lideri ilə tanış oldular. Onadək biz sənə ancaq televizorda baxırdıq, indi isə hamı görüb sevdi. İndi məni dinləyən hər bir kəs mənimlə razılaşar. Bizə çox xoşdur ki, indi ölkələrimiz və rəhbərlərimiz arasında yüksək səviyyədə qarşılıqlı anlaşma və qarşılıqlı dəstək mövcuddur. Bu gün də fikir mübadiləsi apararkən, biz əlimizdən gələn hər şeydə bir-birimizə kömək göstərmək və yardım üçün, dəstək üçün, ilk növbədə, bir-birimizə müraciət etmək arzumuzu bir daha ifadə etdik. Zənnimcə, bunu müvafiq nazirlərimiz də nəzərə almalıdırlar. Mən bu badəni Gürcüstanın tərəqqisi şərəfinə, qardaş gürcü xalqının şərəfinə qaldırmaq, Gürcüstanın bütün əhalisinə xoşbəxtlik, əmin-amanlıq arzulamaq istəyirəm. Gürcüstan Prezidentinin, əziz Mixailin şərəfinə, hörmətli Sandranın şərəfinə, əziz dostlar, sizin şərəfinizə! Sağ olun!
Bölmənin digər xəbərləri
