AZƏRBAYCAN PREZİDENTİ İLHAM ƏLİYEVİN NİTQİ
Hörmətli xanım Müşərrəf!
Hörmətli qonaqlar, xanımlar və cənablar!
Pakistan İslam Respublikasının Prezidenti, hörmətli cənab Pərviz Müşərrəf Azərbaycana səfər etmişdir. Deyə bilərəm ki, bu səfər çox uğurlu səfərdir. Biz bu səfəri çoxdan gözləyirdik və indi artıq demək olar ki, bu səfər iki ölkə arasında olan münasibətlərə çox böyük təsir göstərəcəkdir.
Pakistanla Azərbaycan müstəqil ölkələrdir. Biz bir-birimizə çox yaxınıq və siyasi sahədə əlaqələrimiz çox yüksək səviyyədədir. Qeyd etməliyəm ki, Azərbaycan öz dövlət müstəqilliyini əldə etdikdən sonra Pakistan onu tanıyan ilk dövlətlərdən biri idi. Azərbaycan xalqının ümummilli lideri Heydər Əliyev 1996-cı ildə Pakistana rəsmi səfər etmişdi və bu səfərdən sonra iki ölkə arasında münasibətlər yeni bir pilləyə qalxmışdır. Keçən ilin sentyabr ayında mən Amerika Birləşmiş Ştatlarında Birləşmiş Millətlər Təşkilatı Baş Məclisinin sessiyasında cənab Pərviz Müşərrəflə görüşmüşdüm və bu görüş çox uğurlu olmuşdur. Mən çox məmnunam ki, cənab Prezident bizim dəvətimizi qəbul edib Azərbaycana rəsmi səfərə gəlmişdir.
Apardığımız danışıqlarda bir daha əmin olduq ki, müstəqil ölkələrimizin siyasi, iqtisadi, mədəni sahələrdə əməkdaşlığı uğurla davam edir. Bu gün iki ölkə arasında çox önəmli sazişlər imzalanmışdır və ümid edirəm ki, bunlar gələcək əməkdaşlıq üçün daha gözəl şərait yaradacaqdır. Bildiyiniz kimi, Pakistanla Azərbaycan beynəlxalq aləmdə daim bir-birinə dəstək verir. Azərbaycan Pakistanı Kəşmir məsələsində dəstəkləyir və bundan sonra da dəstəkləyəcəkdir. Pakistan isə ölkəmizi Ermənistan-Azərbaycan, Dağlıq Qarabağ münaqişəsində daim dəstəkləyir və buna görə biz Pakistan xalqına, onun hökumətinə və şəxsən Prezidentə minnətdarıq. Müzakirə etdiyimiz bütün məsələlərdə bizim mövqeyimiz üst-üstə düşür.
Mən əminəm ki, bu səfərdən sonra iqtisadi, hərbi, mədəni sahələrdə, turizm sahəsində bizim əlaqələrimiz daha da genişlənəcəkdir. Əsrlər boyu bir-birinə böyük hörmətlə, rəğbətlə yanaşan xalqlarımız bundan sonra daha da yaxınlaşacaqlar.
Hörmətli cənab Prezident, Sizi Azərbaycanda bir daha salamlayıram. Sizə, xanım Müşərrəfə, bütün qonaqlarımıza uğurlar, cansağlığı, xoşbəxtlik arzulayıram.
Sağ olun!
Bölmənin digər xəbərləri
