Hörmətli xanımlar və cənablar!

İlk növbədə, mən burada kredit sazişləri imzalayan sahibkarları təbrik etmək, onlara uğurlar arzulamaq istəyirəm.

Bilirsiniz ki, Azərbaycanda aparılan iqtisadi islahatlar nəticəsində ölkə iqtisadiyyatı sürətlə inkişaf edir. Bu inkişafın təməlində xalqımızın ümummilli lideri Heydər Əliyevin rəhbərliyi altında yaradılmış ictimai-siyasi sabitlik durur. Əgər Azərbaycanda bu sabitlik olmasaydı, əlbəttə, hər hansı iqtisadi inkişafdan söhbət gedə bilməzdi.

Azərbaycanın iqtisadiyyatı son 7 il ərzində çox böyük templərlə inkişaf edir. Bunu biz də bilirik, bütün beynəlxalq maliyyə qurumları da bilir. Əlbəttə ki, bu, bizi çox sevindirir. Ölkəmiz hər cəhətdən inkişaf edir. Aparılmış iqtisadi islahatların nəticəsində, Heydər Əliyevin neft strategiyasının həyata keçirilməsi sayəsində ölkəmizə böyük həcmdə maliyyə resursu daxil olmuşdur. Bilirsiniz ki, Azərbaycanda yaradılmış Neft Fondunda böyük həcmdə vəsait toplanmışdır. Ölkəmizin valyuta ehtiyatları ildən-ilə artır. Əlbəttə, bu bizə imkan verir ki, öz iqtisadi siyasətimizi sərbəst, müstəqil şəkildə aparaq. Azərbaycanın milli maraqlarını, iqtisadi təhlükəsizliyini yüksək səviyyədə qoruyaq. Əgər belə bir imkanlar yaradılmasaydı, əlbəttə, sahibkarlara kreditlərin verilməsi də çətinləşərdi.

Bildiyiniz kimi, Azərbaycanın büdcəsi ildən-ilə artır. Bu il də keçən ilə nisbətən xeyli artmışdır. Bu artım gələn il də gözlənilir. Azərbaycanda iqtisadi sahədə əldə edilmiş bütün uğurlarla yanaşı, sosial məsələlər də öz həllini tapır. İqtisadi və sosial məsələləri bir-birindən ayırmaq da düzgün olmazdı. Çünki bunlar daim bir-biri ilə bağlıdır, bir-birindən asılıdır. Ölkədə iqtisadi vəziyyət yaxşı olarsa, əlbəttə, əhalinin sosial problemləri də yüksək səviyyədə öz həllini tapa bilər.

Biz ölkəmizi bazar iqtisadiyyatı əsasında inkişaf etdiririk və buna baxmayaraq, əgər büdcəyə nəzər salsanız, görərsiniz ki, büdcənin tam əksəriyyəti sosial məsələlərin həllinə yönəlmişdir. Bu yaxınlarda minimum əmək haqqının qaldırılması, büdcədən maliyyələşən təşkilatlarda çalışan insanların əmək haqlarının artırılması məhz bu məqsədi daşıyır. Azərbaycan xalqının rifah halının qaldırılması, insanlar, vətəndaşlar üçün daha da yaxşı şəraitin yaradılması - biz bu siyasətə sadiqik. Bu siyasət Azərbaycanda 1993-cü ildən aparılır. Xalqımızın ümummilli lideri Heydər Əliyevin təşəbbüsü ilə bu siyasət Azərbaycanda aparılmışdır və bundan sonra da aparılacaqdır.

Özəl sektorun inkişafı bizim üçün prioritet məsələdir. Mən bunu seçkilərdən əvvəl də demişdim. Seçkilərdən sonra da bəyan etdiyim təkliflər, proqramlar öz həllini tapır. Qəbul edilmiş regional inkişaf proqramı uğurla icra edilir və mənim də regionlara səfərlərimin məqsədi budur ki, yerlərdəki vəziyyətlə, mövcud problemlərlə şəxsən özüm tanış olum və lazımi qərarları verim.

Bilirsiniz ki, yeni iş yerlərinin açılması mənim seçkiqabağı proqramımın əsas istiqamətlərindən biri idi. Mən bu məsələ ilə əlaqədar öz fikirlərimi açıq şəkildə demişdim və çox şadam ki, nəzərdə tutulmuş bütün məsələlər öz həllini tapır. Seçkilərdən sonra keçən dövr ərzində Azərbaycanda 40 minə qədər yeni iş yerləri yaradılıbdır. Çox sevindirici haldır ki, onların böyük hissəsi məhz bölgələrdə açılıbdır. Bölgələrin inkişafı, Azərbaycanın bütün regionlarının inkişafı çox vacib məsələdir.

Burada Fərhad Əliyev qeyd etdi ki, belə bir tədbirin keçirilməsi üçün Quba Olimpiya İdman Kompleksi seçilmişdir. Yəni Qubada bundan böyük salon yoxdur, bundan gözəl şərait yoxdur. Bundan əvvəl Şəkidəki yarmarka da yenə Şəki Olimpiya İdman Kompleksində keçirilmişdir. Yəni mən onu demək istəyirəm ki, bölgələrə olan diqqət, münasibət mənim keçmiş fəaliyyətimdə də mühüm yeri tuturdu. Bölgələrdə yeni idman komplekslərinin tikilməsi Milli Olimpiya Komitəsinin Prezidenti kimi mənim üçün prioritet məsələ idi. İstəyirdim və bu gün də istəyirəm ki, bölgələrdə, rayonlarda istedadlı uşaqlarımız, yeniyetmələrimiz, gənclərimiz idmanla məşğul olsunlar, həm ölkəmizi dünyada təbliğ etsinlər, Azərbaycanın şöhrətini yüksəklərə qaldırsınlar, eyni zamanda, Azərbaycanda sağlam nəsil yetişsin. Mənəvi, fiziki cəhətdən sağlam gənc nəsil yetişsin. Çox sevinirəm, çox şadam ki, biz buna nail oluruq.

Mən şübhə etmirəm ki, Azərbaycanda özəl sektor bundan sonra daha da sürətlə inkişaf edəcəkdir. Bu gün ümumi daxili məhsulumuzda özəl sektorun çəkisi 70 faizdən yuxarıdır. Nəzərə alsaq ki, Azərbaycanda iqtisadiyyatın ən qabaqcıl sahəsi neft sənayesidir və bilirsiniz ki, neft sənayesi dövlət inhisarındadır, görərik ki, iqtisadiyyatın qeyri-neft bölməsi, demək olar, tam mənada özəl sektorun əsasında formalaşır.

Mən seçkilərdən sonra sahibkarlarla görüşəndə də onlara öz dəstəyimi bildirdim. Mən çox istəyirəm ki, Azərbaycanda tezliklə orta təbəqə yaransın, yerli istehsal güclənsin. İdxalı əvəz edən istehsal genişlənsin. Əlbəttə, bu, yeni iş yerlərinin açılmasına gətirib çıxaracaq, eyni zamanda, Azərbaycanda istehsal edilən malların satışından sonra büdcəyə vergi şəklində vəsait daxil olacaqdır.

Mən çox şadam ki, bu yarmarkalarda sazişlər imzalanır, kreditlər ayrılır. Nəzərdə tutulan kreditlərin həcmi gələcəkdə qaldırılacaqdır. Bu məsələ ilə əlaqədar artıq biz məsləhətləşmələr aparırıq. Bilirik ki, böyük istehsalın yaradılması üçün böyük məbləğdə kreditlərin verilməsi lazımdır. Bu sahədə işlər gedir. Bu il üçün nəzərdə tutulmuş 100 milyard manat, şübhə etmirəm ki, gələn ilin büdcəsində daha böyük səviyyəyə çatacaqdır.

Bir sözlə, mən Azərbaycanın iqtisadi inkişafı qarşısında heç bir problem görmürəm. Mən keçmişdə iqtisadi məsələlərlə şəxsən yaxından məşğul olmuşam və Azərbaycan iqtisadiyyatını çox yaxşı bilirəm. Görürəm ki, potensial haradadır, nədədir. Biz bu potensialı necə canlandırmalıyıq, necə daha da inkişaf etdirməliyik. Mən əminəm ki, yaxın illərdə Azərbaycan iqtisadi cəhətdən çox qüdrətli dövlətə çevriləcəkdir. Özü də təkcə neft amilinə görə deyil, həm də qeyri-neft sektorunun inkişafı nəticəsində. Qeyri-neft sektorunun inkişafı hamımız üçün ən başlıca məsələ olmalıdır. Neft sənayesində hər şey yolundadır. Heydər Əliyevin neft strategiyasının həyata keçirilməsi nəticəsində ölkəmizə milyardlarla dollar sərmayə qoyulubdur, böyük layihələr həyata keçirilir. Təkcə Azərbaycan üçün deyil, bütün dünya üçün çox önəmli irimiqyaslı layihələr reallaşdırılır, Bakı-Tbilisi-Ceyhan kimi nəhəng neft kəməri tikilir. Bu yaxınlarda Bakı-Tbilisi-Ərzurum qaz kəməri tikiləcəkdir. Yəni neft sahəsində qarşımızda duran bütün məsələləri artıq həll edirik. Əminəm ki, yaxın illərdə Azərbaycan xalqı onun əyani nəticələrini daha da böyük həcmdə görəcəkdir.

Qeyri-neft sektorunun inkişafı sizdən, bizdən, dövlətdən və sahibkarlardan asılıdır. Dövlətin borcu sahibkarları müdafiə etmək, onları qorumaq, onları dəstəkləmək, güzəştli kreditlər vermək, infrastruktur yaratmaqdır. Biz bunların hamısını edirik və bundan sonra da edəcəyik. Sahibkarların borcu isə yaranmış vəziyyətdən bəhrələnmək, ayrılmış kreditlərdən səmərəli istifadə etmək, yeni iş yerləri, istehsal sahələri açmaq və əlbəttə, kreditləri vaxtında dövlətə qaytarmaq və vergiləri ödəməkdir. Yəni bu qarşılıqlı fəaliyyət nəticəsində Azərbaycan iqtisadi cəhətdən çox sürətlə inkişaf edəcəkdir. Mən buna şübhə etmirəm.

İstəyirəm sizə bir daha bildirəm ki, mən sahibkarları dəstəkləyirəm və bütün vəzifəli şəxslərdən, yerli icra orqanlarından tələb edirəm ki, sahibkarlara qayğı, diqqət göstərilsin. Çox müsbət haldır ki, yerlərdə yeni iş yerlərinin açılması haqqında mənə məruzələr gəlir. Mən yerlərdə icra hakimiyyətinin başçılarından soruşanda ki, vəziyyət necədir, ilk növbədə deyirlər ki, filan qədər yeni iş yeri açılıbdır. Yəni bu, ümummilli bir məsələyə çevrilibdir. Əminəm ki, biz qarşımızda duran bütün böyük məqsədlərə çatacağıq. Azərbaycan dövlətinin buna imkanı var, siyasi iradəsi var, xalqın dəstəyi var və əlbəttə, sahibkarların həvəsi, marağı, istəyi var. Mən bu yolda hamınıza uğurlar arzulayıram. Əminəm ki, siz ayrılmış kreditlərdən səmərəli istifadə edəcək, öz həyat səviyyənizi yaxşılaşdıracaq, yeni iş yerlərinin açılması üçün çalışacaqsınız ki, biz hamımız birlikdə ölkəmizi daha da gücləndirək, zənginləşdirək, qüdrətli dövlətə çevirək.
Sağ olun.

X X X

Dövlətimizin başçısı idman kompleksinin qarşısında respublikamızın qadın voleybolçuları ilə görüşdü.

Azərbaycan Prezidenti İlham Əliyev sonra Qubada yeni istifadəyə verilmiş “Əli” Ticarət Mərkəzi ilə tanış oldu, rayon ictimaiyyəti nümayəndələrinin iştirakı ilə keçirilən mitinqdə nitq söylədi.

Prezident İlham Əliyevin məşhur Quba xalçalarının toxunduğu sexlə tanışlığı da yaddaqalan oldu. Dövlətimizin başçısına nəfis toxunmuş xalça hədiyyə edildi.

Azərbaycan Prezidenti səfərinin ilk gününün sonunda dağ yəhudilərinin yaşadığı Qırmızı qəsəbədə də oldu, sakinlərlə görüşdü, onların qarşısında çıxış etdi.

(Bunlar barədə geniş hesabat qəzetin növbəti nömrəsində dərc olunacaqdır).