-Əziz bacılar və qardaşlar! Əziz dostlar!

Sizin hamınızı ürəkdən salamlayıram, sizi öpürəm, qucaqlayıram, bağrıma basıram.

Burada qeyd olundu ki, Azərbaycanda Heydər Əliyev siyasəti yaşayır, davam edir və bundan sonra da davam edəcəkdir. Bu siyasət bütün sahələrdə öz davamını tapıbdır. Azərbaycanın iqtisadiyyatı inkişaf edir. Azərbaycan beynəlxalq aləmdə öz mövqelərini möhkəmləndirir. Azərbaycanda sosial məsələlərin həlli istiqamətində böyük addımlar atılır. Əmək haqları artırılır. Azərbaycanda böyük abadlıq işləri aparılır. Yeni iş yerlərinin açılması istiqamətində böyük tədbirlər görülübdür. Yeni müəssisələr açılır. Yeni istehsal müəssisələri yaradılır, sənaye sahələri yenidən qurulur, yaxud bərpa olunur.

Seçkilərdən keçən dövr ərzində Azərbaycanda 40 minə qədər yeni iş yeri açılıbdır. Bu da çox böyük göstəricidir. Mən seçkilərdən əvvəl Qubada olmuşam, insanlarla görüşmüşəm. Qubada Azərbaycanın ən möhtəşəm idman kompleksinin açılışında biz bir yerdə iştirak etmişdik. Sizə öz sözlərimi o vaxt demişdim, öz proqramımı açıq, aydın şəkildə bəyan etmişdim. Bu gün iftixar hissi ilə deyə bilərəm ki, dediyim bütün sözlərə, verdiyim vədlərə sadiqəm. Verdiyim bütün vədlər yerinə yetiriləcəkdir.

Mən qeyd etdim ki, Azərbaycanda Heydər Əliyev siyasəti bütün sahələrdə davam edir. O cümlədən millətlərarası münasibətlər sahəsində. Azərbaycanın müstəqilliyinin ilk illərində, əfsuslar olsun ki, bu sahədə keçmiş rəhbərlik tərəfindən böyük səhvlərə, deyə bilərəm, cinayətlərə yol verilmişdi. Ölkədə Azərbaycan xalqına, Azərbaycan cəmiyyətinə xas olmayan, milli zəmində ayrı-seçkilik siyasəti açıq formada aparılırdı. Bu siyasət Azərbaycanı uçuruma aparırdı.

Təsadüfi deyil ki, 1991-1992-ci illərdə Azərbaycanda səriştəsiz, bacarıqsız rəhbərliyin yarıtmaz fəaliyyəti nəticəsində ölkəmiz böhrana düşmüşdü. İqtisadi, siyasi böhran yaşanırdı. Ölkəmiz parçalanma ərəfəsində idi. O zaman Azərbaycan xalqı bir daha müdriklik göstərərək, öz liderinə üz tutdu, Heydər Əliyevi Azərbaycana rəhbərliyə dəvət etdi. Xalqımızın ümummilli lideri rəhbərliyə gəldi, bütün xoşagəlməz meyllərə son qoydu və dedi ki, biz hamımız azərbaycanlıyıq, bizim hamımızın bir vətəni var. O da Azərbaycandır!

Azərbaycanda yaşayan dağ yəhudiləri bizim qardaşlarımızdır, mənim qardaşlarımdır. Bu siyasət Azərbaycanda əbədi aparılacaqdır. Bizim hamımızın məqsədi, amalı ölkəmizi inkişaf etdirmək, onun hər bir bölgəsini, rayonunu, qəsəbəsini, kəndini abadlaşdırmaqdır. Mən çox şadam ki, Qırmızı qəsəbədə də abadlıq, quruculuq işləri gedir, inkişaf göz qabağındadır.Mən bu gün Qubanın digər yerlərində də insanlarla görüşlər keçirmişəm. Çox şadam ki, mənim seçdiyim, təyin etdiyim icra hakimiyyətinin başçısı burada yaxşı işləyir. Ona göstərişlər vermişəm ki, dağ yəhudilərinin yaşadığı yerlərə xüsusi diqqət göstərsin. Mən özüm də vaxtaşırı gəlib bütün məsələlərə şəxsən nəzarət edəcəyəm.Seçkilərdən əvvəl mən təbii ki, Azərbaycanın bir çox bölgəsində, o cümlədən Qubada da olmuşdum.

Amma istəyirəm biləsiniz ki, bu, sadəcə, seçki kampaniyası naminə atılmış addım deyildi. Mən mütəmadi qaydada bu məsələlərlə maraqlanıram. Azərbaycanın hər bir bölgəsi, hər bir rayonu mənim üçün əzizdir, doğmadır. Çox istəyirəm ki, bu beş ili də çox uğurla, şərəflə başa vuraq.

Azərbaycanı daha da gücləndirək, hərtərəfli inkişaf etdirək, ölkəmizi yeni bir pilləyə qaldıraq. Buna nail olmaq üçün xalq gərək bir olsun. Xalqımızda birlik vardır. Xalqımızın məqsədi birdir. Bu gün Azərbaycan xalqı Heydər Əliyev siyasətinə başqa alternativ görmür. Çünki bu siyasətə alternativ ola bilməz. Təsadüfi deyil ki, ötən il keçirilmiş seçkilərdə Azərbaycanda, o cümlədən Qubada seçicilərin tam əksəriyyəti Heydər Əliyev siyasətinə səs vermişlər. Mən buna görə sizin hamınıza minnətdaram və bu böyük etimadı doğruldacağam.

Azərbaycana vaxtaşırı xaricdən, müxtəlif ölkələrdən yəhudilər gəlirlər. Həmişə onlara deyirəm ki, Qubaya gedin, baxın. Azərbaycanın başqa bölgələrinə gedin. Qırmızı qəsəbəyə gedin, görün, Azərbaycanda yəhudilər necə yaşayırlar.

Biz özümüzü bir-birimizdən heç vaxt ayırmamışıq, heç vaxt da ayırmayacağıq. Biz hamımız Azərbaycan vətəndaşlarıyıq. Hamımızın bir Vətəni var. Bu Vətən uğrunda hamımız ölümə də getməyə hazırıq.

Dağ yəhudiləri Azərbaycanın müstəqilliyində böyük xidmətlər göstərmiş, şəhidlər vermişlər. Görkəmli yəhudi döyüşçülər, əsgərlər Azərbaycan ordusunda müstəqillik, torpaq uğrunda şəhid olmuşlar. Onların xatirəsi bizim hamımız üçün müqəddəsdir.

Əziz dostlar!Əziz bacılar və qardaşlar!

Mən çox şadam ki, bu gün sizinlə birlikdəyəm. Çox şadam ki, biz bu görüşü keçiririk. Mən belə əyani şəkildə sizə öz dərin minnətdarlığımı, hörmətimi, ehtiramımı, məhəbbətimi bildirirəm. Sizə cansağlığı arzulayıram. İstəyirəm ki, daha da yaxşı yaşayasınız, daha da yaxşı şərait olsun. Heç bir şübhə etmirəm ki, biz hamımız buna nail olacağıq. Sizə bir daha cansağlığı, ailə səadəti, xoşbəxtlik, yeni-yeni uğurlar arzulayıram. Sağ olun.

X X X

Qəsəbə sakinləri ilə daha səmimi şəraitdə söhbətini davam etdirən Prezident İlham Əliyev onların həyat şəraiti, problemləri ilə maraqlandı. Sosial-iqtisadi sahədə qarşıda duran vəzifələrin öhdəsindən birlikdə gəldiklərini vurğulayan sakinlər Azərbaycan vətəndaşları kimi, beynəlxalq yəhudi təşkilatlarının nümayəndələri ilə görüşlərində Azərbaycan torpaqlarının Ermənistan tərəfindən işğalı problemini daim diqqət mərkəzində saxladıqlarını söylədilər. Sakinlər dedilər ki, cənab Prezident, biz lobbiçiliyin yaradılmasında çox mühüm rol oynayırıq. Buraya senatorlar, Avropa Şurasından nümayəndələr, iş adamları gəlirlər. Birinci növbədə, Qarabağ məsələsini, ikinci növbədə, 907-ci maddənin tam aradan qaldırılması məsələsini diqqətə çatdırırıq.

İLHAM ƏLİYEV: Bilirəm, mən Amerikada dəfələrlə olmuşam. Hər dəfə orada olarkən yəhudi lobbisinin nümayəndələri ilə görüşmüşəm. Ümumiyyətlə, təkcə Amerikada deyil, başqa ölkələrdə də, məsələn, son dəfə Bratislavada da görüşmüşdüm. Onların Azərbaycana dəstəyi böyükdür, sağ olsunlar. Bilirəm, bu istiqamətdə sizin də fəaliyyətiniz çox müsbətdir. Bir var ki, biz deyək, bir də var ki, burada yaşayan yəhudilər desinlər. Gəlib görsünlər ki, hansı ölkədə belə bir şərait var. Gəlirlər, baxırlar, sonra mənimlə görüşürlər. Hər dəfə böyük ruh yüksəkliyi ilə ayrılırıq. Həqiqətən, Azərbaycanın böyük sərvətidir ki, burada bütün millətlər bir ailə kimi yaşayırlar.

YEVDA ABRAMOV: Azərbaycan, xüsusilə Quba Qafqazın İsveçrəsidir.

İLHAM ƏLİYEV: Quba İsveçrəni də keçibdir. Mən İsveçrədə olmuşam. İsveçrədə belə gözəl mənzərə yoxdur.

YEVDA ABRAMOV: Cənab Prezident, hamımız əlbir olub Qubanı turizm mərkəzinə çevirməliyik ki, xaricilər gəlsinlər.

İLHAM ƏLİYEV: Bəli, bəli. Biz ən böyük olimpiya kompleksini burada yaratdıq. Adı olimpiya kompleksi olsa da, əslində, bu, turizm mərkəzidir.

YEVDA ABRAMOV: Tədbirlərdə iştirak etmək üçün oraya gedirik. Xaricilər gəlirlər. Bu yaxınlarda Ərəb Əmirliklərindən gəlmişdilər.

İLHAM ƏLİYEV: İndi orada boş yer yoxdur. Mən orada idim, boş yer yox idi. Sizə uğurlar arzulayıram. Sağ olun.

YEVDA ABRAMOV: Cənab Prezident, Siz çox sağ olun ki, bu şərəfi bizə bəxş etdiniz.