Mən sizin hamınızı ürəkdən salamlayıram, sizə dərin hörmət və məhəbbətimi bildirirəm, hamınızı qucaqlayıb bağrıma basıram. Mən seçkilərdən əvvəl Qusara gələ bilməmişdim. Burada qeyd olunduğu kimi, qusarlılarla Qubada görüşmüşdüm. Ona görə də çox istəyirdim ki, seçkilərdən sonra Qusara səfər edim və bu gün mən sizinlə birlikdəyəm.

Qusar Azərbaycanın ən gözəl guşələrindən biridir. Burada yaşayan insanlar Azərbaycan dövlətçiliyinə, onun qurulmasında, müstəqilliyimizin möhkəmləndirilməsində böyük xidmətlər göstərmişlər. Onlar Azərbaycanın ərazi bütövlüyü uğrunda şəhidlər vermişlər. Buna görə də bütün Azərbaycan xalqı qusarlılara minnətdardır və mən burada bu hissləri sizə çatdırıram.

Azərbaycanın hər bir bölgəsi inkişaf edir. Bilirsiniz ki, xalqımızın ümummilli lideri Heydər Əliyev tərəfindən başlanmış iqtisadi islahatlar siyasəti ölkəmizə böyük uğurlar gətirmişdir. İqtisadiyyatımız sürətlə inkişaf edir, böyük həcmdə xarici sərmayələr gətirilir, torpaq kəndlilərə paylanmışdır. Bütün bu addımlar Azərbaycanın gələcəyi üçün möhkəm zəmin yaratmışdır. Seçkilərdən sonra bu siyasət davam etdirilir. Mən seçkilərdən əvvəl bildirmişdim ki, Heydər Əliyev siyasətinə sadiq qalacağam və onu bundan sonra da həyata keçirəcəyəm. Son doqquz ay ərzində görülən işlər bu istiqamətdə böyük addımlar atıldığını deməyə əsas verir. Regional inkişaf proqramının qəbul edilməsi, bölgələrdə yeni iş yerlərinin açılması, yerli istehsalın güclənməsi – bütün bu faktlar göz qabağındadır. Prezident seçkilərindən sonra Azərbaycan iqtisadi cəhətdən daha da güclənmişdir. Ölkədə 40 minə yaxın yeni iş yeri açılmışdır.

Dünən mənim Qubada sahibkarlarla görüşüm olmuşdur. Mən orada Qusardan olan sahibkarlarla da görüşdüm və onların istehsal etdiyi məhsullarla tanış oldum. Onlara böyük kreditlər verilibdir və bu, gələcəkdə də davam edəcəkdir. Azərbaycanın maliyyə imkanları yaxşılaşır, xəzinəmiz böyüyür. Heydər Əliyevin neft strategiyasının nəticəsi olaraq, Azərbaycana böyük həcmdə vəsait gətirilibdir. Əlbəttə, dövlətin və hökumətin başlıca vəzifəsi xalqa xidmət etməkdir. Bu baxımdan iqtisadiyyatımızı hərtərəfli inkişaf etdirmək üçün növbəti illərdə kreditlər ayrılması daha geniş vüsət alacaqdır. Bu il sahibkarlar üçün 100 milyard manat kredit nəzərdə tutulmuşdur. Gələn il bu məbləğ daha da böyük olacaqdır. Bütün bunlar ölkəmizin daha da inkişaf etməsinə, yeni iş yerlərinin açılmasına, yerli istehsal sahələrinin, fabriklərin, zavodların açılmasına imkan verəcəkdir. Beləliklə, xalqımız daha yaxşı yaşayacaqdır. Şübhə etmirəm ki, bu müsbət meyllər Qusarda da öz əksini tapacaqdır.

Burada qeyd olundu ki, mən bu yaxınlarda Qusara yeni icra hakimiyyəti başçısı təyin etmişəm. İki aydır o, burada işləyir və mən çox ümid edirəm ki, siz onun fəaliyyətini bəyənəcəksiniz. Tutduğu vəzifədən asılı olmayaraq, hər bir rəhbərin başlıca vəzifəsi xalqa, millətə xidmət etməkdir. Bu, Prezidentə də, icra hakimiyyəti başçısına da, digər vəzifəli şəxslərə də aiddir. Mən vəzifəli şəxslərə onların gördükləri işlərə, xalqın onlara olan münasibətinə görə qiymət verəcəyəm. Əgər siz ondan razı olacaqsınızsa, mən onu tərifləyəcəyəm. Əgər razı olmayacaqsınızsa, mən onu işdən çıxaracağam. Mən onu Qusara icra hakimiyyəti başçısı təyin edəndə tapşırıq verdim ki, yaxşı işləməlisən, elə etməlisən ki, camaat səndən razı olsun. Çünki yerlərdə icra orqanları yaxşı işləyəndə insanların güzəranı da, əhval-ruhiyyəsi də yaxşı olur. İctimai-siyasi durum da, ab-hava da yaxşılaşır. Şübhə etmirəm ki, mənim təyin etdiyim icra hakimiyyəti başçıları öz vəzifələrinin öhdəsindən layiqincə gələcəklər və siz onlardan razı olacaqsınız.

Biz də öz növbəmizdə, Qusara daim kömək edəcəyik. Artıq burada müəyyən işlər görülməyə başlanıbdır. Mən Qusardan gələn bütün təkliflərə baxacağam. Düzdür, regional inkişaf proqramında rayonda mühüm tədbirlər nəzərdə tutulmuşdur. Amma bu, inkişafın parametrlərini tam mənada əks etdirmir. Buraya daha böyük həcmdə vəsait qoyulacaq, yeni iş yerləri açılacaq, fabriklər və zavodlar tikiləcəkdir. Siz əmin ola bilərsiniz ki, mən Qusara xüsusi diqqət göstərəcəyəm və çalışacağam ki, növbəti beş ildə bu gözəl rayon daha da gözəlləşsin, abadlaşsın.

Bir məsələni də qeyd etmək istəyirəm. Bilirsiniz ki, Milli Olimpiya Komitəsi tərəfindən ölkəmizin müxtəlif yerlərində yeni idman obyektləri tikilib istifadəyə verilir. Bu barədə müxtəlif rayonlardan müraciətlər olubdur və onlar müsbət həll edilibdir. Qubada, Şəkidə, Naxçıvanda, Gəncədə, Lənkəranda və digər yerlərdə bu cür komplekslər tikilibdir. Buraya gələrkən mən düşündüm ki, Qusarda idmanla məşğul olmaq istəyənlərin sayı həmişə çox olubdur. Rayonda çox yaxşı idmançılar olubdur və onlar ölkəmizin idman şərəfini beynəlxalq yarışlarda dəfələrlə qorumuş, Azərbaycanın idman şöhrətini ucaltmışlar. Mən soruşdum ki, burada idmanla məşğul olmaq üçün bir yer varmı? Cavab verdilər ki, balaca bir yer vardır. Düşünürəm ki, bu kiçik də olsa, bir nöqsandır. Sizə bəyan etmək istəyirəm ki, Milli Olimpiya Komitəsi Qusarda yeni və gözəl olimpiya kompleksi tikəcəkdir. Xahiş edirəm ki, icra hakimiyyəti başçısı, ağsaqqallar, veteranlar, şəhər ictimaiyyəti birgə fikirləşsinlər və bu kompleks üçün yaxşı bir yer tapsınlar. Bu yer yaxşı görünən və münasib bir ərazidə olmalıdır. Ümidvaram ki, qısa bir zamanda biz burada dünyanın ən yüksək standartlarına cavab verən olimpiya kompleksini tikəcəyik və onun açılışını bir yerdə edəcəyik. Bu, Milli Olimpiya Komitəsi tərəfindən Qusara bir hədiyyə olacaqdır. Amma Prezident kimi mən Qusar camaatı üçün daha böyük işlər görmək istəyirəm. Burada həyat səviyyəsi yüksəlməli, insanlar daha yaxşı yaşamalıdırlar. Ona görə də bir daha demək istəyirəm ki, Qusardan gələn bütün təkliflərə diqqətlə baxılacaq və əminəm ki, qısa zaman ərzində rayon daha da inkişaf edəcək və güclənəcəkdir.

Burada yaşayan insanlar Azərbaycanın çox dəyərli vətəndaşlarıdır. Təəssüf ki, müstəqilliyin ilk illərində ölkəmizdə milli siyasətə əhəmiyyət yetirilmirdi, ya da ki, bu sahədə böyük nöqsanlara, hətta deyə bilərəm ki, cinayətlərə yol verilmişdir. Xüsusilə 1991-93-cü illərdə Azərbaycanın keçmiş rəhbərliyi tərəfindən milli zəmində aparılmış ayrı-seçkilik, ögey münasibət ölkəni çox böyük fəlakətə sürükləyirdi. Azərbaycanda müxtəlif millətlərə mənsub insanların əsrlər boyu bir ailə kimi yaşaması bizim sərvətimiz olmuşdur. Bu siyasət 1970-80-ci illərdə çox gücləndirilmişdi. Xalqımızın ümummilli lideri Heydər Əliyev bu məsələlərə daim diqqət yetirirdi və çalışırdı ki, Azərbaycanda yaşayan bütün millətlər bütün idarəçilik orqanlarında təmsil olunsunlar, onların yığcam şəkildə yaşadığı rayonlar daha da inkişaf etsin. Əfsuslar olsun ki, ölkəmizi böyük bəlalara düçar edən keçmiş hakimiyyət bu sahədə böyük səhvlər, cinayətlər etmişdir. Xalqın tələbi ilə ümummilli liderimiz Heydər Əliyev hakimiyyətə qayıtdıqdan sonra bu sahədə də böyük irəliləyiş əldə olundu. Azərbaycanda yaşayan bütün insanlar, milli mənsubiyyətindən asılı olmayaraq, ölkəmizin dəyərli vətəndaşlarıdır. Mən bu siyasətə sadiqəm və mənim vaxtımda bu zəmində heç vaxt ölkədə heç bir problem olmayacaqdır. Azərbaycanda bütün millətlər bir ailə kimi yaşayacaq və ölkəmizi inkişaf etdirəcəklər.

Əziz bacılar və qardaşlar! Mən bir daha sizi salamlayıram. Bu görüşə gəldiyinizə və mənə göstərdiyiniz hörmətə görə sizə öz minnətdarlığımı bildirmək istəyirəm. Sizi əmin edirəm ki, mən daim qusarlılarla olacağam, Qusara tez-tez gələcəyəm və biz birlikdə böyük işlər görəcəyik.

Sizin hamınızı qucaqlayıram, bağrıma basıram. Sağ olun və xoşbəxt olun.