AZƏRBAYCAN PREZİDENTİ İLHAM ƏLİYEVİN NİTQİ
Əziz dostlar!
Bu gün mənimlə görüşə gəldiyinizə görə sizə öz minnətdarlığımı bildirirəm.
Mən seçkilərdən əvvəl burada olarkən sizlərlə görüşmüşdüm. O vaxt prezident seçkiləri ərəfəsi idi. Sizə də, bütün Azərbaycan xalqına da söz vermişdim ki, əgər mənə etibar göstərilərsə, Heydər Əliyevin yolu ilə gedəcəyəm, onun siyasətini davam etdirəcəyəm. Sizə deyə bilərəm ki, seçkilərdən keçən bu dövr ərzində Azərbaycan bütün istiqamətlərdə uğurla inkişaf edir. Xarici siyasətimiz uğurla aparılır. Azərbaycan beynəlxalq təşkilatlarla öz əlaqələrini gücləndirib, dünyada daha da möhkəm mövqelərə malik olubdur. İkitərəfli formatda böyük dövlətlərlə səmərəli əlaqələrimiz var. Bu da bizə imkan verir ki, beynəlxalq aləmdə öz sözümüzü daha da qətiyyətlə deyə bilək.
Ölkə daxilində gedən proseslər də çox müsbətdir. Gördüyünüz kimi, sosial-iqtisadi inkişaf Proqramının qəbul edilməsi Azərbaycanda iqtisadiyyatın inkişafına yeni təkan vermişdir. Yeni iş yerləri sürətlə açılır və sizə deyə bilərəm ki, son müddət ərzində 70 minə qədər yeni iş yeri yaradılıbdır. Onların da 50 mini daimi iş yeridir. Bütün digər istiqamətlərdə də bizim nailiyyətlərimiz göz qabağındadır.
Ölkədə ictimai-siyasi sabitlik mövcuddur. Hamı birlik nümayiş etdirir və hamımız çalışırıq və bundan sonra da çalışacağıq ki, Azərbaycanın ən ağrılı problemi olan Ermənistan-Azərbaycan, Dağlıq Qarabağ problemini həll edək.
Mən bir il bundan əvvəl burada olarkən söz vermişdim ki, bundan sonra da mənim fəaliyyətimin əsas istiqaməti qaçqınların, məcburi köçkünlərin həyat səviyyəsinin yaxşılaşdırılması ilə bağlı olacaqdır. O günə qədər ki, torpaqlarımız azad olacaq, gərək biz qaçqınların şəraitini yaxşılaşdıraq. Bu məqsədlə müvafiq Fərmanlar, Sərəncamlar verildi və bildiyiniz kimi, yeni müasir evlər tikiləcək, qəsəbələr salınacaqdır. Bu istiqamətdə işlər aparılır. Mən söz vermişdim ki, Azərbaycanda bir dənə də çadır şəhərciyi qalmayacaq, bütün çadır şəhərcikləri ləğv ediləcək və onların əvəzinə yeni, müasir binalar, qəsəbələr, məktəblər, tibb məntəqələri tikiləcəkdir.
Keçən il mən Biləsuvar rayonunda böyük bir qəsəbənin açılışında iştirak etmişdim. Orada məskunlaşmış qaçqınlar, köçkünlər, bizim bacılarımız, qardaşlarımız yeni şəraitlə, yeni infrastrukturla təmin olunublar. Bizim məqsədimiz odur ki, ümumiyyətlə, Azərbaycanda hər bir insan yaxşı yaşasın, hər bir vətəndaş ildən-ilə daha da yaxşı yaşasın. Əlbəttə, gərək ilk növbədə, ən ağır vəziyyəti yaşayan qardaşlarımız, bacılarımız bu şəraitlə təmin olunsunlar.
Azərbaycan Dövlət Neft Fondundan vəsait ayrılıbdır və bunun hesabına yeni qəsəbələr tikiləcəkdir. Amma əlbəttə, bu məsələnin müvəqqəti həllidir. Biz əminik ki, Azərbaycanın ərazi bütövlüyü bərpa ediləcək, Qarabağ torpağı işğalçılardan azad olunacaqdır. Bu istiqamətdə də böyük işlər aparılır.
Bilirsiniz ki, biz bunu sülh yolu ilə həll etmək istəyirik. Amma onlar bunu istəmirlər. Müharibə böyük bəladır, müharibə humanitar fəlakət deməkdir. Ona görə çalışırıq ki, münaqişəni sülh yolu ilə həll edək. Nə vaxta qədər ki, buna bizim inamımız olacaq, biz sülh danışıqlarını davam etdirəcəyik. Əgər görsək ki, daha sülh danışıqlarının aparılmasının mənası yoxdur, onda Azərbaycan xalqı birləşərək öz doğma torpaqlarını bütün başqa yollarla azad edəcəkdir.
Bunu etmək üçün bir neçə amillər lazımdır və bunların da hamısı, demək olar, Azərbaycanda var. Vətənpərvərlik ruhu çox yüksək səviyyədədir. Mən çox istəyirəm ki, bizim gənc nəslimiz məhz vətənpərvərlik ruhunda tərbiyə edilsin. Azərbaycanda milli vətənpərvərlik var. Hamı iqtidarla yekdildir, hamı iqtidarın yeritdiyi siyasəti dəstəkləyir. Bu da çox gözəl amillərdən biridir.
Azərbaycanda iqtisadiyyat güclənir. Bizim iqtisadi potensialımız ildən-ilə artır. Bu da, öz növbəsində, imkan verəcək ki, bütün sahələrdə, o cümlədən ordu quruculuğunda bir çox böyük işləri görək. Sizə deyə bilərəm ki, bu istiqamətdə işlər aparılır. Bu yaxınlarda Azərbaycanın dövlət büdcəsinə əlavələr edildi və orduya, müdafiə məqsədlərinə ayrılan vəsaitin həcmi nəzərəçarpacaq dərəcədə artırıldı. Gələn ilin büdcəsində ordu quruculuğuna daha böyük həcmdə vəsait nəzərdə tutulacaqdır. Bu da imkan verəcək ki, biz ordumuzu daha da gücləndirək, daha da müasirləşdirək. Bütün bu işlər aparılır.
Mən gələcəyə böyük nikbinliklə baxıram. Mən Azərbaycanı bir neçə ildən sonra zəngin, inkişaf etmiş, çox güclü dövlət kimi görmək istəyirəm və əlimdən gələni edəcəyəm. Azərbaycan artıq bölgədə çox mühüm mövqeyə malikdir, burada aparıcı dövlətə çevrilib, bizimlə hesablaşırlar. Azərbaycanın sözü daha da dəyərlidir. Mən heç şübhə etmirəm ki, ən çətin problemə – Ermənistanın Azərbaycan torpaqlarını işğal altında saxlamasına son qoyulacaq, bu məsələni müsbət həll edəcəyik. Azərbaycan xalqı birdir, bu məsələni həll edəcəkdir. Siz öz doğma torpaqlarınıza qayıdacaqsınız, mən də gələcəyəm, sizinlə birlikdə orada olacağam.
Əziz dostlar, sizə bir daha öz dərin hörmətimi bildirirəm. Qaçqınlar, köçkünlər uzun illərdir çətin şəraitdə yaşayırlar. Biz istəyirik ki, bu şəraiti yüngülləşdirək. İstəyirik əlimizdən gələni edək ki, bu şərait daha da yaxşı olsun. Müvəqqəti olsa belə, yenə də yaxşı şəraitdə yaşayasınız. Bu istiqamətdə səylərimizi davam etdirəcəyik. Əminəm ki, bundan sonra görüşlərimiz daha da çox olacaqdır. Bilirsiniz ki, demək olar, bütün bölgələrə etdiyim səfərlərdə qaçqın-köçkünlər harada məskunlaşıbsa, onlarla görüşürəm və bundan sonra da görüşəcəyəm. Sizə cansağlığı, xoşbəxtlik, əmin-amanlıq arzulayıram. Sağ olun.
Bölmənin digər xəbərləri
