Əziz dostlar!

Bu gün çox əlamətdar bir gündür. Rumıniyanın paytaxtı Buxarest şəhərində Azərbaycan Respublikasının səfirliyinin yeni binası açılır və bu münasibətlə mən sizin hamınızı ürəkdən təbrik etmək istəyirəm.

Bir neçə ildir ki, Azərbaycanın Rumıniyada səfirliyi açılmışdır və onun fəaliyyəti çox uğurludur. Bu illər ərzində iki ölkə arasında olan əlaqələr daha da güclənmiş, yeni mərhələyə qədəm qoymuşdur.

Çox şadam ki, ümummilli liderimiz Heydər Əliyevin və Rumıniya Prezidenti İon İliyeskunun xalqlarımız arasında münasibətlərin möhkəmlənməsi sahəsindəki səyləri öz bəhrələrini verir. Mənim də Rumıniyaya rəsmi səfərim bu gün başa çatır və deyə bilərəm ki, bu səfər çox uğurlu olubdur, çoxlu mühüm sənədlər imzalanıb və geniş fikir mübadiləsi aparılıbdır. Bu səfərdən sonra qətiyyətlə deyə bilərəm ki, Rumıniya-Azərbaycan əlaqələri həm ikitərəfli formatda, həm də regional əməkdaşlıq baxımından çox sürətlə inkişaf edir. Ölkələrimiz bir-birinə çox yaxındır. Dünyada sülhün, təhlükəsizliyin təmin olunmasında Rumıniya və Azərbaycan fəal iştirak edirlər və bu amil bizi daha çox birləşdirir. Rumıniyanın Avropa və Avratlantik strukturlarına inteqrasiya siyasəti öz gözəl nəticələrini veribdir. Biz də buna çox sevinirik və bildirmək istəyirəm ki, Azərbaycan da bu yolla gedir. Ölkəmizin də siyasəti Avropa və Avratlantik strukturlarına inteqrasiyadan ibarətdir. Bu, bizim strateji seçimimizdir. Bu seçim 1993-cü ildə xalqımızın ümummilli lideri Heydər Əliyev hakimiyyətə gəldikdən sonra edilibdir və bu gün Azərbaycan dövləti və hökuməti bu siyasi xəttə sadiqdir, bu siyasəti davam etdirir.

Bir sözlə, deyə bilərəm ki, siyasi əlaqələrimiz çox yüksək səviyyədədir. Məqsədimiz ondan ibarətdir ki, iqtisadi əlaqələrimizi də yüksək səviyyəyə çatdıraq. Bunu etmək üçün bütün imkanlar vardır. İqtisadi baxımdan Rumıniya ilə Azərbaycan ən dinamik inkişaf edən ölkələrdir. Bizim iqtisadi potensialımız günü-gündən güclənir. Yeni istehsal sahələri işə salınır, yeni infrastruktur layihələri həyata keçirilir. Azərbaycanın enerji daşıyıcılarının Avropaya və ümumən dünyaya çatdırılması istiqamətində çox mühüm addımlar atılıbdır və bu sahədə iki ölkə arasında çox gözəl əməkdaşlıq mümkündür. Əminəm ki, biz buna nail olacağıq.

Hökumətlərarası birgə komissiyanın bundan sonrakı fəaliyyəti ondan ibarət olmalıdır ki, bizim iqtisadi əlaqələrimizi bütün sahələrdə daha da gücləndirsin, iş adamlarına gözəl şərait yaratsın, ümumiyyətlə, iqtisadi-ticarət əlaqələrinin inkişafında daha da fəal rol oynasın.

Humanitar sahəni əhatə edən mühüm sazişlər imzalanıbdır. Bu, Azərbaycan dövlətini, hökumətini qane edir. Çalışmalıyıq ki, bu əlaqələri bundan sonra da inkişaf etdirək və gücləndirək. Səfirliyimizə də bu işdə yeni uğurlar arzulayıram. Bu gözəl binanın açılışı münasibətilə bir daha sizin hamınızı təbrik edirəm.

X X X

Sonra Azərbaycan Prezidenti İlham Əliyev səfirliyin yeni binasının açılışında iştirak edən xarici ölkələrin diplomatik nümayəndəliklərinin rəhbərləri ilə görüşüb söhbət etdi.

Dövlətimizin başçısı jurnalistlərin suallarına cavab verdi.

SUAL: Cənab Prezident, Sizin çıxışlarınızdan da məlum oldu ki, Rumıniya səfərinizdən razı qalmısınız...

CAVAB: Bəli, razı qalmışam. Çox uğurlu səfərdir. Bizim aramızda olan qarşılıqlı anlaşma apardığımız danışıqlar əsnasında bir daha təsdiqini tapdı. Biz çox geniş fikir mübadiləsi apardıq, həm ikitərəfli, həm də regional məsələləri müzakirə etdik. Əlbəttə ki, imzalanmış sənədlər gələcək əməkdaşlıq üçün hüquqi baza yaradır. Bütün görüşlər çox uğurlu keçibdir. Mən çox razıyam. Rumıniya-Azərbaycan əlaqələri bizim üçün çox vacibdir.

SUAL: Dünənki mətbuat konfransında Rumıniya Prezidenti xatırlatdı ki, umummilli liderimiz Heydər Əliyevin vaxtında Azərbaycan qazının Rumıniyadan keçməklə Avropaya nəql olunması məsələsi qaldırılmışdı. Rumıniyanın enerji layihələrində iştirakı ilə bağlı konkret müzakirələr oldumu?

CAVAB: Biz bu məsələni müzakirə etdik. Bilirsiniz ki, Azərbaycan qazı Avropaya çatdırılacaqdır. Bu istiqamətdə önəmli addımlar atılıb. Gürcüstan və Türkiyə üzərindən Avropanın digər ölkələrinə qaz nəql olunacaqdır. Bu barədə Avropa Birliyində də müzakirlər aparılmışdır. Əlbəttə, bu baxımdan Rumıniya ilə Azərbaycan arasında da əməkdaşlıq ola bilər. Mən bu gün maraqlandım, Rumıniya ildə təxminən 5 milyard kubmetr qaz idxal edir və Azərbaycanın onu bu qazla təmin etməyə imkanı olacaqdır. Bizim “Şahdəniz” yatağından böyük həcmdə qaz çıxarılacaq və onu istənilən yerə çatdıra biləcəyik. Odur ki, Bakı-Tbilisi-Ərzurum qaz kəmərini də Bakı-Tbilisi-Ceyhan neft kəməri kimi uğurla başa çatdırmalıyıq və öz öhdəliyimizi yerinə yetirməliyik.

SUAL: Cənab Prezident, səfər zamanı Dağlıq Qarabağ münaqişəsi ətrafında da müzakirələr apardınız. Ümumiyyətlə, Rumıniyanın bu məsələ ilə bağlı mövqeyi Sizi qane edirmi?

CAVAB: Əlbəttə qane edir. Sİz dünən bu sualı Rumıniya Prezidentinə verdiniz və o da cavabında sonrakı çıxışlarında da birmənalı şəkildə dedi ki, Rumıniya bu məsələnin Azərbaycanın ərazi bütövlüyü çərçivəsində həllinə tərəfdardır. Bu, çox önəmli bəyanatdır. Bildiyiniz kimi, son müddət ərzində bir neçə dövlət başçısı birmənalı şəkildə belə bir bəyanatla çıxış etmişdir. Mənim əksər səfərlərimdə tərəf-müqabilim buna oxşar bəyanatla çıxış etmişdir. Bu, çox önəmli haldır, bu, bir də onu göstərir ki, dünyada ikili standartlara yol verilməməlidir. Bütün məsələlər yalnız beynəlxalq hüquq normaları prizmasından öz həllini tapmalıdır. Əlbəttə ki, Azərbaycanın ərazi bütövlüyü bərpa olunmalıdır.

Ermənistanda bunu nə qədər tez başa düşsələr, o qədər yaxşıdır. İndi əsas məsələ bundadır ki, BMT-nin və ATƏT-in mühüm qərarları həyata keçirilsin, bunun üçün mexanizm yaradılsın. Əfsuslar olsun ki, BMT Təhlükəsizlik Şurasının dörd qətnaməsindən biri də icra olunmur, Ermənistana qarşı bir dəfə də olsun sanksiya tətbiq edilmir. Əlbəttə, bu, dözülməz haldır. Əgər beynəlxalq hüquq mexanizmləri hazırlanarsa və tətbiq olunarsa, onda bu münaqişə daha tez öz həllini tapacaqdır.

SUAL: Cənab Prezident, Dağlıq Qarabağ məsələsi AŞPA-nın sessiyasında da müzakirə olunmuşdur. Siz sessiyanın nəticələrindən razı qaldınızmı?

CAVAB: Ermənistan-Azərbaycan, Dağlıq Qarabağ münaqişəsinə yanvar sessiyasında baxılacaqdır. Bilirsiniz ki, məruzə hazırlanıb, Terri Devis məruzəni təqdim edibdir və o mətbuatda da öz əksini tapıbdır. Bu, çox obyektiv, reallıqları əks etdirən məruzədir. Bu sessiyada da həmin məsələyə toxunuldu, müəyyən fikirlər səsləndi. Amma deyə bilərəm ki, onların hamısı bizim təməlini qoyduğumuz prinsipləri əks etdirir. Əsas məsələ o idi ki, işğal haqqında məlumatlar Avropa Şurasının sənədlərinə salınsın, Azərbaycanın ərazi bütövlüyünün pozulması barədə fikirlər öz əksini tapsın. Artıq bu, sənəddir, huquqi bazadır. Əminəm ki, müzakirə olunacaq məruzə də Ermənistanın Azərbaycan torpaqlarını işğal etdiyini bir daha göstərəcəkdir. Əlbəttə ki, müəyyən sanksiyalar da nəzərdə tutula bilər. Bəri başdan Avropa Şurasından bizim tələbimiz və istəyimiz ondan ibarət idi ki, bu münaqişəyə siyasi qiymət verilsin. Avropa Şurasının başqa mexanizmi yoxdur və biz ondan möcüzə gözləməməliyik. Amma siyasi qiymət veriləndən sonra bu, siyasi danışıqlar prosesi üçün də güclü baza olacaqdır. Deyə bilərəm ki, artıq dünyada bu münaqişə ilə əlaqədar dolğun məlumat var, Azərbaycanın haqlı olması regionda və beynəlxalq aləmdə qəbul edilir. Bizim vəzifəmiz ondan ibarətdir ki, öz siyasi iradəmizi, təzyiqi daha da gücləndirək, Ermənistanı işğalçı dövlət kimi bütün kürsülərdən ifşa edək və öz siyasi həmlələrimizi davam etdirək. Bunu Prezident də, deputatlar da, mətbuat da, hər bir Azərbaycan vətəndaşı da etməlidir. Yalnız bu təqdirdə biz istəyimizə nail olacağıq.

X X X

Prezident İlham Əliyev səfirliyin yeni binası, əməkdaşların iş şəraiti ilə yaxından tanış oldu.