AZƏRBAYCAN PREZİDENTİ İLHAM ƏLİYEVİN NİTQİ
Əziz dostlar!
Sizin hamınızı – MDBMİ-nin müəllimlərini və tələbələrini şanlı yubiley münasibətilə təbrik edirəm. Mən bu gün burada sizinlə birlikdə olmaq barədə dəvəti böyük məmnunluqla qəbul etdim. Moskvaya bu gün gəldim və elə bu gün də sizinlə birlikdəyəm.
İnstitutda təhsil illəri hər bir kəs üçün yəqin ki, ömrün ən yaxşı illərindəndir. Bu, gənclik illəridir, yetkinləşmə illəridir. Bizim dövrümüzdə, - mən bunu da mühüm hesab edirəm, - institutumuzda dostluq, qarşılıqlı yardım və qarşılıqlı anlaşma mühiti hökm sürürdü. Müəllimlərlə tələbələr arasında münasibətlər çox böyük hörmət əsasında qurulurdu. Çox yüksək tələbkarlıq vardı və bu tələbkarlığı biz hamımız öz üzərimizdə hiss edirdik, xüsusən də təhsilin ilk illərində. Bununla yanaşı, xoş münasibət, həssas münasibət vardı. Müəllimlərimizin bizə təkcə öz biliklərini deyil, həm də diplomat kimi praktiki işdə qazandıqları təcrübəni də öyrətmək arzusu vardı. Təhsillə diplomat olmağı öyrənmək kifayət qədər çətindir. Bu, elə bir peşədir ki, sən onu özünün sonrakı həyatında, karyeranda hiss etməlisən. Amma əlbəttə ki, müəllimlərimizin bizə öyrətdikləri çox böyük bünövrə idi. Ona görə də, bu imkandan istifadə edərək, ilk növbədə, institutumuzda mənə təhsil verənlərin hamısına dərin təşəkkürümü bildirmək və indi çox gərəyim olan bilikləri mənə öyrətdiklərinə görə onlara təşəkkür etmək istərdim. İnstitutumuzda müxtəlif ölkələrdən, o cümlədən SSRİ-nin bütün müttəfiq respublikalarından olan uşaqlar oxuyurdular. MDBMİ-nin məzunları bu gün Azərbaycanda bir çox məsul vəzifələrdə işləyirlər. İndiki halda mən özüm buna canlı nümunəyəm.
Bu ilin fevralında mən Moskvada olarkən böyük məmnuniyyətlə institutumuza gəldim, köhnə dostlarımla görüşdüm, dedim ki, belə görüşlərimiz hələ çox olacaqdır. Mən bu imkandan istifadə edərək, Azərbaycana dəvətimi bir daha təsdiqləmək istəyirəm.
Azərbaycan Rusiya üçün dost ölkədir. Ölkələrimiz arasında münasibətlər uğurla inkişaf edir və keyfiyyətcə tamamilə yeni səviyyəyə qalxmışdır. İndi bu münasibətlər ikitərəfli əsasda aktiv qarşılıqlı fəailyyət göstərən, istər regional məsələlərə, istərsə də dünya siyasəti məsələlərinə baxışları, əsasən, uyğun gələn tərəfdaşlar, dost ölkələr arasında olan münasibətlərdir. Mən bu münasibətlərin inkişaf etməsindən çox məmnunam. Bu münasibətlər ölkələrimizin rifahı naminə, xalqlarımızın rifahı naminə inkişaf edir. Rusiyanın və Azərbaycanın, əvvəllərdəki kimi, həmişə dost, tərəfdaş olması, beynəlxalq aləmdə daim aktiv qarşılıqlı fəaliyyət göstərməsi üçün mən öz tərəfimdən bundan sonra da var qüvvə ilə səy göstərəcəyəm.
Bu gün onu da demək mənə xoşdur ki, müxtəlif beynəlxalq tədbirlərdə keçirilmiş çoxsaylı görüşlərdə institutun bugünkü həyatı haqqında çox müsbət, tərifli rəyləri tez-tez eşitmişəm. Bu gün MDBMİ ümumdünya təhsil və elmi tədqiqat mərkəzidir və bu, ikiqat xoşdur. Bu, ömrünün 10 ildən çoxu bu institutla bağlı olmuş insan kimi mənə ikiqat xoşdur. İnstituta bu şan-şöhrəti gələcəkdə də yüksək tutmağı arzulamaq istəyirəm. Gələcəkdə də beynəlxalq aləmdə tanınmış mərkəz olaraq qalmağı arzulamaq istəyirəm. Elə bir mərkəz ki, burada müxtəlif ölkələrin nümayəndələri təhsil alırlar, müxtəlif dövlətlərdən olan tələbələr mehriban ailə şəraitində oxuyur və aralarındakı əlaqələri sonralar heç vaxt itirmirlər. Şəxsən mənim həyatımda, eləcə də bir çox həmkurs dostlarımın həyatında məhz belədir. Bəzən öz həmkurslarınla, dostunla haradasa təsadüfən görüşürsən və buna sevinirsən. Məzunlarımız harada - diplomatiya sahəsində, siyasətdə, biznesdə işləmələrindən asılı olmayaraq, uğurlar qazanırlar. Mən MDBMİ-nin gələcək bütün tələbələrinə, instituta yeni nailiyyətlər, yeni uğurlar arzulayıram, arzu edirəm ki, biz məzunlar fərəhli günlərdə də, bayram günlərində də həmişə birlikdə olaq.
Yubiley münasibətilə bir daha təbrik edirəm.
X X X
Sonra MDBMİ (U)-nun məzunları – hazırda dünyanın bir çox ölkələrində Rusiya Federasiyasının səfirləri işləyən diplomatların təbrik sözləri səsləndirildi.
Mərasim Rusiya incəsənət ustalarının konserti ilə başa çatdı.
Bölmənin digər xəbərləri
