AZƏRBAYCAN PREZİDENTİ İLHAM ƏLİYEVİN NİTQİ
Hörmətli qonaqlar, əziz dostlar!
Mən Prezident Vladimir Nikolayeviç Voronin başda olmaqla Moldova nümayəndə heyətini bir daha salamlamağıma çox şadam. Biz bu səfəri çox gözləyirdik və məmnunuq ki, səfər uğurla keçir. Biz ikitərəfli münasibətlərin, regional əməkdaşlığın mühüm məsələləri, beynəlxalq münasibətlərlə bağlı məsələlər barədə fikir mübadiləsi apardıq. Məmnunluqla deyə bilərik ki, bütün bu məsələlərdə Moldovanın və Azərbaycanın mövqeləri uyğun gəlir. Siyasi sahədə aramızda çox səmərəli əməkdaşlıq vardır. Biz beynəlxalq təşkilatlarda fəal əməkdaşlıq edirik. Moldovanın və Azərbaycanın öz ərazi bütövlüyünü bərpa etmək məsələlərində mövqeləri tamamilə üst-üstə düşür, bu mövqelər beynəlxalq hüquq normalarına da tam uyğundur. Ümidvarıq ki, beynəlxalq hüquq normaları zəfər çalacaq və dövlətlərimizin ərazi bütövlüyü bərpa ediləcəkdir.
İqtisadi əməkdaşlıq üçün çox yaxşı potensial mövcuddur. Biz bu əməkdaşlığın üstün istiqamətlərini müəyyənləşdirdik. Məlumdur ki, xalqlarımız arasında tarixən həmişə çox səmimi münasibətlər olmuşdur. Əlbəttə ki, biz bu potensialı artırmaq istəyirik, istəyirik ki, müstəqil dövlətlər olan Moldova və Azərbaycan sıx əməkdaşlıq etsin, öz aralarında sərfəli şəkildə ticarət etsin, təcrübə mübadiləsi aparsın, inteqrasiya istiqamətlərində işləsinlər. Bizi bu da birləşdirir.
Bizim strateji məqsədimiz Avropa strukturlarına inteqrasiyadır və bu sahədə qarşılıqlı yardım, səylərin əlaqələndirilməsi də çox vacibdir.
Mənə olduqca xoşdur ki, səfər çərçivəsində çoxlu mühüm saziş imzalanmışdır və mən əminəm ki, bu sazişlər əlaqələrimizin gələcək inkişafının bir çox istiqamətlərini müəyyənləşdirəcəkdir. Belə çoxsaylı sənədlərin imzalanması qarşılıqlı surətdə faydalı əməkdaşlığımızın böyük potensiala malik olduğunu da sübut edir.
Mənim üçün bu da xoşdur ki, Moldova Prezidenti Vladimir Nikolayeviç Voronin Qafqaz regionuna ilk səfərini məhz Azərbaycana etmişdir. Biz bunu yüksək qiymətləndirir və ikitərəfli əlaqələrimizin çox mühüm amili hesab edirik. Keçmişdə də bizim çox yaxşı və mehriban münasibətlərimiz olmuşdur. Azərbaycan xalqının ümummilli lideri Heydər Əliyev ötən illərdə dəfələrlə Moldovada olmuş və həmişə bu ölkəyə, onun xalqına çox səmimi münasibət bəsləmişdir. Heydər Əliyevi 1970-80-ci illərdə Azərbaycanda işlədiyi dövrdə də, Moskvada çalışdığı vaxtlarda da bu respublika ilə çox səmimi münasibətlər birləşdirirdi. O, müstəqil Azərbaycanın rəhbəri kimi də, əlbəttə, ikitətərəfli münasibətlərimizə böyük diqqət yetirirdi. Biz Azərbaycanda bu ənənəni və onun siyasətini bütün istiqamətlərdə, o cümlədən ikitərəfli münasibətlərimizdə davam etdiririk.
Mən əminəm ki, Moldova Prezidentinin səfəri və imzalanmış sənədlər, habelə ikitərəfli əlaqələrimizdə mühüm element olacağına ümid bəslədiyimiz hökumətlərarası komissiyanın fəaliyyəti ölkələrimizin bir-birinə daha da yaxınlaşmasına kömək edəcəkdir. Bizim ümumi vəzifələrimiz, ümumi prioritetlərimiz, regiondakı vəziyyətə və ikitərəfli əlaqələrimizə ümumi baxışlarımız vardır.
Mən bu badəni Moldova xalqının, Moldovadan gəlmiş dostlarımızın, Moldova Prezidenti Vladimir Nikolayeviç Voroninin sağlığına qaldırmaq istəyirəm.
Bölmənin digər xəbərləri
