AZƏRBAYCAN PREZİDENTİ İLHAM ƏLİYEVİN NİTQİ
- Əziz dostlar!
Əziz qonaqlar!
İcazə verin, sizi Azərbaycanda bir daha salamlayım. Şəhərimizdə, ölkəmizdə İTAR-TASS günlərinin keçirilməsi çox əlamətdar hadisədir.
Bu gün biz təxminən saat yarım ərzində birlikdə olduq və yaxşı, çox açıq dialoq keçirildi, hər kəs öz fikrini və təəssüratını, öz münasibətini söyləyə bildi. Bu, belə görüşlərin, daimi əlaqələrin, qarşılıqlı ünsiyyətin, səfərlərin nə qədər vacib olduğunu göstərdi. Bütün bunlar qarşılıqlı anlaşma üçün çox yaxşı ab-hava yaradır, xalqlarımızın və ölkələrimizin yaxınlaşması məqsədlərinə xidmət edir.
Bu gün ölkələrimiz arasında münasibətlər çox müsbət şəkildə və müxtəlif istiqamətlərdə inkişaf edir. Biz əməkdaşlığımızın iqtisadiyyatda da, energetikada da, siyasi dialoqda da, habelə, təbii ki, mədəni sahədə də çox yaxşı nəticələr verdiyini görürük. İstər ictimai rəyin formalaşmasında, istərsə də real vəziyyətin geniş oxucu, tamaşaçı, dinləyici dairəsinə çatdırılmasında kütləvi informasiya vasitələrinin rolu hədsizdir.
Ona görə də Rusiya kütləvi informasiya vasitələri nümayəndələrinin Azərbaycana hər bir səfəri ölkəmizin necə yaşadığını görmək üçün daha bir imkandır, habelə fikir mübadiləsi aparmaq və ünsiyyətdə olmaq üçün daha bir fürsətdir.
Bu gün böyük bir nümayəndə heyətinin Azərbaycanda olması mənim üçün çox xoşdur. İndi bu nümayəndə heyətinin üzvləri arasında öz dostlarımı, çox sevdiyim, hörmət bəslədiyim, çoxdan fəal ünsiyyətdə olduğum adamları görmək mənim üçün olduqca xoşdur. Odur ki, hər belə görüş mənim üçün çox vacib və qiymətlidir.
Mən sizin hamınızı ölkəmizdə bir daha salamlamaq istəyirəm. Görüşümüz zamanı söylədiklərimi bir daha demək istəyirəm ki, siz dost ölkəyə, keçmişdə bizi birləşdirmiş yaxşı nə varsa, hamısını qiymətləndirən və xatırlayan ölkəyə, ənənələrə çox qayğı ilə ehtiram bəsləyən və onları qoruyub saxlayan ölkəyə gəlmisiniz.
Bu gün, iki müstəqil dövlət kimi Rusiyanın və Azərbaycanın beynəlxalq aləmdə və ikitərəfli səviyyədə geniş qarşılıqlı fəaliyyət göstərdiyi bir vaxtda əlaqələr, görüşlər və müzakirələr xüsusi əhəmiyyət və xüsusi vaciblik kəsb edir.
Bilirəm ki, siz hamınız çox yorulmusunuz, bu gün səhər tezdən çox gərgin gününüz olub və sabah çoxlu tədbir olacaqdır, ona görə də vaxtınızı çox almaq istəmirəm.
Bu badəni sizin hər birinizin sağlığına və firavanlığına qaldırıram. Qoy sizin həyatınızda, işinizdə hər şey yaxşı olsun, dostlarınızın yanına tez-tez gələsiniz və ölkəmizə səfər etməyə imkanınız tez-tez olsun.
Bütün qonaqlarımızın şərəfinə, bizim sevimli İTAR-TASS-ın şərəfinə! Sizə ən gözəl nemətlər, firavanlıq və uğurlar arzulamaq istəyirəm. Sizin sağlığınıza!
Bölmənin digər xəbərləri
