AZƏRBAYCAN PREZİDENTİ İLHAM ƏLİYEVİN NİTQİ
- Haradasa bir ay bundan əvvəl Bakının kənd və qəsəbələrinin inkişafına dair geniş müşavirə keçirildi. Bildiyiniz kimi, artıq iki ildir ki, Azərbaycanda regional inkişaf proqramı həyata keçirilir və demək olar, bütün rayonlarda geniş quruculuq-abadlıq işləri gedir. Həm yollar, qaz xətləri çəkilir, elektrik stansiyaları tikilir, həm də müvafiq infrastruktur yaradılır. O cümlədən Azərbaycanın müxtəlif şəhər və rayonlarında yeni müalicə diaqnostika mərkəzləri inşa edilməyə başlanmışdır. Belə olan halda, mən fikirləşdim ki, biz regionları bu proqramla əhatə etdik. Ancaq Bakının kənd və qəsəbələri elə bil ki, kənarda qaldı. Məhz bu məqsədlə bir ay bundan əvvəl müşavirə keçirildi, konkret tapşırıqlar verildi. İndi geniş inkişaf proqramı işlənib hazırlanır. Ümid edirəm ki, gələn ilin yanvar ayında bu proqram hazır olacaq və biz onu təsdiq edəcəyik.
Beləliklə, Bakı kəndlərinin bütün tələbatları ödəniləcəkdir. Yeni yollar salınacaq, müalicə mərkəzləri, sağlamlıq mərkəzləri, məktəblər, elektrik stansiyaları tikiləcək, qaz xətləri çəkiləcək, su təchizatı yaxşılaşacaqdır. Yəni biz bu məsələlərə kompleks şəkildə yanaşırıq. Artıq bu proqramın ilkin addımı atıldı. Baxmayaraq ki, proqram hələ rəsmən təsdiq olunmayıb, mən hesab etdim ki, biz yeni il ərəfəsində bu təməlqoyma mərasimini keçirək və yeni Sağlamlıq Mərkəzinin tikintisinə təkan verək. Bu gün də bunu etdik. Mən ümid edirəm ki, çox qısa müddət ərzində burada gözəl Sağlamlıq Mərkəzi tikilib istifadəyə veriləcəkdir. İnsanlar burada çox yüksək xidmət alacaqlar və bu, Zabrat qəsəbəsi üçün böyük məna, əhəmiyyət kəsb edən bir mərkəz olacaqdır.
İndi Azərbaycanda inkişaf sürətlə gedir. Biz bütün səylərimizi iqtisadiyyatın möhkəmlənməsinə yönəltmişik və 2005-ci ilin yekunları onu göstərir ki, iqtisadiyyatımız bu il ərzində çox sürətlə artıbdır. Əlbəttə, bununla yanaşı, əlavə imkanlar yaranır, əlavə maliyyə vəsaiti əldə edilir. İlk növbədə, biz bu imkanlardan istifadə edib ölkəmizin çox güclü sosial infrastrukturunun yaranmasına çalışmalıyıq. Xəstəxanalar, məktəblər, yollar, elektrik, qaz, su təchizatı - yəni insanları narahat edən məsələlər bunlardır. Mən şübhə etmirəm ki, biz buna nail olacağıq. Çünki bu günə qədər qəbul edilmiş bütün proqramlar həyatda öz əksini tapır. Maaşlar, pensiyalar artırılır, gözəl binalar, xəstəxanalar, məktəblər tikilir. Hesab edirəm ki, bu gün bu təməlqoyma mərasiminin keçirilməsi ilə Bakı kəndlərinin, qəsəbələrinin yeni inkişaf mərhələsi başlandı.
Mən sizin hamınızı bu münasibətlə ürəkdən təbrik edirəm. Arzu edirəm ki, yeni ildə hər şey yaxşı olsun, heç kim xəstələnməsin, hamı sağlam olsun. Amma xəstələnəndə də hamı bilməlidir ki, burada gözəl tibb ocağı var və oraya müraciət etmək olar.
Mən bu fürsətdən istifadə edib, sizi qarşıdan gələn Yeni il bayramı münasibətilə təbrik etmək istəyirəm. Eyni zamanda, dekabrın 31-i Dünya azərbaycanlılarının həmrəyliyi günüdür. Sizi bu münasibətlə də təbrik edirəm. Sizə cansağlığı, uğurlar arzulayıram. Sağ olun.
X X X
Prezident İlham Əliyevin çıxışını böyük diqqətlə dinləyən və hərarətli alqışlarla qarşılayan sakinlər onlara göstərilən diqqət və qayğıya görə dövlətimizin başçısına dərin minnətdarlıqlarını bildirdilər.
Bölmənin digər xəbərləri
