AZƏRBAYCAN PREZİDENTİ İLHAM ƏLİYEVİN NİTQİ
- Əziz dostlar, bacılar və qardaşlar!
Bu gün çox gözəl bir gündür. Bu gün Zabrat qəsəbəsində yeni məktəbin təməl daşı qoyulur. Eyni zamanda, bir qədər bundan əvvəl yeni Sağlamlıq Mərkəzinin təməl daşı qoyulmuşdur. Bunlar çox böyük hadisələrdir. Hesab edirəm ki, Zabratın gələcək inkişafına çox güclü təkan verəcək hadisələrdir.
Noyabrın 2-də Bakı Şəhəri İcra Hakimiyyətində geniş müşavirə keçirilmişdir. Bakının kənd və qəsəbələrinin inkişaf proqramı müzakirə olunmuşdur. İndi artıq inkişaf proqramının ilkin addımları atılır. Baxmayaraq ki, bu proqram hələ rəsmən təsdiqlənməyib, biz bu gün bunun ilkin addımlarını atdıq.
Mən xatırlayıram, o müşavirədə Zabratdan olan ağsaqqal demişdi ki, Zabratda 4 məktəb var. Sonra öyrəndim ki, onların vəziyyəti o qədər də yaxşı deyildir. İndi o məktəblərə də baxmaq, təmir etmək lazımdır. Dedi ki, 4 məktəb var, onların hamısı yolun bir tərəfindədir. Ancaq, haradasa, 20 mindən çox insan yolun bu biri tərəfində yaşayır və uşaqlar məktəbə gedəndə gərək o magistral yolu keçsinlər. Bu da onların həyatı və sağlamlığı üçün təhlükəlidir. Mən dərhal göstəriş verdim, məsələyə baxdılar və bu gün burada yeni məktəbin tikintisi başlanır.
Biz insanları narahat edən məsələlərə operativ qaydada baxırıq. Haradan bir siqnal var, haradan bir müraciət var, harada ədalətsizlik var - dərhal bütün bu məsələlərə reaksiya verilir. Belə də olmalıdır. Əhalini narahat edən məsələlər öz həllini ilk növbədə tapmalıdır.
Biz indi yeni inkişaf dövrünü yaşayırıq. Azərbaycanda iqtisadi inkişaf, sosial inkişaf çox sürətlə gedir. Belə olan halda, ilk növbədə, biz diqqətimizi əhalini narahat edən problemlərə yönəltməliyik. Tibb məntəqələri, sağlamlıq mərkəzləri, yeni məktəblər, sosial infrastruktur, mədəniyyət ocaqları, yollar, elektrik stansiyaları, qaz təchizatı, elektik enerjisi təchizatı o məsələlərdir ki, insanlar gündəlik həyatda bunlarla üzləşirlər. Mən istəyirəm ki, Azərbaycanda bu sahədə heç bir problem olmasın. Bunu etmək üçün kifayət qədər imkanlar var. İlk növbədə, Azərbaycanda aparılmış iqtisadi islahatlar bizim maddi vəziyyətimizi xeyli yaxşılaşdırır.
Gələn il Azərbaycan büdcəsi təxminən 4 milyard dollara bərabər olacaqdır. Azərbaycanda minimum əmək haqqı ildə iki dəfə qaldırılır, orta aylıq əmək haqqı artıq müəyyən səviyyəyə çatıbdır. Əlbəttə, gərək biz çalışaq ki, bunu artıraq. Amma bütün sosial məsələlərin həllinin təməlində iqtisadi islahatlar və iqtisadi addımlar dayanır. Əgər imkan olmasa, əgər ölkəyə valyuta gəlməsə, bizim heç bir planımız həyata keçə bilməz.
Azərbaycanın gələcək inkişafında çox böyük rol oynayacaq, xalqımızın ümummilli lideri Heydər Əliyevin adını daşıyan Bakı-Tbilisi-Ceyhan neft kəmərinin tikintisindən sonra ölkəmizə böyük həcmdə maliyyə vəsaiti gələcəkdir. Bu vəsaitdən məharətlə istifadə ediləcək, insanları narahat edən bütün məsələlər - yollar, məktəblər, xəstəxanalar, elektrik stansiyaları və başqa məsələlər öz həllini tapacaqdır.
Təsadüfi deyil ki, biz Bakı kəndlərinin inkişaf proqramını məhz Sağlamlıq Mərkəzinin və məktəbin təməl daşlarının qoyulması ilə başlayırıq. Məktəb savad, bilik deməkdir.
Mən çox istəyirəm ki, Azərbaycan gəncləri bilikli olsunlar, savadlı olsunlar. Çünki müasir dünyada bilik, savad, ümumi səviyyə hər şeyi həll edir. Həyatda yaxşı işlə təmin olunmaq üçün, öz yerini möhkəm tutmaq üçün ilk növbədə, bilik, savad olmalıdır. Ona görə Azərbaycanda indi geniş məktəb tikintisi proqramı başlanmışdır. Təkcə 2005-ci ildə Azərbaycanda 130 məktəb tikilmişdir. Gələn il də məktəblərin tikintisi nəzərdə tutulur. Çünki Azərbaycanda 4500-dən çox məktəb var. Onların bir çoxu artıq yararsız vəziyyətdədir. Harada təmirə ehtiyac var, təmir olunacaq, harada yeni məktəb tikilməlidir, yenisi tikiləcəkdir. Mənə verilən məlumata görə, bəzi məktəblərdə uşaqlar 3-4 növbə ilə təhsil alırlar. Bu, dözülməz bir haldır. Amma bu da təbii bir məsələdir. Çünki uzun illər ərzində Azərbaycanda məktəb tikintisi sürətlə getmirdi. Azərbaycanda əhalinin sayı artır və yeni məktəblərin tikintisinə böyük ehtiyac var.
Mən çox şadam ki, bu gün sizinlə birlikdəyəm. Çox şadam ki, bu gözəl mərasimdə iştirak edirik. Bu, bir daha onu göstərir ki, bizim bütün qərarlarımız, bütün planlarımız həyatda öz əksini tapır. Harada ki, məsələ qoyulur, proqram müəyyən edilir, o, mütləq və mütləq icra olunmalıdır. Bu, bizim işimizin başlıca şərtidir. Verilən hər bir söz, hər bir vəd, elan edilmiş hər bir proqram həyatda mütləq öz əksini tapmalıdır. Bu günə qədər qəbul edilmiş bütün proqramlar çox konkret məna daşıyır. O proqramlarda heç bir şüar yoxdur, heç bir populist vəd yoxdur, reallığı əks etdirməyən heç bir məqam yoxdur. Bu, həqiqətən, bizim iş prinsipimizdir. Harada ki, proqram nəzərdə tutulub, o, mütləq icra olunmalıdır, onun çox ciddi nəzarət mexanizmi var və vaxtında icra edilməlidir.
Bax, bu gün təməl daşını qoyduğum Sağlamlıq Mərkəzi, haradasa, may-iyun ayında hazır olacaqdır. Məktəb, - bu gün onun təməl daşını qoyuruq, - sentyabr ayında qapılarını açmalıdır və ümid edirəm ki, özüm şəxsən gəlib bu məktəbin açılışında iştirak edəcəyəm. Bu, onu göstərir ki, Azərbaycan inkişaf edir, Azərbaycan zənginləşir. Düzdür, problemlər çoxdur, işsizlik, yoxsulluq, digər problemlər. Amma onlar öz həllini tapır və tapmalıdır.
Mən ümid edirəm ki, 2006-cı il də Azərbaycan üçün uğurlu olacaqdır. 2006-cı ildə qarşımıza qoyduğumuz bütün məsələlər, proqramlar, planlar həyatda öz əksini tapacaqdır, Azərbaycan daha da inamla irəliyə gedəcəkdir.
Mən məktəbin təməl daşının qoyulması münasibətilə sizi bir daha ürəkdən təbrik edirəm. Dünya azərbaycanlılarının həmrəyliyi günü və qarşıdan gələn Yeni il bayramı münasibətilə təbrik edirəm. Sizə uğurlar, cansağlığı, xoşbəxtlik arzulayıram. Sağ olun.
(Dövlətimizin başçısının nitqi diqqətlə dinlənildi və alqışlarla qarşılandı)
X X X
Sakinlər, təhsil işçiləri Azərbaycan Prezidentinə yaxınlaşaraq, Bakının kənd və qəsəbələrinə dövlət səviyyəsində diqqətin artırılmasına razılıqlarını vurğuladılar, ulu öndər Heydər Əliyevin xidmətlərini məmnuniyyətlə xatırlayaraq, onun müdrik siyasətini uğurla davam etdirən Prezident İlham Əliyevi hər zaman dəstəkləyəcəklərini bildirdilər. Dövlətimizin başçısını xalqımızın həmrəyliyi günü və Yeni il münasibətilə ürəkdən təbrik etdilər.
Bölmənin digər xəbərləri
