Hörmətli qonaqlar!

Əziz dostlar!

Bu gün biz Azərbaycanda Rusiya İlini açırıq. Mən bu əlamətdar hadisə münasibətilə hamımızı səmimi qəlbdən təbrik etmək istəyirəm. Əminəm ki, Azərbaycanda Rusiya İli uğurla keçəcəkdir. Bu il ərzində ölkələrimiz və xalqlarımız daha da yaxınlaşacaq, bir-birimizi daha yaxşı tanıyacaq, müxtəlif istiqamətlərdə daha fəal əməkdaşlıq edəcəyik. Beləliklə, çalışacağıq ki, həm Rusiya, həm də Azərbaycan gələcəkdə də yaxşı qonşular, xeyirxah dostlar və tərəfdaşlar olaraq qalsınlar. Bu, bizim mənafelərimizə uyğundur.

Ölkələrimizi və xalqlarımızı ümumi tarix birləşdirir və ənənəvi dostluq, mehriban qonşuluq və qardaşlıq münasibətləri indi davam edir, inkişaf edir və dərinləşir.

Siyasi səpkidə ölkələrimiz arasında həm regional əməkdaşlıq məsələlərində, həm də beynəlxalq məsələlərdə çox aktiv qarşılıqlı fəaliyyət mövcuddur. Biz müxtəlif beynəlxalq təşkilatlarda fəal əməkdaşlıq edir və bir-birimizi dəstəkləyirik. Əlbəttə, ikitərəfli əsasda da əməkdaşlığın çox möhkəm bazası var.

Biz bu fəal siyasi dialoqun davam etdirilməsini istəyirik. Bu birgə səylərin nəticəsidir ki, indi biz Rusiya ilə Azərbaycan arasında münasibətlərdən strateji tərəfdaşlıq münasibətləri kimi danışırıq. Bax, siyasi münasibətlərin belə möhkəm bazası bütün digər sahələrdə də əlaqələrin inkişafına təkan verir.

Bu gün bu salona gəlməzdən əvvəl biz Vladimir Vladimiroviçlə birlikdə Rusiya istehsalçılarının Azərbaycanda açılmış sərgisinə getdik. Səmərəli iqtisadi əməkdaşlığın potensialının nə qədər böyük olduğunu bir daha yəqin etdik. Sərgidə nümayiş etdirilən mallar və xidmətlər Rusiya istehsalçılarının potensialının səviyyəsini göstərir. Eyni zamanda göstərir ki, bu mallar və xidmətlərdən istifadə etmək üçün Azərbaycanda artıq möhkəm iqtisadi baza mövcuddur. Təsadüfi deyil ki, indi ölkələrimiz arasında əmtəə dövriyyəsi çox yüksək sürətlə inkişaf edir. Hamımızın yadındadı, iki il əvvəl Rusiyaya rəsmi səfərim zamanı biz Vladimir Vladimiroviçlə əmtəə dövriyyəsinin iki dəfə artırılması proqramını müəyyənləşdirdik. Lakin o vaxt biz yəqin güman etməzdik ki, bu, belə tez baş verəcəkdir. Cəmi iki ildə ölkələrimiz arasında əmtəə dövriyyəsi iki dəfə artmış və indi bir milyard dolları keçmişdir. Bu gün ölkələrimizin iqtisadi imkanlarını, iqtisadiyyatın artım, sənayenin inkişaf sürətini qiymətləndirərkən inamla demək olar ki, bu, son hədd deyildir. Ona görə də iqtisadi münasibətlərin daha da artmasına çalışacağıq.

Bütün bunlar əməkdaşlıq üçün gözəl şərait yaradır. Vladimir Vladimirovçin bir az öncə dediyi humanitar sahədə əməkdaşlıq bizim üçün həmişə çox mühüm və yaxın olmuşdur. Bu əməkdaşlıq səmimi tələbatdan irəli gəlmişdir, yuxarıdan göndərilməmişdir, bu, yerinə yetirilməli olan direktiv deyil, cəmiyyətin normal vəziyyətidir.

Azərbaycanda rus mədəniyyətinə və dilinə böyük məhəbbət və hörmətlə yanaşırlar. Demək istəyirəm ki, Azərbaycanda rus dilində təhsil elə Sovet İttifaqı dövründəki həcmdə həyata keçirilir. Burada bir məktəb də belə bağlanmamış, ölkəmizin, əslində, bütün dövlət ali təhsil müəssisələrində rus dilində tədris mövcuddur. Başqa sözlə, bu, Azərbaycan dövlətinin prinsipial və ardıcıl siyasəti olmaqla yanaşı, həm də sosial və ictimai sifarişdir. Ona görə də ölkəmizdə bu siyasəti həyata keçirmək çox asandır.

Azərbaycan həmişə dözümlülüyü ilə fərqlənmişdir. Rusiya kimi, Azərbaycan da çoxmillətli ölkədir. Burada bir çox xalqların nümayəndələri bir ailə kimi yaşayırlar. Bu, dini etiqad azadlığı baxımından da belədir. Azərbaycan bir çox dinlərin nümayəndələrinin sülh, qardaşlıq və həmrəylik şəraitində yaşamasına yaxşı nümunədir. Hazırda dünyada təhlükəli meyilləri gördüyümüz bir zamanda bu, xüsusilə vacibdir. Bir tərəfdən, sivilizasiyalararası dialoqdan danışılır, digər tərəfdən, dini zəmində yaradılan ziddiyyətlər bəzən süni surətdə qızışdırılır. Biz qəti mübarizəmizi, habelə fəaliyyətimizi buna qarşı qoymalıyıq. Öz nümunəmizlə göstərməliyik ki, dünya tamamilə başqa istiqamətdə inkişaf etməlidir.

Azərbaycanda çoxlu rus, Rusiyada isə olduqca çox azərbaycanlı yaşayır. Bu da dövlətlərimiz arasındakı münasibətlərdə mühüm amillərdəndir. Əminəm ki, Azərbaycanda Rusiya İli ilə başladığımız bu il çox uğurlu olacaq, bizə daha fəal əməkdaşlıq imkanı verəcək və biz daha da yaxınlaşacağıq. Biz qonşularıq və Rusiya ilə Azərbaycan arasında mehriban qonşuluq münasibətləri çox möhkəmdir. Onlar məhz mehriban qonşuluğun fundamental prinsiplərinə - səmimiliyə, etibarlılığa və dostluğa əsaslanır. Zənnimcə, razılaşarsınız ki, bütün bu amillər ölkələrimiz arasındakı münasibətləri şərtləndirir.

Bu imkandan istifadə edib, ölkəmizə gəldiyi və Azərbaycanda Rusiya İlinin açılışında şəxsən iştirak etdiyi üçün Rusiya Prezidentinə təşəkkür etmək istəyirəm. Bu kürsüdən iqtisadi sahədə çox fəal əməkdaşlıq etdiyimiz Rusiya regionları rəhbərlərini salamlamaq istəyirəm. Rusiya regionlarının nümayəndə heyətləri ölkəmizə tez-tez səfər edirlər və bu gün də onlarla görüşdük.

Rusiyadan gəlmiş bütün qonaqları salamlamaq istəyirəm. Azərbaycana xoş gəlmisiniz, Azərbaycanda Rusiya İlinə uğurlar arzulayıram.

Diqqətinizə görə təşəkkür edirəm.

X X X

Sonra Rusiya Federasiyası incəsənət ustalarının böyük konserti oldu. Azərbaycan tamaşaçıları Rusiyanın əməkdar incəsənət xadimi, professor Aleksandra Permyakovanın rəhbərliyi ilə Pyatnitski adına Dövlət Akademik Rus Xalq Xorunun, P.İ.Çaykovski adına XI Beynəlxalq müsabiqənin qalibi pianoçu Denis Matsuyevin, “Terem-Kvartet”in və Sergey Jilinin rəhbərliyi ilə “Fonoqraf-Caz-Bənd” musiqi kollektivlərinin, estrada müğənnisi Nikolay Noskovun çıxışlarını alqışlarla qarşıladılar.

X X X

Heydər Əliyev adına Sarayın foyesində “Azərbaycan: 100 il İTAR-TASS-in obyektivində” fotosərgisi təşkil edilmişdi. Sərgiyə Rusiyanın qocaman informasiya agentliyinin ən yaxşı fotoustalarının 100-dək işi təqdim olunmuşdu. Fotoşəkillər XX əsrin əvvəllərində neft sahəsində ilk böyük canlanmadan başlayaraq, Azərbaycanın indiki reallıqlarınadək ölkəmizin tarixinin bir əsrdən artıq dövrünü əks etdirir.

Şəkillərdə həm sovet dövründə, həm də müstəqillik illərində Azərbaycan-Rusiya münasibətlərinin mühüm mərhələləri öz əksini tapmışdır.

Ekspozisiyada Rusiyada başa çatmış Azərbaycan İlinə, hər iki ölkənin faşist Almaniyası üzərində Qələbəyə töhfəsinə həsr olunmuş fotoşəkillər də geniş yer tutur.

Heydər Əliyev Fondunun prezidenti, YUNESKO-nun xoşməramlı səfiri, Milli Məclisin deputatı Mehriban Əliyeva İTAR-TASS agentliyinin Baş direktoru Vitali İqnatenkonun müşayiəti ilə sərginin ekspozisiyasına baxmışdır.

X X X

Azərbaycanda Rusiya İlinin açılış mərasimində Milli Məclisin sədri Oqtay Əsədov, Baş nazir Artur Rasizadə, Prezidentin İcra Aparatının rəhbəri Ramiz Mehdiyev, Milli Məclisin deputatları, nazirlər, dövlət komitələrinin, konsernlərinin başçıları, Rusiya nümayəndə heyətinin üzvləri iştirak edirdilər.