Əziz həmvətənlər!

Sizi Azərbaycan xalqının ən əziz bayramlarından biri - Novruz bayramı münasibətilə ürəkdən təbrik edirəm, sizə cansağlığı, xoşbəxtlik arzulayıram.

Azərbaycan xalqı bu bayramı əsrlər boyu yaşatmışdır. Novruz bayramı Azərbaycan xalqının qəlbində bütün dövrlərdə yaşamışdır. Ancaq təbii ki, Azərbaycan yalnız öz dövlət müstəqilliyini bərpa edəndən sonra bu bayram rəsmi bayram kimi qeyd olunur. Artıq 15 ildir ki, müstəqil Azərbaycan bu bayramı rəsmi bayram kimi qeyd edir.

Müstəqillik ən böyük sərvətdir, bizim üçün ən böyük xoşbəxtlikdir. Çünki Azərbaycan xalqı əsrlər boyu bu müstəqillikdən məhrum idi. Biz başqa dövlətlərin tərkibində yaşayırdıq və təbii ki, öz taleyimizi müəyyən edə bilmirdik. Bu gün Azərbaycan dünya birliyinin üzvüdür, öz dövlət müstəqilliyini möhkəmləndirir və ölkəmiz hərtərəfli inkişaf edir. Azərbaycan yalnız müstəqillik şəraitində öz potensialını tam şəkildə işə sala bildi. Bu 15 il ərzindəki fəaliyyətimiz əyani şəkildə göstərdi ki, Azərbaycan xalqı böyük xalqdır. Bizim uğurlarımız, ölkəmizin hərtərəfli inkişafı, bölgədəki mövqelərimiz, Azərbaycanın dünyada artan nüfuzu, iqtisadi inkişaf, sosial məsələlərin həlli bir daha onu göstərir ki, Azərbaycan xalqı müstəqillik şəraitində öz qüdrətini dünyaya nümayiş etdiribdir.

Dövlətçiliyimiz daha da möhkəmlənməli, Azərbaycan öz mövqelərini daha da gücləndirməlidir. Bunu etmək üçün bütün imkanlar var. Cəmiyyətdə bu barədə fikir ayrılığı yoxdur. Cəmiyyətimiz bu məsələlərlə bağlı öz fikrini ortaya qoyubdur. Azərbaycanın iqtisadi inkişafı çox sürətlə gedir. Keçən il iqtisadiyyatımız dünyada ən yüksək sürətlə inkişaf etmiş, artım 26 faizdən çox olmuşdur. Bu ilin ilk aylarında Azərbaycanda iqtisadi artım təxminən 50 faizdir. Dünyanın heç bir yerində, heç bir ölkədə bu göstəricilərə rast gəlinmir. İnkişaf etmiş ölkələrdə iqtisadiyyat təxminən bir-iki faiz artır. Bizimlə qonşu olan ölkələrdə, keçmiş sovet respublikalarında təxminən 5-10 faizdir. Azərbaycanda 50 faizdir. Bu onu göstərir ki, iqtisadi islahatlar öz bəhrəsini verir.

Heydər Əliyevin neft strategiyası Azərbaycan xalqına xidmət edir. Belə olan halda, Azərbaycanda iqtisadi inkişaf daha da yüksək sürətlə gedəcək, insanlarımız daha yaxşı yaşayacaqlar. Bizim də məqsədimiz budur. Bütün səylərimiz, bütün proqramlarımız bir məqsədi güdür ki, ölkəmiz daha da zənginləşsin, Azərbaycan xalqı daha da yaxşı yaşasın, işsiz olmasın, yoxsul olmasın, sosial ədalət hökm sürsün və beləliklə, cəmiyyətimiz, ölkəmiz, xalqımız daha da yüksək səviyyəyə qalxsın. Bu proses də gedir. Biz bunu görürük.

Bu il Bakı-Tbilisi-Ceyhan neft kəmərinin işə salınmasından sonra ölkəmizin iqtisadi imkanları daha da artacaqdır. Biz buna nail olacağıq. Çünki bu vaxta qədər qəbul olunmuş bütün proqramlar həyatda öz əksini tapmışdır.

Ölkəmiz - bölgələrimiz, rayonlarımız, kəndlərimiz, bizim Bakımız hərtərəfli inkişaf edir. Bakının inkişafına da böyük diqqət göstərilir. Bu yaxınlarda qəbul edilmiş proqramlar Bakının bütün infrastrukturunun yeniləşməsinə imkan yaradacaqdır. Yol təsərrüfatının inkişafına dair qəbul edilmiş proqram artıq icra olunur. Yeni yollar, körpülər, nəqliyyat qovşaqları tikilir. Bununla yanaşı, şəhərətrafı qəsəbələrin də problemlərinə dair xüsusi proqram qəbul edilibdir. Bu proqram da icra olunmağa başlanmışdır.

Azərbaycanda xəstəxanalar, məktəblər, elektrik stansiyaları tikilir, qaz kəmərləri, su kəmərləri, yollar çəkilir. Bu inkişaf hər sahəni əhatə edir, cəmiyyətimizin bütün istiqamətlərində özünü büruzə verir. Mən istəyirəm ki, bu inkişaf daha da sürətlə getsin, qısa bir müddət ərzində biz daha da ciddi irəliləyişə nail ola bilək və buna da əminəm. Biz buna nail olacağıq.

Azərbaycan xalqı öz milli ənənələrinə daim sadiq olmuşdur. Bizim milli-mənəvi dəyərlərimiz Azərbaycan xalqını qorudu, möhkəmləndirdi. Biz buna sadiqik. Eyni zamanda, biz dünyaya da açığıq. Çünki hər bir mütərəqqi təcrübə Azərbaycanda da tətbiq olunmalıdır. Əlbəttə ki, bizim şəraitimizi nəzərə almaq şərti ilə. Azərbaycan yeniləşir, müasirləşir. Dünyanın ən qabaqcıl texnologiyaları Azərbaycanda tətbiq olunmalıdır. Bu, bir daha onu göstərir ki, biz dünyada gedən proseslərə çox açığıq. Ölkəmizi müasirləşdirməliyik, zənginləşdirməliyik. Çünki müasir dünyada hər şeyi bilik, savad, təhsil həll edir. İnkişaf etmiş ölkələrin təcrübəsinə nəzər salsaq görərik ki, orada tərəqqini müəyyən edən neft-qaz yox, məhz bilik, texnologiyalar, təhsildir. Ona görə neft-qaz sahəsindəki uğurlar, o sahədən əldə olunan gəlirlər Azərbaycanın hərtərəfli inkişafına xidmət etməlidir. İnfrastruktur layihələrinin həyata keçirilməsinə, iqtisadi inkişafın güclənməsinə, sosial proqramların həllinə, maaşların, pensiyaların artırılmasına xidmət etməlidir. Bu yaxınlarda minimum əməkhaqqı yenidən qaldırılacaqdır. Pensiyalar yenidən qaldırılacaqdır. Sosial cəhətdən ən az müdafiə olunan insanlar - bizim qaçqın-köçkünlər də yeni şəraitlə təmin edilirlər. Amma bütün bunlarla yanaşı, ölkəmizin hərtərəfli və sürətli inkişafını təmin etmək üçün biz sərmayəni ilk növbədə təhsilə, biliyə, gənclərimizin maarifləndirilməsinə yönəltməliyik. Azərbaycanda ən yüksək texnologiyalar tətbiq edilməlidir və biz buna nail olacağıq.

Azərbaycanın qarşısında çox gözəl perspektivlər var. Ölkəmiz iqtisadi cəhətdən möhkəmlənir və bu iqtisadi artım indi heç kimdə şübhə doğurmur. Bununla yanaşı, biz gələcək imkanlarımızı da gözəl bilirik. Gələcəkdə daha da çox artım olacaqdır. Çünki neft kəməri, qaz kəməri işə düşəndən sonra Azərbaycana milyardlarla dollar sərmayə gələcək, ölkəmizin hər bir sahəsi yeniləşəcəkdir.

Ölkəmiz dünya miqyasında öz rolunu möhkəmləndirir. Bölgədə mövqelərimiz möhkəmdir. Azərbaycan lider dövlətə çevrilibdir. Biz bütün beynəlxalq regional layihələrdə iştirak edirik, fəal iştirak edirik. Şübhə etmirəm ki, gələcək illərdə Azərbaycanda hərtərəfli inkişaf təmin olunacaqdır.

Bildiyiniz kimi, bu yaxınlarda Bakıda Dünya azərbaycanlılarının II qurultayı keçirilmişdir. Bu, çox tarixi hadisədir. Birinci qurultay 2001-ci ildə ulu öndər Heydər Əliyevin təşəbbüsü ilə keçirilmişdir. O vaxtdan indiyədək, son beş il ərzində Azərbaycan diasporu demək olar ki, bütün ölkələrdə təşkilatlanmış və güclənmişdir. Bu qurultay da çox böyük əhəmiyyət daşıyırdı. Dünyanın hər bir yerindən, bütün qitələrdən azərbaycanlılar qurultayda iştirak etmək üçün öz Vətəninə gəlmişdilər.

Qurultayda aparılan müzakirələr, qəbul edilmiş sənədlər bizim birliyimizin daha da möhkəmlənməsi üçün çox əhəmiyyətlidir. 50 milyonluq Azərbaycan xalqı öz gücünü göstərdi. Biz böyük xalqıq, böyük gücük. Əlbəttə ki, qurultayda ölkəmizi narahat edən, eyni zamanda, diaspor təşkilatlarını narahat edən bir sıra problemlər müzakirə olundu. Deyə bilərəm ki, qurultayın əsas mövzusu həm də Ermənistan-Azərbaycan, Dağlıq Qarabağ münaqişəsi idi. Bu məsələdə də heç bir fikir ayrılığı yoxdur. Azərbaycan dövlətinin, xalqının, vətəndaşlarının, öz torpağından kənarda yaşayan azərbaycanlıların fikri birdir. Bu məsələ ölkəmizin ərazi bütövlüyü çərçivəsində öz həllini tapmalıdır. Azərbaycanın ərazi bütövlüyü təmin olunmalıdır. Təcavüzdən əziyyət çəkən qaçqınlar-köçkünlər öz doğma torpaqlarına qayıtmalıdırlar. Bu məsələ beynəlxalq hüquq normaları əsasında öz həllini tapmalıdır.

Beynəlxalq hüquq normaları ona görə mövcuddur ki, hər bir ölkə bunlara riayət etsin. Hər bir ölkə dünyada mövcud olan əsas prinsiplərə, tənzimləyici mexanizmlərə gərək hörmətlə yanaşsın. Gərək dünyada mövcud olan beynəlxalq davranış qaydalarına hörmətlə yanaşsın. Azərbaycanın mövqeyi dünyada mövcud olan bütün əsas hüquqi prinsiplərə əsaslanır və biz bu çərçivədə də fəaliyyət göstərəcəyik. Ona görə Azərbaycanın ərazi bütövlüyü, suverenliyi danışıqlar mövzusu deyil və heç vaxt olmayacaqdır. Biz istəyirik ki, bunu qarşı tərəf də tezliklə anlasın, başa düşsün və dünyada gedən proseslərə daha da sürətlə qovuşsun. Dünyada qloballaşma gedir, sərhədlər açılır. Dünyada və regionda ölkələr bir-biri ilə əməkdaşlıq edir. Özünü bu əməkdaşlıqdan təcrid etmiş Ermənistanın gələcək perspektivləri də çox dumanlıdır.

Azərbaycan isə öz işini davam etdirəcəkdir. Bizim işimiz haqq işidir. Biz bu münaqişəni Azərbaycanın milli maraqları əsasında, beynəlxalq hüquq normaları və prinsipləri əsasında həll edəcəyik.

Eyni zamanda, Azərbaycanda iqtisadi potensial daha da möhkəmlənəcək, ordu potensialı möhkəmlənəcək, sosial məsələlər öz həllini tapacaq və Azərbaycan bir neçə ildən sonra dünyanın ən inkişaf etmiş ölkələrindən birinə çevrilməlidir. Mən bu vəzifəni qoymuşam. Bunu etmək üçün hər cür imkanlar var. Gözəl coğrafi vəziyyət, təbii sərvətlər, xalqımızın iradəsi, Azərbaycanda ümumi inkişaf səviyyəsi, təhsil, bilik səviyyəsi – bütün bunlar var. Bütün bunlar ölkəmizi zəngin dövlətə çevirəcəkdir.

Mən əminəm ki, biz gələcək illərdə də bu gözəl günləri qeyd edəcəyik. Gözəl Novruz bayramı Azərbaycana xoşbəxtlik, yenilik gətirəcək, müasirlik gətirəcəkdir.

Əziz dostlar, bu gözəl bayram günündə sizi bir daha ürəkdən təbrik edirəm, hər birinizə xoşbəxtlik, uğurlar, cansağlığı arzulayıram.

Bayramınız mübarək olsun!

(Dövlətimizin başçısının nitqi böyük diqqətlə dinlənildi və alqışlarla qarşılandı).