- Türkiyə Cümhuriyyətinin Prezidenti, əziz qardaşım Əhməd Necdət Sezər!

Hörmətli Səmra xanım!

Xanımlar və cənablar!

Əziz qonaqlar!

Mən sizi Azərbaycanda bir daha ürəkdən salamlayıram, sizə “Xoş

gəlmisiniz!” deyirəm.

Biz bu səfərə çox böyük əhəmiyyət veririk. Çünki bu səfər ikitərəfli əlaqələrimizin inkişafına güclü təkan verəcəkdir. Türkiyə ilə Azərbaycan arasında əlaqələr dostluq, qardaşlıq zəminində qurulubdur. Bizim xalqlarımız bir-birinə daim çox bağlı olmuşlar. Ancaq dövlətlərarası münasibətlər Azərbaycan müstəqilliyə qovuşduqdan sonra başladı və o gündən bu günə qədər bu münasibətlər çox sürətlə inkişaf etmişdir. Türkiyə Azərbaycanın müstəqilliyini tanıyan ilk ölkə olmuşdur və biz Türkiyədən daim dəstək və kömək hiss edirik. Bu dəstəyə və köməyə görə sizə çox minnətdarıq.

Bizim münasibətlərimizi müəyyən edən təməl prinsipləri vardır. Böyük öndər Mustafa Kamal Atatürkün “Azərbaycanın kədəri bizim kədərimiz, sevinci bizim sevincimizdir!”, Azərbaycan xalqının ümummilli lideri Heydər Əliyevin “Türkiyə və Azərbaycan bir millət, iki dövlətdir!” prinsipləri bizim bugünkü münasibətlərimizi müəyyən edir və əminəm ki, gələcəkdə bu münasibətlər daha da möhkəmlənəcəkdir.

Azərbaycan ilə Türkiyə arasında olan işbirliyi, əlaqələr təkcə ölkələrimiz, xalqlarımız üçün deyil, bütün bölgə üçün böyük əhəmiyyət daşıyır. Xüsusilə indiki zamanda Türkiyə və Azərbaycan bölgədə və dünyada öz mövqelərini möhkəmləndirirlər. Bizi birləşdirən nəhəng enerji layihələrinin həm bölgənin inkişafı üçün, bölgədə sülhün, təhlükəsizliyin möhkəmlənməsi üçün, eyni zamanda, dünya üçün çox böyük əhəmiyyəti vardır. Bu il Bakı-Tbilisi-Ceyhan neft kəməri işə düşməlidir, eyni zamanda, Bakı-Tbilisi-Ərzurum qaz kəməri istifadəyə verilməlidir. Bunlar dünyamiqyaslı layihələrdir və ilk növbədə, dövlətlərimizi möhkəmləndirəcək, eyni zamanda, bizim önəmimizi də artıracaqdır. Azərbaycan və Türkiyə Xəzər dənizinin təbii ehtiyatlarını dünya və Avropa bazarlarına çıxarılması üçün çox önəmli ölkələrə çevrilir.

Bununla yanaşı, dəmir yolunun birləşməsi məsələsi də çox böyük əhəmiyyət daşıyır və Bakı-Tbilisi-Qars dəmir yolu layihəsi də artıq gündəlikdədir. Bu gün bu barədə də söhbət açılmış, fikir mübadiləsi aparılmışdır. Əminəm ki, bu layihə də həyata keçiriləcək və beləliklə, Orta Asiyanı, Azərbaycanı Türkiyə ilə birləşdirən dəmir yolu da istismara veriləcəkdir. Bir vaxtlar bəziləri Bakı-Tbilisi-Ceyhan neft kəmərinə də əfsanə kimi yanaşırdılar. Ancaq bizim birgə səylərimiz, uğurlu fəaliyyətimiz, regional əməkdaşlıq bu əfsanəni gerçəkliyə çevirdi. Şübhə etmirəm ki, gələcəkdə həyata keçiriləcək layihələr də uğurlu olacaqdır.

Bu gün eyni zamanda, Ermənistan-Azərbaycan, Dağlıq Qarabağ münaqişəsinin həlli yolları da müzakirə edilmişdir. Bildiyiniz kimi, Türkiyə bu məsələ ilə bağlı daim Azərbaycanın yanındadır. Biz daim bu dəstəyi hiss edirik və bu, bizim üçün çox önəmlidir, Azərbaycanın mövqelərini möhkəmləndirən bir amildir. Azərbaycan bu münaqişəni yalnız beynəlxalq hüquq əsasında həll etmək əzmindədir. Beynəlxalq hüquq normaları hər yerdə tətbiq olunmalıdır. Beynəlxalq normalara riayət edilməlidir və davranış qaydaları da hamı üçün eyni olmalıdır. Biz bu dünyada yaşayırıq, dünyanın bir hissəsiyik və dünyada, beynəlxalq təşkilatlarda qəbul edilmiş normalar bütün ölkələr üçün əsas olmalıdır. Azərbaycanın mövqeyi də məhz bundan ibarətdir ki, ölkəmizin dünya tərəfindən, Birləşmiş Millətlər Təşkilatı tərəfindən tanınmış ərazi bütövlüyü bərpa olunmalıdır. Azərbaycanın suverenliyi bərpa edilməli, zəbt olunmuş torpaqlar işğalçı qüvvələrdən təmizlənməlidir və Ermənistanın azərbaycanlılara qarşı etdiyi etnik təmizləmə siyasətinin nəticələri aradan qaldırılmalıdır. Bizim bu mövqeyimiz dəyişməz olaraq qalır və münaqişə yalnız bu prinsiplər əsasında öz həllini tapa bilər. Türkiyənin Azərbaycana dəstəyi, bu məsələ ilə bağlı bəyanatları, təklifləri bizim üçün çox önəmlidir və münaqişənin həlli üçün böyük rol oynayır.

Bizim iqtisadi əlaqələrimiz də sürətlə inkişaf edir. Son il ərzində ticarət dövriyyəsi çox böyük sürətlə artıbdır. Bu, onu göstərir ki, iqtisadi əlaqələrimiz də yeni mərhələyə qədəm qoyubdur. Bu, bizi çox sevindirir, çünki iqtisadi əlaqələrimiz nə qədər güclü olsa, bu, bütün başqa sahələrə də təsir göstərəcəkdir. İndi Türkiyənin və Azərbaycanın iqtisadi uğurları göz qabağındadır. Türkiyənin iqtisadiyyatı artır və sürətlə inkişaf edir. Keçən il Azərbaycanda iqtisadi artım 26,4 faiz təşkil etmişdir. Bu il isə həmin rəqəm daha da böyük olacaqdır. Yeni imkanlar açılır, yeni layihələr həyata keçiriləcəkdir. Biz Azərbaycanda fəaliyyət göstərən türk iş adamlarını da bu əməkdaşlığa dəvət edirik. Artıq Azərbaycanda Türkiyədən gəlmiş və burada yaşayan minlərlə iş adamı fəaliyyət göstərir. Biz də çalışırıq ki, onlara daim diqqət, kömək göstərək. İnvestisiya mühitini sağlamlaşdırmaq üçün müvafiq tədbirlər də görülür. İqtisadi əlaqələr nə qədər güclü olsa, təbii ki, bütün başqa əlaqələr də güclənəcəkdir.

Yenə də demək istəyirəm ki, bizi birləşdirən tarixi köklər, müştərək tariximiz, ənənələrimiz, dinimiz, dilimiz, mədəniyyətimizdir. İki qardaş ölkə - Türkiyə və Azərbaycan bu gözəl və möhkəm təməl üzərində öz münasibətlərini möhkəmləndirir, yeni layihələr üzərində işləyirlər. Ölkələrimiz üçün, bölgə üçün, dünya üçün önəmli olan məsələlər indi Ankarada və Bakıda həll olunur və bu da həqiqətdir. Mən şübhə etmirəm ki, gələcəkdə bizim mövqelərimiz daha da möhkəmlənəcəkdir. Türkiyə-Azərbaycan birliyi bizim uğurlu inkişafımız üçün başlıca şərtdir.

Əziz qardaşım, hörmətli Cümhurbaşqanı, Sizi Bakıda bir daha salamlayıram. Bu badəni Türkiyənin Cümhurbaşqanı, əziz qardaşım Əhməd Necdət Sezərin şərəfinə, Səmra xanımın şərəfinə, bütün qardaş türk xalqının şərəfinə, Türkiyə Cümhuriyyətinin şərəfinə qaldırıram.

Sağ olun.