Sizi yenidən salamlayır və ABŞ-a səfərim ilə bağlı dərin məmnunluğumu bir daha ifadə edirəm.

Səfər artıq başa çatmaq üzrədir. Sabah ABŞ-ın Prezidenti, vitse-prezidenti və müdafiə naziri ilə görüşlərim olacaqdır. Lakin artıq indidən deyə bilərəm ki, səfər çox uğurlu keçmişdir. Bu səfər qarşılıqlı maraq doğuran məsələlər üzrə fikir mübadiləsi aparmaq, ikitərəfli münasibətlərə yenidən nəzər salmaq, münasibətlərimizin gələcək perspektivləri barədə danışmaq üçün gözəl imkanlar yaratdı. Əminəm ki, indi strateji əhəmiyyətə malik olan ABŞ-Azərbaycan münasibətləri bundan sonra da inkişaf edəcək və həyatımızın, əməkdaşlığımızın bütün sahələrini əhatə edəcəkdir.

Bu səhər Amerika-Azərbaycan Ticarət Palatasının təşkil etdiyi konfransın açılışında olarkən mən keçmiş və gələcək barədə düşünürdüm. Keçən dövr ərzində böyük nailiyyətlər əldə edilmişdir. Ticarət palatasının on illik fəaliyyəti dövründə ABŞ və Azərbaycan iki müttəfiqə, dosta, regional və dünya əhəmiyyətli çox mühüm layihələrin həyata keçirilməsi üçün birgə çalışan ölkələrə çevrilmişlər.

Ümid edirəm ki, əməkdaşlığımız gələcəkdə də bu səviyyədə davam etdiriləcəkdir. Çünki əldə olunan nailiyyətlər yalnız başlanğıcdır. Bizim nəhəng enerji inkişafının, sadəcə, ilk mərhələsi gedir. Ölkələrimiz regional və qlobal təhlükəsizlik məsələləri, terrorizmlə mübarizə, Azərbaycanda iqtisadi və siyasi islahatların həyata keçirilməsi, regionumuzu daha təhlükəsiz və sabit etmək sahəsində əməkdaşlıq edir.

Xəzər hövzəsində enerji təhlükəsizliyi və enerji inkişafı məsələlərində ABŞ hökumətinin oynadığı rol həlledici olmuşdur. Ümid edirəm ki, bu rol gələcəkdə də davam etdiriləcəkdir. Belə ki, bu, bütün planlarımızın və ideyalarımızın həyata keçirilməsi üçün zəruridir. Bu planlar, ideyalar ilk baxışdan real görünməyə bilərdi. On il bundan qabaq bir çox insanlar Bakı-Tbilisi-Ceyhan boru kəmərinin reallığa çevriləcəyinə, Azərbaycanın “Şahdəniz” yatağından hasil ediləcək qazın Avropa istehlakçıları üçün əhəmiyyət kəsb edəcəyinə inanmırdılar. Bunları əvvəlcədən görmək çox çətin idi. Lakin bizim qarşımızda duran məqsədlərimiz var idi və bu məqsədlərə doğru birgə hərəkət edirdik. Əminəm ki, Azərbaycan və ABŞ-ın, tərəfdaşlarımız və müttəfiqlərimizin birgə səyləri regionda tamamilə fərqli bir vəziyyətin yaranmasına gətirib çıxaracaq, regionun ümumi inkişafına təsir göstərəcək, geniş siyasi islahatların həyata keçirilməsinə kömək edəcəkdir. ABŞ hökuməti bu məsələlərə böyük diqqət yetirir.

Eyni zamanda, Azərbaycanda da bu məsələlərə önəm verilir. Biz bunların həyata keçirilməsi üçün birlikdə çalışmalıyıq. Siyasi və iqtisadi islahatlar, enerji inkişafı sahəsində layihələr, regionu daha təhlükəsiz və sabit etmək istiqamətindəki birgə səylərimiz ikitərəfli əlaqələrimizin, regional sabitliyin və inkişafın elementləridir. Bütün bu məsələlərdə Azərbaycanın rolu getdikcə artır. Xəzər dənizinə xarici sərmayələrin cəlb edilməsi sahəsində öncül bir ölkə kimi Azərbaycanın fəaliyyəti regionda tamamilə yeni bir vəziyyətin yaranmasına gətirib çıxarmışdır.

Təsəvvür edin ki, 1994-cü ildə “Əsrin müqaviləsi” bağlanmasaydı və sonrakı dövrdə enerji layihələrinin inkişafında uğur əldə edilməsəydi, nə baş verə bilərdi?! Regiondakı bütün vəziyyət tamamilə fərqli olardı. Bu gün biz birgə səylərin nəticələrindən faydalanırıq. Biz xalqlarımız üçün daha yaxşı həyat şəraiti, bütün regionda sabitlik və firavanlıq yaratmaq naminə səylərimizi davam etdirmək əzmindəyik.

Cənubi Qafqaz regionu illər, əsrlər boyu müharibələrdən, hərbi əməliyyatlardan, münaqişələrdən əziyyət çəkmişdir. Bizim böyük mədəniyyətimiz, tariximiz, ənənələrimiz var, lakin əsrlər boyu müstəqilliyimizdən məhrum edilmişdik. Müstəqillik bizim üçün böyük məna kəsb edir. Bu, Azərbaycan xalqı üçün ən böyük dəyərdir. Bu müstəqilliyi necə dönməz və güclü etmək, ölkənin mövqeyini necə gücləndirmək olar? Bu məsələlərlə gündəlik məşğul olmalıyıq.

Tarixdən alınan dərslər bizim üçün önəmlidir. Ona görə də biz güclü dövlət qurmaq, insanların həyat səviyyəsini daha da yaxşılaşdırmaq, qanunun aliliyinə, bütün siyasi azadlıqlara və geniş demokratiyaya malik tam sərbəst cəmiyyətə nail olmaq üçün çox çalışmalı, dostlarımız və müttəfiqlərimiz ilə daim təmasda olmalıyıq. Bu baxımdan Ticarət palatasının rolu çox önəmli olmuşdur. Onun fəaliyyəti bizə ABŞ-la əlaqələri yaxşılaşdırmaq, sözlərimizi çatdırmaq, ölkənin problemləri, istəklərimiz barədə məlumat vermək, birgə əməkdaşlıq imkanlarından istifadə etmək fürsəti vermişdir.

Mən Ticarət palatası tərəfindən təşkil edilmiş bir çox konfranslarda iştirak etmişəm. Hər dəfə qarşımızda fərqli məsələlər dururdu. Lakin ümumi meyil heç zaman dəyişməmişdir: məqsəd ABŞ ilə Azərbaycan arasında ikitərəfli münasibətlərin inkişaf etdirilməsi, əməkdaşlıq üçün yeni əsasların yaradılması olmuşdur. İndi münasibətlərimizin necə inkişaf etdiyini görürük. On il bundan əvvəl gündəlikdə bir məsələ dururdusa, indi əməkdaşlığımız geniş aspektdə həyata keçirilərək energetika, təhlükəsizlik, siyasi və demokratik islahatlar, iqtisadiyyat, regional təhlükəsizlik sahələrini əhatə edir. Bütün bu məsələlərə dair bu gün ABŞ və Azərbaycan arasında açıq, səmimi və dostcasına müzakirələr aparılır və bizim fikirlərimiz üst-üstə düşür.

Ona görə də fürsətdən istifadə edərək, Ticarət palatasının rəhbərliyini, palatanın işində fəal iştirak etmiş bütün insanları, onun tədbirlərini dəstəkləmiş və indi də dəstəkləyən bütün şirkətləri təbrik etmək istəyirəm. Bu, böyük nailiyyətdir. Bunu ona görə demirəm ki, palatanın yubileyidir və yaxşı sözlər söyləmək lazımdır. Bu, bir reallıqdır. Mən palatanın ABŞ-Azərbaycan ikitərəfli münasibətlərinə böyük töhfəsinin daim şahidi olmuşam.

ABŞ-la ikitərəfli münasibətlər Azərbaycan üçün prioritet xarakter daşıyır. Ölkəmizin mövqeyi çox açıq və səmimidir. Bu mövqeyə hər hansı bir təsir göstərmək və ya onu dəyişdirmək mümkün deyildir.

Biz siyasətimizi milli maraqlarımıza uyğun, əsil müstəqil dövlət kimi həyata keçiririk. Özünü müstəqil hesab etmək üçün, sadəcə, milli himnə və bayrağa malik olmaq kifayət deyildir. Elə ölkələr var ki, müstəqilliyin bu atributlarına malik olsalar da, müstəqil siyasət həyata keçirə bilmir. Biz sözün həqiqi mənasında müstəqil olduğumuz üçün çox xoşbəxtik və bundan qürur duyuruq. Bu istiqamətdə Azərbaycan xalqının ümummilli lideri Heydər Əliyevin əməyi böyük olmuşdur. Onun səylərinin nəticəsidir ki, indi Azərbaycan öz milli maraqlarına uyğun siyasət həyata keçirə bilir. Bu siyasətin məqsədi ABŞ və Qərbdəki digər müttəfiqlərimiz ilə əlaqələri gücləndirməkdən ibarətdir. Biz əməkdaşlıq üçün açığıq, ölkəmizdə ən böyük sərmayədarlar olan ABŞ şirkətləri ilə yaxşı iqtisadi əməkdaşlıq göstəricilərimiz mövcuddur.

Hazırda Azərbaycanda daha yaxşı sərmayə mühiti yaratmaq istəyirik və əminik ki, bu gün keçirilmiş konfrans bu istiqamətdə mühüm rol oynayacaqdır. Konfransda iqtisadi və siyasi əməkdaşlığın müxtəlif aspektləri müzakirə edilmişdir və nəticələr çox müsbətdir. Hesab edirəm ki, bir neçə aydan sonra konfransın real nəticələrini görəcəyik.

Son on ildə Ticarət palatası ilə müxtəlif qismlərdə, hazırda isə suveren dövlətin Prezidenti kimi birgə fəaliyyət göstərməkdən şərəf duyuram. Nailiyyətlərin əldə olunması üçün birgə çalışdığımız dostlarımızı burada görməkdən çox məmnunam. Bir zamanlar xülya, əfsanə kimi görünən əməkdaşlıq səviyyəsi və layihələrimiz bu gün reallıqdır. Bu, o deməkdir ki, hər şeyə nail olmaq mümkündür. Xüsusilə çox mürəkkəb yerlərdə də həyata keçirilməsi qeyri-real, qeyri-mümkün hesab olunan layihələr gerçəkləşdirilə bilər. Bunun üçün sadəcə iradə, qətiyyət, cəsarət və əməkdaşlıq olmalıdır. Bütün bu cəhətlər bizdə var və münasibətlərimizi gələcəkdə də inkişaf etdirmək əzmindəyik.

Ümid edirəm ki, ABŞ ilə Azərbaycan arasında mövcud olan strateji tərəfdaşlıq yalnız xalqımıza deyil, bütün regiona fayda gətirəcəkdir. Region daha təhlükəsiz, daha sabit olacaq, nəhayət, ölkəmizdə və bütövlükdə regionda sülh bərqərar ediləcəkdir. Bu yubiley münasibətilə sizi bir daha təbrik edir, sizə xoşbəxtlik və uğurlar arzulayıram.

Çox sağ olun.

(Dövlətimizin başçısının nitqi böyük diqqətlə dinlənildi və sürəkli alqışlarla qarşılandı).

X X X

Amerika-Azərbaycan Ticarət Palatasının həmsədri Ceremi Beyker dəyərli və uzaqgörən fikirlərə görə Azərbaycan Prezidentinə minnətdarlıq etdi. O, “Görkəmli rəhbərlik” adlı xüsusi mükafatı Prezident İlham Əliyevə təqdim edərək bildirdi ki, bu mükafat yalnız bir dəfə, palatanın fəaliyyətinin ilk ilində Prezident Heydər Əliyevə təqdim edilmişdir. İndi isə palata onun işinə verdiyi dəstəyə və Azərbaycana etdiyi gözəl rəhbərliyə görə Prezident İlham Əliyevi bu mükafata layiq görmüşdür.

Prezident İlham Əliyev mükafata görə təşəkkür edərək dedi ki, bu, mənim üçün çox dəyərli mükafatdır. Söz verirəm ki, gələcək fəaliyyətimdə də palatanı dəstəkləmək üçün əlimdən gələni edəcəyəm, Vaşinqtonda, ABŞ-ın digər şəhərlərində, bəlkə də Bakıda daha çox konfranslar keçiriləcək, sizinlə daha tez-tez görüşəcəyəm.