AZƏRBAYCAN PREZİDENTİ İLHAM ƏLİYEVİN NİTQİ
Bu gün çox gözəl bir gündür. Biz Elmi Onkoloji Mərkəzin yeni korpusunun təməlini qoyduq. Əminəm ki, qısa müddət ərzində yeni, gözəl bina tikilib istifadəyə veriləcəkdir. Bu, özlüyündə onu göstərir ki, Azərbaycanda hər bir sahəyə böyük diqqət var, böyük qayğı var.
Siz yaxşı bilirsiniz ki, uzun illər ərzində Onkoloji Mərkəzin yeni korpusunun tikintisi haqqında danışıqlar gedirdi. Müxtəlif təşkilatlarla, beynəlxalq maliyyə qurumları ilə danışıqlar aparılırdı. Hesab edirdik ki, bunu hansısa kreditin hesabına tikmək mümkün olacaqdır. Amma əfsuslar olsun ki, danışıqlar nəticə vermədi. Çünki beynəlxalq maliyyə qurumları, adətən, səhiyyə obyektlərinin tikintisinə kredit ayırmırlar. Çünki təbii ki, bu, kommersiya obyekti, kommersiya müəssisəsi deyildir. Ancaq Azərbaycanın sürətli iqtisadi inkişafı, bizim artan imkanlarımız yeni bir vəziyyət yaratdı. Bu gün bizim imkanlarımız var ki, öz hesabımıza istənilən müəssisəni yaradaq.
Şübhəsiz ki, ilk növbədə, biz insanları daha da narahat edən, daim maraq doğuran sosial sahəyə böyük diqqət göstərməliyik. İndi Azərbaycanda sosial sahədə böyük işlər görülür. Yeni tibb ocaqları tikilir, rayonlarda, Azərbaycanın müxtəlif bölgələrində yeni, müasir müalicə-diaqnostika mərkəzləri tikilir ki, insanlar yüksək tibbi xidmət ala bilsinlər.
Bilirsiniz ki, artıq 10 rayonda biz yeni tibb ocaqlarının təməlini qoymuşuq və onlar bir il ərzində istifadəyə veriləcək, fəaliyyətə başlayacaqdır. Eyni zamanda, böyrək çatışmazlığından əziyyət çəkən xəstələr üçün bütün tibb mərkəzlərində dializ aparatları da quraşdırılır. Bilirsiniz ki, müxtəlif yerlərdə yaşayan insanlar bu sahədə müalicə almaq üçün Bakıya gəlməyə məcburdurlar. 100-200-300 kilometr yol gedirlər, böyük əziyyət çəkirlər. İndi isə hər bir bölgədə müasir tibb infrastrukturu yaranır.
Əlbəttə ki, onkoloji xəstələrə böyük diqqət və qayğı göstərilməlidir. Onlar ən yüksək tibbi xidmətlə təmin olunmalıdırlar. Bu gün təməl daşını qoyduğumuz böyük korpus da bu funksiyanı yerinə yetirəcəkdir. Burada ən gözəl standartlar, ən qabaqcıl texnologiyalar, avadanlıq, bütün tibb ləvazimatları tətbiq olunmalıdır. Biz bu məsələyə böyük diqqət göstəririk və lazım olan qədər də vəsait ayrılacaq ki, cərrahiyyə korpusu ən yüksək səviyyədə tikilsin.
Azərbaycanın sürətli inkişafı indi bizə yeni imkanlar yaradır. Biz daha çox məhz sosial məsələlərin həllinə - yeni məktəblərin, tibb ocaqlarının, xəstəxanaların tikilməsinə çalışırıq. Bakıətrafı qəsəbələrin inkişafına dair qəbul edilmiş proqramda da 20-dən çox tibb müəssisəsinin tikintisi nəzərdə tutulubdur. Artıq onların bir neçəsinin təməl daşı qoyulubdur. Azərbaycanın bütün bölgələrində, bütün yerlərdə ən yüksək tibb infrastrukturu yaranmalıdır.
Biz xüsusilə səhiyyə sahəsinə böyük diqqət göstərməliyik. Eyni zamanda, bu sahədə çalışanların əmək haqları qaldırılmalıdır. Bu yaxınlarda müvafiq qərarlar qəbul edildi, maaşlar qaldırıldı. Ancaq bu nə sizi, nə də bizi qane edir. Biz istəyirik ki, bu sahədə çalışanlar ən yüksək maaş alsınlar, onların gözəl təminatı olsun, xəstəxanalarda dərmanlar, bütün tibbi ləvazimat olsun. Mən şübhə etmirəm ki, bu sahədə aparılan islahatlar yaxın zamanlarda öz gözəl nəticələrini verəcəkdir.
Mənim istəyim bundan ibarətdir ki, səhiyyə xərclərinə ayrılan vəsait ildən-ilə artsın. Keçən il təxminən 50 faiz artmışdır. Bu ilin büdcəsində səhiyyə xərclərində artım təxminən 40 faiz təşkil edir.
Düzdür, bu, bizi tam qane etmir. Çünki bu, ən ağır sahələrdən biridir və uzun illər ərzində nə investisiya qoyulurdu, nə də proqramlar həyata keçirilirdi. Yəni əfsuslar olsun ki, bu sahə Azərbaycanda uzun illər çox acınacaqlı vəziyyətdə idi. Biz indi yeni proqramlara başlayırıq. Bu sahədə ciddi islahatlar aparılmalıdır, o cümlədən səhiyyə sisteminin maddi-texniki bazasının möhkəmlənməsinə aid olan bütün məsələlər həllini tapmalıdır.
Dünyanın inkişaf etmiş ölkələrinin təcrübəsinə nəzər salsaq görərik ki, harada səhiyyəyə böyük sərmayələr qoyulur, elmi tədqiqatlara böyük vəsait ayrılır, o ölkələrdə tibb sahəsi daha da inkişaf edir. Biz də bu gözəl təcrübədən istifadə etməliyik. Yenə də deyirəm, indi bizim iqtisadi-maliyyə imkanlarımız artır, büdcəmiz ildən-ilə artır. Son 2-3 il ərzində büdcəmiz dəfələrlə artıbdır. Səhiyyə sahəsinə aid olan xərclər də artacaqdır. Tibb işçilərinin əmək haqları da artırılacaqdır. Eyni zamanda, gözəl infrastruktur da yaranmalıdır.
Mən bu məsələ ilə bağlı müvafiq göstərişlər vermişəm. Bu gün bu gözəl cərrahiyyə korpusunun təməlinin qoyulması bunun gözəl nümunəsidir. Bundan sonra Azərbaycanda başqa tibbi mərkəzlər tikilməlidir. Yenə də qeyd etmək istəyirəm, insanlarımız ən yüksək tibbi xidmətə layiqdirlər və onu almalıdırlar.
Sizin peşəniz çox çətin peşədir. Həkim peşəsi həm çox çətin, həm də şərəfli peşədir. Siz insanlara şəfa verirsiniz, insanların vəziyyətini yaxşılaşdırırsınız, onların ağrı-acılarını çəkirsiniz, vəziyyətini yüngülləşdirirsiniz. Xüsusilə onkologiya sahəsindəki işinizi mən çox yüksək qiymətləndirirəm. İstəyirəm ki, siz gözəl, yaxşı şəraitdə işləyəsiniz və bu gözəl bina da həmin məqsədlə tikilməyə başlayır. Mənə verilən məlumata görə, iki il vaxt nəzərdə tutulubdur. Əminəm ki, bu müddət ərzində gözəl, müasir, dünya standartlarına tam cavab verən bina tikilib istifadəyə veriləcəkdir.
Bu gözəl hadisə münasibətilə sizi bir daha təbrik edirəm, sizə cansağlığı, uğurlar arzulayıram. Sağ olun.
Dövlətimizin başçısının nitqi diqqətlə dinlənildi və alqışlarla qarşılandı.
X X X
Prezident İlham Əliyev sonra tibb işçiləri ilə görüşüb söhbət etdi, onlarla xatirə şəkli çəkdirdi.
Mərkəzin əməkdaşları respublikamızın rəhbərinə dərin təşəkkürlərini bildirdilər.
Bölmənin digər xəbərləri
