Əziz bacılar və qardaşlar!

Əziz ağsulular!

Sizi ürəkdən salamlayıram. Bildiyiniz kimi, mən mütəmadi qaydada bölgələrə səfər edir və vəziyyətlə tanış oluram. Dünən və bu gün Ucar və Zərdab rayonlarında olmuşam. Sözün düzü, Ağsuya səfər nəzərdə tutulmurdu. Mən düşünürdüm ki, buraya ayrıca bir səfər edim. Ancaq biz dünən buradan keçəndə fikirləşdim ki, dayanıb sizinlə görüşüm. Amma tələsirdim, Ucar rayonunda tədbirlər var idi. Bu gün isə Bakıya qayıdarkən dedim ki, mən mütləq ağsulularla görüşməliyəm, burada gedən vəziyyətlə tanış olmalıyam və sizə öz ürək sözlərimi deməliyəm.

Mən çox şadam ki, Azərbaycanın bütün bölgələrində, o cümlədən Ağsuda işlər yaxşı gedir. Abadlıq, quruculuq işləri aparılır, yeni binalar tikilir, yollar çəkilir, küçələr abadlaşdırılır, parklar salınır, məktəblər tikilir. Bu, Azərbaycanın inkişafını göstərir. Onu göstərir ki, Azərbaycan hərtərəfli inkişaf edir. Bildiyiniz kimi, bölgələrdə olan vəziyyət, regional inkişaf proqramlarının həyata keçirilməsi çox böyük əhəmiyyət kəsb edir.

Mənim məqsədim odur ki, Azərbaycanın hər bir bölgəsi, təkcə böyük şəhərlər deyil, təkcə paytaxt Bakı deyil, bütün bölgələr, bütün rayonlar inkişaf etsin. Rayonlarda olan səviyyə şəhər səviyyəsinə uyğunlaşsın və beləliklə, kəndlə şəhər arasında fərq azalsın. Bütün inkişaf etmiş ölkələrdə bu mövcuddur və onların inkişafını şərtləndirən amillərdən biri də odur ki, şəhərlə kənd arasında fərq çox azdır. Azərbaycanda da biz buna çalışmalıyıq, buna nail olmalıyıq. Bunu etmək üçün, əlbəttə ki, iqtisadi imkanlar, maliyyə imkanları lazımdır. Biz də bunları yaradırıq. Azərbaycanın düşünülmüş iqtisadi siyasəti var. Bu siyasətin təməli 1990-cı illərin ortalarında ulu öndər Heydər Əliyev tərəfindən qoyulmuşdur və bu gün uğurla davam etdirilir.

Bizim iqtisadi imkanlarımız artır, büdcə gəlirləri artır. Bildiyiniz kimi, uzun illər üzərində işlədiyimiz, Heydər Əliyevin adını daşıyan Bakı-Tbilisi-Ceyhan neft kəməri işə düşübdür və artıq Azərbaycan nefti dünya bazarlarına çıxarılır. Bu, ölkəmizə çox böyük maddi imkanlar açacaq, maliyyə resursları gətirəcək və xalqımız ildən-ilə daha da yaxşı yaşayacaq, Azərbaycanın iqtisadiyyatı daha da möhkəmlənəcəkdir.

İqtisadiyyatı güclü olan dövlətdə bütün problemlər asanlıqla öz həllini tapır. Çünki indi biz bazar iqtisadiyyatı şəraitində yaşayırıq və hər bir ölkənin inkişafını müəyyən edən onun iqtisadi potensialıdır. Biz bunu yaradırıq və Azərbaycanın gələcəyi çox uğurlu, çox parlaq olacaqdır.

Mən bir neçə dəfə bunu demişəm, beynəlxalq maliyyə qurumları Azərbaycanda gedən iqtisadi islahatları çox yüksək qiymətləndirirlər və onların hesablamalarına görə, Azərbaycan növbəti 20 il ərzində 140 milyard dollar vəsait əldə edəcəkdir. Bu, bizə imkan verəcək ki, ölkəmizi müasirləşdirək, yeniləşdirək, yeni iş yerləri açılsın, insanların rifah halı yaxşılaşsın. Beləliklə, Azərbaycan qüdrətli dövlətə çevriləcəkdir.

Ancaq ölkənin inkişafı yalnız iqtisadi amillərlə bağlı deyildir. Ölkədə ictimai-siyasi vəziyyət də müsbət, yaxşı olmalıdır. Bu da Azərbaycanda var. Uzun illər ərzində Azərbaycanda hökm sürən ictimai-siyasi sabitlik, vətəndaş birliyi ölkəmizin inkişafına çox böyük dəstək verir. Biz görürük, bəzi ölkələr var ki, orada daxildə çəkişmələr gedir, ziddiyyətlər mövcuddur. Siyasi qüvvələr bir-biri ilə çəkişir, vuruşur. Nəticədə isə ölkənin inkişafı ləng gedir. Harada ki, sabitlik var, iqtidarla xalq arasında birlik, qarşılıqlı hörmət var, o ölkələrdə inkişaf var. Bunu keçmiş və yaxın tarix göstərir. Bunu bu günün gerçəkliyi, bölgədə, dünyada gedən proseslər əyani şəkildə göstərir. Ona görə, bir tərəfdən, güclü iqtisadiyyat, digər tərəfdən, ictimai proseslərin düzgün istiqamətdə getməsi, demokratikləşmə proseslərinin sürətlənməsi, bölgədəki mövqelərimizin möhkəmlənməsi Azərbaycanın tam müstəqil siyasət aparmasının təminatıdır.

Bütün bu amillər Azərbaycanın uzunmüddətli inkişaf strategiyasını müəyyən edir və deyə bilərəm ki, bütün sahələrdə irəliləyiş göz qabağındadır. Biz çalışmalıyıq ki, Azərbaycanı hərtərəfli inkişaf etdirək. Həm iqtisadi potensial, həm də hərbi potensial möhkəmlənməlidir. Bu istiqamətdə də böyük işlər görülür və bu gün ordumuz qarşıda duran bütün vəzifələri həll etməyə qadirdir. Sosial məsələlərin həlli də yaddan çıxmamalıdır. Biz, iqtidar xalq üçün işləyir, xalq üçün çalışırıq. Ona görə ki, xalqın rifah halının yaxşılaşması bir nömrəli məsələdir. Sosial məsələlər, yəni məktəb, xəstəxana tikintisi, maaşların, pensiyaların artırılması - bütün bunlar bilirsiniz ki, bizim prioritet məsələlərimizdir. Azərbaycanda, demək olar, bütün bölgələrdə, bütün rayonlarda inkişaf var. Haradasa daha da sürətlə gedir, haradasa bir az ləng gedir, amma bu proses artıq geniş vüsət alıbdır. O cümlədən Ağsu rayonunda da gedən işlər bizi çox sevindirir. Burada da proqramlar icra olunur, vəziyyət yaxşılaşır və əminəm ki, gələcək illərdə daha da yaxşı olacaqdır.

Bizim ildən-ilə artan büdcəmiz Azərbaycanda bütün problemlərin həllinə imkan verəcəkdir. Növbəti illərdə biz gərək öz proqramlarımızı dəqiqləşdirək. İki il yarım bundan əvvəl qəbul edilmiş regionların sosial-iqtisadi inkişafı proqramı icra edilir. Proqramda çox önəmli məsələlər öz əksini tapıbdır. Bildiyiniz kimi, son iki il yarım ərzində 400 min yeni iş yeri açılıbdır. Bu, böyük göstəricidir, böyük nailiyyətdir. Ancaq bundan sonrakı mərhələlərdə biz gərək hər bir rayon üzrə xüsusi proqram hazırlayaq və bu məqsədlə müvafiq göstərişlər verilibdir. Orada rayonun bütün problemləri əks olunmalıdır, onun icra mexanizmləri, maliyyə mənbəyi mütləq nəzərdə tutulmalıdır və bu proqram konkret xarakter daşımalıdır.

Bilirsiniz ki, bəzi hallarda proqramlar qəbul edilir, ancaq onlar şüar xarakteri daşıyır, niyyət xarakteri daşıyır. Bu, bizə lazım deyildir. Bizə lazımdır ki, konkret göstərilsin, - harada, nə vaxt nə və necə tikiləcək, yaradılacaq və fəaliyyətə başlayacaqdır. Budur bizim məqsədimiz və bu yolla gedirik.

Sahibkarlığın inkişafına dəstəyi artırırıq, kreditlər verilir, kənd təsərrüfatı texnikası üzrə təchizat yaxşılaşıb və “Aqrolizinq” vasitəsilə bu məsələ öz həllini tapır. Yəni, harada ki, dövlətin dəstəyi lazımdır, biz çalışırıq bütün sahələrdə, kömək göstərək. Şübhəsiz ki, insanların fəal işləri bölgələrdə gedən proseslərə də böyük dəstək, köməkdir. Çünki hər şey mərkəzdən idarə oluna bilməz. Mərkəzdə, Bakıda hökumət, Prezident siyasi qərarları verir, istiqamətləri müəyyən edir, görüləcək tədbirlərin həyata keçirilməsi üçün maliyyə mənbələrini formalaşdırır. Ancaq yerlərdə bu proqramların icra olunması ilə əlaqədar işlər sürətlə getməlidir. Yerlərdəki rəhbərlərdən, onların fəaliyyətindən çox şey asılıdır.

Mən çalışıram ki, bütün bölgələrdəki vəziyyətlə tanış olum. İlk növbədə, problemlərin aşkar olunması üçün. Nailiyyətlər var, uğurlar var, biz bunu bilirik və bilməliyik. Ancaq bütün diqqətimizi bizi narahat edən problemlərə yönəltməliyik. Harada insanları məsələlər narahat edir, harada sosial vəziyyət yaxşı deyil, harada ədalətsizlik hökm sürür, harada insanları incidirlər. Ona görə bu məsələlərə daim diqqət göstərilməlidir. Mənə verilən bütün ərizə və şikayətlərə baxıram, göstərişlər verirəm. Orada əks olunan məsələlərə biz dərhal reaksiya veririk. Ancaq bir şeyi demək istəyirəm ki, son bir il ərzində, birincisi, o ərizə, şikayətlərin sayı azalıb, ikincisi isə, orada qaldırılan məsələlər daha çox şəxsi xarakter daşıyır. Kiminsə maddi yardıma ehtiyacı var, kiminsə müalicəyə ehtiyacı var. Yəni bu da təbiidir. İnsanların, hər bir insanın, hər bir ailənin problemləri var. Amma ümumi problemlər, şikayət xarakterli problemlər kəskin şəkildə aşağı düşübdür. Bu, bir tərəfdən onu göstərir ki, ölkədəki problemlər həll olunur, digər tərəfdən, yerlərdə insanlara münasibət müsbət istiqamətdə dəyişir və belə də olmalıdır.

Mənim yerlərdəki nümayəndələrimdən tələbim də bundan ibarətdir. Xalq sizdən razı olmalıdır. Siz xalq üçün yaşamalı, yaratmalısınız, xalqın qayğıları ilə yaşamalısınız və xalqa xidmət etməlisiniz. Bu bizim hamımızın borcudur və biz bu borcu şərəflə yerinə yetirməliyik.

Mən Bakıya qayıdarkən Ağsuda görüşmək istədim və heç gözləmirdim ki, belə qısa müddət ərzində buraya bu qədər adam yığışacaqdır. Sizə minnətdaram, öz təşəkkürümü bildirirəm, gələcək işlərinizdə uğurlar arzulayıram. Sağ olun.

(Dövlətimizin başçısının nitqi böyük diqqətlə dinlənildi və dəfələrlə sürəkli alqışlarla qarşılandı).

X X X

Azərbaycan Prezidenti İlham Əliyev sonra sakinlərə yaxınlaşaraq görüşüb söhbət etdi, onları narahat edən məsələlərlə maraqlandı, problemlərin həlli ilə bağlı tədbirlərin görüləcəyini bildirdi.