AZƏRBAYCAN PREZİDENTİ İLHAM ƏLİYEVİN NİTQİ
-Bu gün çox gözəl bir gündür. Bu gün biz Bakı şəhərinin çox gözəl yerlərindən birində Ali Məhkəmə binasının təməl daşını qoyduq. Mən əminəm ki, qısa müddət ərzində gözəl bina tikiləcək və beləliklə, Bakıda çox gözəl, əzəmətli ədalət sarayı ucalacaqdır. Bu, çox gözəl haldır və Azərbaycanın ümumi inkişafını göstərir. Ölkəmizdə gedən çox geniş quruculuq, abadlıq işləri, eyni zamanda, inzibati binaların tikintisinə də imkan yaradır. Biz çalışırıq ki, Azərbaycanda, Bakıda bütün binalar zövqlə tikilsin, ən yüksək standartlara cavab versin və gözəl iş şəraiti olsun.
Əlbəttə, Ali Məhkəmənin binasının tikintisi xüsusi əhəmiyyət kəsb edir. Çünki inkişaf etmiş bütün ölkələrdə ali məhkəmələrin binaları çox əzəmətli görkəmdədir. Biz çox istəyirdik ki, Bakıda da belə bir çox gözəl bina tikilsin. Bu binanın layihəsi hazırlananda biz ona birlikdə baxmışıq. Bu gün də burada nümayiş etdirilən görüntülər göstərir ki, bina ən yüksək standartlara cavab verəcəkdir. Burada çox gözəl iş şəraiti yaradılacaq və əlbəttə, binanın tikilməsi məhkəmə işçilərinə çox böyük hədiyyə olacaqdır. Şübhəsiz ki, burada işləmək də çox rahat olacaq və eyni zamanda, bu bina şəhərimizə də əlavə gözəllik verəcəkdir. Bina tikilən zaman ətraf binalara da əl gəzdirmək lazım gələcəkdir. Mən artıq müvafiq göstərişlər verdim. Bütövlükdə bu ərazi ən yüksək müasir standartlara cavab verəcək və şəhərimizə gözəllik verəcəkdir.
Azərbaycanda məhkəmə sisteminin təkmilləşdirilməsi işi sürətlə gedir. Azərbaycan öz dövlət müstəqilliyini bərpa etdikdən sonra ölkədə məhkəmə-hüquq islahatları aparılmağa başlanmışdır. Bu işlər ulu öndər Heydər Əliyevin təşəbbüsü ilə başlanmışdır və bu gün uğurla davam etdirilir. Çünki məhkəmə-hüquq sisteminin təkmilləşməsi hər bir ölkənin inkişafında çox böyük əhəmiyyət kəsb edir. Hətta inkişaf etmiş ölkələrdə də bu proses daim gedir. Yəni, bu prosesin əvvəli var, amma sonu yoxdur.
Ölkəmizdə demokratik, hüquqi dövlət quruculuğu prosesi, təbii ki, məhkəmə-hüquq sisteminin islahatları ilə bərabər aparılmalıdır. Çünki bu amillər bir-birindən çox asılıdır. İndi Azərbaycanda həm siyasi, həm də iqtisadi islahatlar çox uğurla gedir. Ölkəmiz müasirləşir, yeniləşir, dünya birliyinin çox fəal və dəyərli üzvünə çevrilir. Əlbəttə ki, məhkəmə-hüquq islahatları da ölkəmizin ümumi inkişafına öz töhfəsini verməlidir.
Bildiyiniz kimi, Azərbaycanda iqtisadi islahatlar çox sürətlə aparılır, xarici sərmayə qoyulur və bu göstəriciyə görə Azərbaycan bölgədə birinci dövlətdir. Adambaşına düşən xarici sərmayələrin həcmi Azərbaycanda ən yüksək həddədir. Əlbəttə ki, məhkəmə sisteminin müasir olması xarici investorlara daha da böyük inam verir. Adətən, bütün investorlar, ilk növbədə, ölkədə mövcud olan qanunvericilik bazasını öyrənirlər, vergilər sistemini, oradakı vəziyyəti öyrənirlər, eyni zamanda məhkəmə-hüquq sisteminin vəziyyətini öyrənirlər. Bu sahədə hələ böyük islahatlar aparılmalıdır. Çünki hələlik nöqsanlar da kifayət qədərdir. Bölgələrdən gələn müraciətlərdə də, demək olar ki, məhkəmə sistemindəki vəziyyət narahatlıq doğurur. Düzdür, bunun təbii səbəbləri də var. Çünki qəbul edilən məhkəmə qərarları, cəza tədbirləri, təbii ki, bəzi hallarda insanları müraciətlə çıxış etməyə vadar edir. Çünki cəza çəkən insanlar, yaxud da məhkəmədə zərər çəkən insanlar təbii, istəyirlər ki, öz hüquqlarını bərpa etsinlər. Ancaq eyni zamanda, biz gərək bütün müraciətlərə böyük diqqətlə yanaşaq, onları araşdıraq və məhkəmə sistemində olan bütün nöqsanları aradan qaldıraq. Hələ ki, bu nöqsanlar var. Siz də bunları yaxşı bilirsiniz və ictimaiyyət də bunu bilir. Mən ümid edirəm ki, Ali Məhkəmənin yeni rəhbərləri və onlar tərəfindən başlanmış işlər, tədbirlər bu sistemdə ciddi dönüşün yaranmasına imkan yaradacaqdır.
Bildiyiniz kimi, Məhkəmə-Hüquq Şurasının yaradılması da bu istiqamətdə çox mühüm bir addımdır. Ölkəmizin hərtərəfli inkişafı üçün, demokratik, hüquqi dövlətin əsaslarının möhkəmlənməsi üçün məhkəmə-hüquq sisteminin təkmilləşməsi başlıca şərtdir. Bu sahədə əlbəttə ki, çox böyük işlər görülməlidir. Bir tərəfdən, məhkəmələrin maddi-texniki bazası möhkəmlənməlidir. Bu istiqamətdə işlər aparılır, Azərbaycanın müxtəlif bölgələrində yeni binaların tikintisi nəzərdə tutulubdur.
Eyni zamanda, hakim korpusunun peşəkarlığı da artırılmalıdır. Artıq bu işdə şəffaflıq təmin olunur. Hakimlərin seçilməsi prosesi şəffaf keçirilir, hakimlərin sayı artırılır və beləliklə, bütövlükdə məhkəmə sisteminin möhkəmlənməsi prosesi uğurla gedir. Əlbəttə, bu gözəl binanın tikintisi də bu istiqamətdə atılan çox gözəl addımdır. Ümid edirəm ki, bina tezliklə tikilib istifadəyə veriləcəkdir. Bir daha demək istəyirəm ki, bina həm şəhərə gözəllik verəcək, həm də burada iş şəraiti çox yüksək səviyyədə olacaqdır.
Hamı qanun qarşısında bərabər olmalıdır. Bütün qərarlar ədalətli olmalıdır. Ədalətsiz qərar insanların taleyinə təsir edir. Əgər qəbul edilmiş qərar ədalətsizdirsə, insanlar çox böyük əziyyət çəkirlər. Ona görə məhkəmə səhvləri, əlbəttə, hər bir insanın taleyində çox böyük rol oynayır. Biz buna yol verməməliyik. Eyni zamanda, cinayət törətmiş insanlar da məsuliyyətdən yayınmamalıdırlar. Hər bir cinayətin öz cəzası olmalıdır. Bununla bərabər, günahsız insanlar heç vaxt ədalətsiz qərarların qurbanları olmamalıdırlar. Bu, məhkəmə sisteminin əsas prinsipləridir və əminəm ki, Azərbaycanda bu sahədə aparılan işlər və görülən tədbirlər qısa müddət ərzində öz nəticələrini verəcəkdir.
Mən bu gözəl binanın tikintisi ilə əlaqədar sizin hamınızı bir daha ürəkdən təbrik edirəm. Sizə fəaliyyətinizdə uğurlar arzulayıram. Sağ olun.
(Dövlətimizin başçısının nitqi diqqətlə dinlənildi və alqışlarla qarşılandı).
Bölmənin digər xəbərləri
