AZƏRBAYCAN PREZİDENTİ İLHAM ƏLİYEVİN NİTQİ
Sizin hamınızı ürəkdən salamlayıram. Mən bu gün Biləsuvara, sizinlə görüşə gəlmişəm. Biləsuvarda əvvəllər də tez-tez olurdum, biz Gülmalı ilə görüşürdük. Bu gün də gəldim, görüşdük. Burada çox gözəl muzey yaradıldı.
1970-ci illərdə, ondan sonra 1990-cı illərdə Biləsuvarın inkişafında ulu öndər Heydər Əliyevin çox böyük rolu olmuşdur. Rayonun sosial-iqtisadi inkişafı indi yeni mərhələdədir. Çünki Azərbaycanın bütün bölgələrində olduğu kimi, Biləsuvarda da böyük proqramlar həyata keçirilməlidir. Bütövlükdə, Azərbaycanda regionların inkişaf proqramı bizim siyasətimizin əsas istiqamətini təşkil edir. Çünki Azərbaycanın bölgələrinin inkişafı bütövlükdə ölkəmizi də gücləndirəcək və beləliklə, Azərbaycan hərtərəfli inkişaf edəcəkdir.
Biləsuvar rayonunun inkişafı üçün müəyyən işlər görülübdür. Dövlət proqramında bu işlər vardır. Ancaq söz verirəm ki, əlavə tədbirlər planı da hazırlanmalıdır. Mən müvafiq göstəriş verəcəyəm ki, əlavə vəsait ayrılsın və rayonun sosial-iqtisadi inkişafı üçün daha da gözəl şərait yaradılsın.
Bilirsiniz ki, indi Azərbaycanın iqtisadiyyatı çox sürətlə inkişaf edir. Biz iqtisadi artım sürətinə görə dünyada birinci dövlətik. Əlbəttə ki, imkanlarımız da, büdcəmiz də artır və beləliklə, əlavə imkanlar da yaranır. Mən istəyirəm ki, bu imkanlardan çox səmərəli istifadə olunsun. Bütün rayonlar, rayon mərkəzləri, kəndlər abadlaşsın, yeni binalar tikilsin, iş yerləri açılsın, yollar salınsın. Bütün bunları etmək üçün əlbəttə ki, maddi imkan lazımdır. İndi biz onu da yaradırıq. Bir daha demək istəyirəm ki, mən Bakıda rayonun inkişafına dair əlavə göstərişlər verəcəyəm. Gərək, siz də ayrılacaq vəsaitdən səmərəli istifadə edəsiniz, yollar salınsın, elektrik xətləri çəkilsin, infrastruktur layihələri ilə bağlı və digər məsələlər həll olunsun ki, insanlar daha da yaxşı yaşasınlar. Əsas məqsəd bundan ibarətdir.
İndi Azərbaycanda iş yerlərinin açılması istiqamətində böyük işlər görülübdür. Son iki il ərzində 435 min yeni iş yeri yaradılmışdır. Yollar çəkilir, elektrik stansiyaları tikilir, elektrik enerjisi ilə təminat yaxşılaşır. Ancaq hələlik bütün bu məsələlər birinci mərhələdədir. Mən istəyirəm ki, insanları narahat edən əsas problemlər qısa müddət ərzində öz həllini tapsın. Yəni işsizlik, yoxsulluq aradan qaldırılsın, kənd təsərrüfatı inkişaf etsin. Bilirsiniz ki, kənd təsərrüfatının inkişafı üçün “Aqrolizinq” Səhmdar Cəmiyyəti yaradılmışdır, texnika alınır və bundan sonra da alınacaq, icarəyə veriləcəkdir. Sahibkarlığın inkişafı üçün büdcədə 100 milyon dollar həcmində vəsait var, gələn il daha da artacaqdır. Biz çalışmalıyıq ki, Azərbaycanın bütün bölgələrində sahibkarlıq daha da sürətlə inkişaf etsin. Çünki özəl sektorun inkişafı, ümumiyyətlə, Azərbaycanın hərtərəfli inkişafına xidmət göstərəcəkdir.
Bizim çox gözəl imkanlarımız var. Ulu öndər Heydər Əliyevin təşəbbüsü ilə tikilib istifadəyə verilmiş Bakı-Tbilisi-Ceyhan neft kəməri Azərbaycanın iqtisadi inkişafını təmin edir. Bundan sonra uzun illər ərzində, onilliklər ərzində bu kəmərin fəaliyyətindən ölkəyə çox böyük həcmdə gəlir gələcəkdir. Biz bundan səmərəli istifadə edib bütün bölgələri abadlaşdıracağıq. Bütün bölgələr, o cümlədən Biləsuvar çox gözəl görkəm almalıdır.
Biləsuvar çox qədim ərazidir, qədim yerdir. Onun özünə görə çox gözəl ənənələri, gözəl tarixi var. Ancaq bütün bu gözəl ənənələri saxlamaq şərtilə gərək biz bütün bölgələri, o cümlədən Biləsuvar rayonunu daha da müasirləşdirək. Yeni gözəl binalar tikilməlidir, yollar salınmalıdır, məktəblər, xəstəxanalar olmalıdır və olacaqdır. Bu günə qədər nəzərdə tutulmuş bütün proqramlar icra olunur. Elə məsələ yoxdur ki, biz onu bəyan etmişik, amma həll etməmişik. Proqramlar vaxtlı-vaxtında, cədvəl üzrə, ardıcıllıqla həll olunur. Hər bir rayonun öz proqramı olmalıdır. Biləsuvar üçün də dəqiq tədbirlər planı olmalıdır, yəni burada nə və nə vaxt edilməlidir.
Əsas diqqət, əsas qayğı sosial məsələlərin həllinə yönəldilməlidir ki, insanlar daha da yaxşı yaşasınlar. İnsanları narahat edən əsas problemlər öz həllini tapsın və ədalət tam şəkildə bərqərar olunsun. Sosial ədalət, qayda-qanun olmalıdır ki, insanlar rahat yaşasınlar və beləliklə, Azərbaycan vətəndaşları ildən-ilə öz həyat səviyyəsini daha da yaxşılaşdıra bilsinlər. Dövlət, hökumət öz tərəfindən bütün lazımi tədbirləri görəcək və əminəm ki, qısa müddət ərzində Biləsuvarda daha da böyük işlər görüləcəkdir. Mən bundan sonra da rayona gələcək, vəziyyətlə tanış olacağam. Sizə bir daha söz verirəm ki, rayonun inkişafına çox böyük diqqət verəcəyəm.
Əziz dostlar, sizi bir daha ürəkdən salamlayıram. Sağ olun, sizə uğurlar, cansağlığı arzulayıram.
(Dövlətimizin başçısının nitqi böyük diqqətlə dinlənildi və dəfələrlə sürəkli alqışlarla qarşılandı).
X X X
Sonra Prezident İlham Əliyev sakinlərlə görüşüb səmimi söhbət etdi, onların vəziyyəti, qayğı və problemləri ilə maraqlandı.
Dövlətimizin başçısına dərin minnətdarlıqlarını bildirən sakinlər xalqımızın ümummilli lideri Heydər Əliyevin tarixi xidmətlərini, Biləsuvar rayonuna səfərlərini məmnunluqla xatırlatdılar, rayona göstərilən diqqət və qayğıdan razılıq etdilər.
Bölmənin digər xəbərləri
