- Əziz bacılar və qardaşlar!

Əziz xınalıqlılar!

Sizi ürəkdən salamlayıram və yeni istifadəyə verilmiş yolun açılışı münasibətilə ürəkdən təbrik edirəm.

Xınalıq çox qədim məkandır, Azərbaycanın ən qədim kəndlərindən biridir. Mənə verilən məlumata görə, burada insanlar əsrlər boyu, ən azı, 4 min il bundan əvvəl yaşamışlar. Çox ağır, çətin şəraitdə, bu dağlarda, soyuqda yaşamışlar.

Əlbəttə ki, bu kəndin gələcək inkişafı üçün mütləq və mütləq buraya yol çəkilməli idi. Mən keçən il Qubada olarkən maraqlandım ki, bizim ən qədim, ən məşhur kəndlərimizdən biri olan Xınalığa yol var, ya yox? Dedilər ki, çox bərbad vəziyyətdədir. Beş saata, altı saata getmək mümkün deyildir. Bu, böyük əziyyətdir. Ona görə dərhal Nəqliyyat Nazirliyinə göstəriş verdim ki, layihə hazırlasınlar və buraya yeni yolun çəkilişi üçün müvafiq işləri görsünlər. Bu da çox böyük qəhrəmanlıq tələb edən bir məsələdir. Bu kəndə yol çəkmək çox böyük hadisədir və onu göstərir ki, Azərbaycanın indi imkanları elədir ki, istənilən məsələ öz həllini tapa bilər. Çünki əgər Xınalığa yol çəkə biliriksə, deməli, daha bizim qarşımızda heç bir maneə ola bilməz. Cəmi 4 ay ərzində gözəl yol çəkilib, mən bu yolu gəlmişəm, maşını özüm sürmüşəm, özü də çox rahat gəlmişəm. Bu, hələ işin birinci mərhələsidir. Hələ əlavə yol örtüyü də salınacaq, lap şüşə kimi yol olacaq və insanlar bundan sonra rahat gəlib-gedəcəklər. Eyni zamanda, rayon mərkəzi ilə daim əlaqə saxlanılacaqdır. Bundan başqa, buraya turistlər gələcək, inkişaf olacaqdır. Yol olmayan yerdə inkişaf ola bilməz. Siz, demək olar ki, ilin əksər hissəsini təcrid olunmuş vəziyyətdə yaşayırsınız. 8-9 ay ərzində buraya gəliş-gediş mümkün deyildir. Ona görə əlbəttə ki, burada böyük çətinliklər var.

Bu yolun çəkilişi birinci addımdır. Bundan sonra başqa işlər də görüləcəkdir. Mən göstəriş verəcəyəm ki, sizin toxunduğunuz məsələlər də həll olunsun. Elə məsələlər var ki, yerli icra hakimiyyəti orqanları həll edə bilər, elələri də var ki, onları mərkəzi icra orqanları həll etməlidir. Burada telefon rabitəsi üçün, qurğuların quraşdırılması üçün göstəriş verəcəyəm. Təhsil Nazirliyinə göstəriş veriləcək ki, yeni, gözəl məktəb tikilsin. Su probleminin həlli üçün “Azərsu” Səhmdar Cəmiyyətinə göstəriş verəcəyəm. Yenə deyirəm, Azərbaycan indi elə sürətlə inkişaf edir, iqtisadi potensialını elə möhkəmləndirir ki, istənilən məsələ öz həllini tapa bilər. Mənim əsas məqsədim ondan ibarətdir ki, Azərbaycanın bütün yerlərində yaşayan insanlar bu gözəl imkanlardan bəhrələnə bilsinlər. Ən ucqar kənddə yaşayanlar ən müasir şəraitlə təmin olunmalıdırlar. Çünki Azərbaycan inkişaf edir, müasirləşir, bizim iqtisadiyyatımız çox uğurla inkişaf edir. Əgər iqtisadiyyat inkişaf etməsəydi, bu yolu çəkmək mümkün deyildi. Bu yolun çəkilişinə 14 milyon yeni manat xərclənibdir. Böyük puldur. Bunu haradan götürmüşük? Büdcəmiz artır. Bizim iqtisadi siyasətimiz uğurludur, iqtisadi islahatlar sürətlə aparılır və əlavə imkanlar yaranır. Demək, pul olan halda, texnika da olacaqdır. Əgər texnika olmasaydı, nə qədər pulun olsa da, yolu çəkmək mümkün deyildir. Texnika alınıbdır, bütün işlər yüksək səviyyədə, dünya səviyyəsində görülübdür. Mənim də istəyim budur ki, bütün işlər ən yüksək səviyyədə görülsün. Azərbaycan xalqı buna layiqdir. Biz indi bölgədə ən qabaqcıl ölkəyə çevrilirik, daha doğrusu, çevrilmişik. İqtisadi artım baxımından dünyada birinci yerdəyik. Sosial məsələlər öz həllini tapır, maaşlar, pensiyalar qaldırılır. Bu yaxınlarda pensiyalar, müəllimlərin maaşları qaldırılıbdır. Ondan əvvəl səhiyyə işçilərinin maaşları artırılıbdır. Yanvarın 1-dən minimum əmək haqqı qaldırılacaqdır. Yəni bütün bunlar onun üçündür ki, insanlar daha da yaxşı yaşasınlar. Bir tərəfdən, sosial təminat yaxşılaşır, digər tərəfdən, infrastruktur layihələri həyata keçirilir. İndi Azərbaycanda yol tikintisi çox geniş vüsət alıbdır. Bütün ucqar kəndlərə yollar çəkilibdir. Əlbəttə, magistral yollar da çəkilir. Bu da lazımdır. Azərbaycanı dünyaya, başqa qonşu ölkələrlə birləşdirən magistral yollar çəkilir. Məsələn, indi Bakı-Quba avtomobil yolu tikilir. Mən dünən axşam buraya gələndə gördüm ki, işlər başlayıbdır. Düz Rusiya sərhədinə qədər uzanacaq, yəni Bakıdan buraya gəlmək çox rahat olacaqdır. İndi Qubadan Xınalığa gəlmək adama ləzzət verir: gözəl mənzərə, gözəl dağlar, çaylar, bulaqlar, şəlalələr. Mən indi gələrkən bir neçə yerdə maşını saxlayaraq düşur, bu mənzərəyə tamaşa edirdim. Adam özünü çox yaxşı hiss edir. Mən bu gün özümü xüsusilə çox yaxşı hiss edirəm. Çünki mənim göstərişimlə bu yol çəkildi və bütün Xınalıq camaatına sevinc gətirdi.

Prezident nə vaxt sevinir? O vaxt sevinir ki, onun xalqı sevinir, insanların üzü gülür. O vaxt sevinir ki, inkişaf var, yenilik var. Bax, bu gün bunlar var. Azərbaycanın bütün yerlərində, o cümlədən burada, ən qədim kənddə, Qafqazın ən yüksək zirvəsində yerləşən kənddə. Siz 2300 metr yüksəklikdə yerləşirsiniz. Bəlkə bir 2-3 kənd var ki, sizdən hündürdədir. Ən qədim, ən ucqar, ən əlçatmaz kəndlərdəndir. Xınalıqlılar ən qədim tarixə malikdirlər. Siz deyirsiniz 5 min il tarixi var, ola bilər. Amma 4 min il dəqiqdir.

Bu illər, bu əsrlər ərzində xınalıqlılar öz xüsusiyyətlərini saxlamışlar, öz dilini saxlamışlar. Xınalıq dili dünyada mövcud olan dillərdən, bəlkə də, ən qədimidir. Mən bunları bilirəm. Bu onu göstərir ki, Azərbaycan nə qədər zəngin ölkədir: həm təbii ehtiyatlar, həm gözəl təbiət, həm də insanların - millətlərin, etnik qrupların müxtəlifliyi. Biz Azərbaycanda bir ailə kimi yaşayırıq. Harada belə vəziyyət var? Biz indi görürük, başqa yerlərdə, əksinə, insanların arasında bəzən süni şəkildə, başqa səbəblərdən narazılıqlar, qarşıdurma yaranır, hansısa ayrı-seçkilik olur. Azərbaycanda bunlar yoxdur. Hər bir Azərbaycan vətəndaşı mənim qardaşımdır. Kənddə yaşayan hər bir vətəndaş mənim üçün əzizdir. Mən prezident seçiləndə demişəm ki, çalışacağam, hər bir Azərbaycan vətəndaşı üçün prezident olum. Hər bir Azərbaycan vətəndaşının prezidenti olum ki, hər bir Azərbaycan vətəndaşı öz gündəlik həyatında bu dəyişiklikləri görsün. Artıq mən üç ildir bu vəzifədəyəm. Bu barədə çox danışmaq istəmirəm, amma üç ildə işlər görülübdür.

Bu gözəl gündə sizinlə bərabər olmaq mənim üçün çox xoşdur. Mən sizi bir daha ürəkdən salamlayıram, əminəm ki, bu yol çəkiləndən sonra kəndin yeni dövrü başlanacaqdır. Bu kənd əbədi yaşayacaq, xınalıqlılar əbədi yaşayacaqlar və doğma Azərbaycanımızın inkişafına, çiçəklənməsinə öz töhfələrini verəcəklər. Bir daha sizi salamlayıram, yolun istifadəyə verilməsi münasibətilə təbrik edirəm.

(Dövlətimizin başçısının nitqi diqqətlə dinlənildi və dəfələrlə alqışlarla qarşılandı).

X X X

Görüşdən yadigar olaraq Prezident İlham Əliyevə Xınalıq kəndində toxunmuş xalça hədiyyə edildi.

Dövlətimizin başçısı xanımı ilə birlikdə kəndin bir neçə sakininin evinə gedərək, onların qonağı oldu, yaşayış şəraitləri ilə tanış oldu.

Sakinlər bir daha Prezident İlham Əliyevə ən xoş arzu və niyyətlərini bildirdilər.

X X X

Azərbaycan Prezidenti Xınalıq kənd orta məktəbinə də baş çəkdi, ayrı-ayrı sinif otaqlarına baxdı, şəraitlə yaxından tanış oldu.

Bildirildi ki, 300 nəfərin təhsil aldığı məktəb binasının vəziyyəti qənaətbəxş deyil, müvəqqəti sinif otaqları tikilsə də, tələbatı ödəmir. Ona görə də yeni məktəb binasına ehtiyac duyulur. Dövlətimizin başçısı burada yeni müasir məktəb binasının tikilməsi üçün Təhsil Nazirliyinə göstəriş veriləcəyini söylədi, şagirdlərin yaxşı təhsil alması üçün hər cür şəraitin yaradılacağını vurğuladı.