AZƏRBAYCAN PREZİDENTİ İLHAM ƏLİYEVİN NİTQİ
Əziz dostlar!
Çox mehribancasına qəbula görə, qonaqpərvərliyə görə, nümayəndə heyətimizin bütün üzvlərinə belə səmimi, xoş münasibətə görə bir daha təşəkkür etmək istərdim. Biz bunu qardaş Belarus torpağında olduğumuz ilk andan hiss etdik. Bütün bugünkü günü qarşılıqlı anlaşma, dostluq və yüksək səviyyəli əməkdaşlıq şəraitində keçirdik.
Bu, Azərbaycan Prezidentinin Belarusa ilk rəsmi səfəridir və biz buna çox böyük əhəmiyyət veririk. Bu gün inamla demək olar ki, səfər və onun nəticələri çox uğurludur. Birinci gün olduqca zəngin idi. Biz Aleksandr Qriqoryeviçlə təkbətək, sonra nümayəndə heyətləri üzvlərinin iştirakı ilə geniş tərkibdə görüşdə çox açıq, ətraflı söhbət etdik. İkitərəfli inkişafla, regional əməkdaşlıqla, beynəlxalq münasibətlərlə bağlı məsələlərin kifayət qədər geniş dairəsini müzakirə etdik. İnkişafın, qarşılıqlı fəaliyyətin, Belarusla Azərbaycan arasında yaxın və uzaq perspektiv üçün əməkdaşlığın əsas yollarını müəyyən etdik, mühüm sənədlər imzaladıq. Zənnimcə, ən başlıcası budur ki, nümayəndə heyətimizin üzvləri və belaruslu həmkarlar dostlaşdılar. Bu, çox vacibdir. Axı, dövlətlərarası münasibətlər həm də insanlar arasında olan münasibətlər deməkdir. Aleksandr Qriqoryeviçlə bizim aramızda çox səmimi münasibətlər yarandı. Biz bu münasibətləri çox qiymətləndiririk. İndiki səfər bu münasibətləri daha da möhkəmlətdi. Bu münasibətlərin bütün səviyyələrdə çox səmimi, mehriban xarakter daşıması son dərəcə vacibdir.
Bu gün mən və əminəm ki, nümayəndə heyətinin bütün üzvləri müstəqillik əldə olunduğu vaxtdan bəri, bu 15 ildə Belarusun qazandığı nailiyyətlərindən aldığımız böyük təəssüratın altındayıq. Biz dinamik inkişaf edən ölkə gördük, Belarusun çox böyük intellektual, sənaye, iqtisadi potensiala malik olduğunu gördük. Ölkənizdə baş verən hadisələr, iqtisadi inkişafın sürəti barədə mənim məlumatım vardı. Lakin bu gün biz Minskin necə inkişaf etdiyini gördük, ölkənizdə necə müasir, yüksək texnologiyalara əsaslanan istehsalatın olduğunu gördük. Bu istehsalatlar və onların bugünkü səviyyəsi, inkişafı isə Belarus xalqının intellektual yaradıcılığının bəhrəsidir. Həmin istehsalatların bir qismi sovet dövründə də fəaliyyət göstərirdi, lakin sovet dövründə onlar bu gün nail olduqları potensiala malik deyildi. İndi onlar, dünya səviyyəli məhsul buraxır ki, bunu da Aleksandr Qriqoryeviçin rəhbərliyi ilə Belarus xalqı təmin etmişdir.
Dövlətin, xüsusən də, qısa dövr ərzində və kifayət qədər çətin zaman kəsiyində formalaşmış gənc dövlətin inkişafı rəhbərin işinin nəticəsidir. Bu gün Belarusda gördüklərimiz Aleksandr Qriqoryeviç Lukaşenkonun çox böyük fəaliyyətinin – təşkilatçılıq, yaradıcılıq fəaliyyətinin, öz xalqına, öz dövlətinə sadiqliyinin, öz ölkəsini inkişaf etdirmək və onu tərəqqi yolu ilə aparmaq əzminin nəticəsidir. Bu, çox sevindiricidir. Düşünürəm ki, ölkələrimizin nümayəndələri arasında əlaqələr nə qədər çox olarsa, müxtəlif layihələr də bir o qədər çox olacaqdır.
Biz həmin layihələri artıq bu gün müəyyən etdik. Onların bir qismi mənim səfərimdən əvvəl müəyyən edilmişdi və artıq qısa müddətdə uğurla həyata keçirilir. Bu gün biz məsələləri müzakirə edərkən tam yekdil fikirdə olduq ki, bu əlaqələri intensivləşdirmək lazımdır, münasibətlərin inkişafına güclü təkan, dinamizm vermək lazımdır. Biz yekdil fikirdə və bu qənaətdəyik ki, qarşıya qoyulmuş vəzifələr qısa müddətdə, çox səmərəli şəkildə, yüksək səviyyədə yerinə yetirilməlidir.
Mən münasibətlərimizin gələcəyinə böyük nikbinliklə baxıram. Əminəm ki, Aleksandr Qriqoryeviç Lukaşenkonun Azərbaycana gələn il üçün nəzərdə tutulan səfərinədək bugünkü razılaşmaların nəticələrinin həyata keçirilməsi sahəsində əməli iş görüləcək, ölkələrimiz gələcəyə doğru birlikdə irəliləyəcəklər.
Belarusun, formalaşmış müstəqil dövlətin uğurlarını bir daha qeyd etmək, Prezident Aleksandr Qriqoryeviçə ən xoş diləklərimi bildirmək bütün Belarus xalqına xoşbəxtlik, cansağlığı, firavanlıq və tərəqqi arzulamaq istərdim.
Bölmənin digər xəbərləri
