AZƏRBAYCAN PREZİDENTİ İLHAM ƏLİYEVİN NİTQİ
-Hörmətli cənab Prezident!Hörmətli Birinci xanım!
Xanımlar və cənablar!
Gözəl ölkənizə səfərim zamanı mənə və nümayəndə heyətimə göstərdiyiniz səmimi qonaqpərvərliyə görə öz minnətdarlığımı bildirmək istəyirəm.
Bu gün apardığımız danışıqlar çox səmərəli olmuş, ikitərəfli münasibətlərin bütün aspektlərini əhatə etmişdir. İmzaladığımız sənədlər gələcək siyasi və iqtisadi əməkdaşlığı əvvəlcədən müəyyən edir və biz bu əməkdaşlığımıza böyük nikbinlik hissi ilə baxırıq. Koreya Respublikasının Prezidenti ötən ilin may ayında Azərbaycana rəsmi səfər etdikdən sonra münasibətlərimizdə yeni mərhələ başlandı. Mənim hazırkı səfərim isə, təqribən bir il bundan əvvəl formalaşmış güclü dialoq və tərəfdaşlığın davamıdır.
Bir ildən az müddət ərzində biz ikitərəfli əlaqələrimizdə çox nailiyyətlər əldə etdik. Cənubi Koreyanın Azərbaycandakı səfirliyi və Azərbaycanın ölkənizdəki səfirliyi artıq fəaliyyət göstərir. Biz olduqca güclü iqtisadi əməkdaşlıq ərəfəsindəyik.
Ölkənizlə münasibətlərimiz bizim üçün çox vacibdir. Biz istəyirik ki, Cənubi Koreya şirkətləri ölkəmizə yeni texnologiyalar gətirsinlər. Biz onların özümüzün güclü tərəfdaşlarına, sərmayədarlara və podratçılara çevrilməsini arzulayırıq. Əminəm ki, biz yaxın zamanlarda bunun şahidi olacağıq.
Cənubi Koreya müstəqillik qazandığı vaxtdan etibarən böyük nailiyyətlər əldə edibdir. Yoxsulluq içərisində olarkən ölkəniz güclü iqtisadiyyat qurmaqda israrlı idi və bu gün Cənubi Koreya dünyanın ən inkişaf etmiş ölkələrindən biridir.
1991-ci ildə müstəqilliyini qazanan Azərbaycanın vəziyyəti Cənubi Koreyanın ilk müstəqillik illərində üzləşdiyi vəziyyətə bənzəyirdi. Lakin güclü siyasi və iqtisadi islahatlar siyasəti sayəsində və Azərbaycan xalqının göstərdiyi səylər nəticəsində biz siyasi və iqtisadi inkişaf sahəsində qısa müddət ərzində böyük uğurlar qazana bildik.
Artıq növbəti, üçüncü ildir ki, Azərbaycan ümumi daxili məhsulun artımına görə dünyada birinci yeri tutur. Bu gün bizim əsas məqsədimiz infrastrukturumuzu müasirləşdirmək, şaxələndirilmiş güclü iqtisadiyyat yaratmaq və xalqın həyat tərzini yaxşılaşdırmaqdan ibarətdir. Ona görə də biz həmin məqsədlərə nail olmaqda Cənubi Koreya rəsmiləri və şirkətləri ilə əməkdaşlıq etməkdə çox maraqlıyıq.
Eyni zamanda, Azərbaycan böyük neft və qaz ehtiyatlarına malik olan ölkədir. Bizim Cənubi Koreya ilə enerji məsələləri üzrə apardığımız əməkdaşlıq çox fəaldır. Əlbəttə ki, Azərbaycan da Koreya şirkətləri üçün maraqlı ölkədir və bu gün biz bu istiqamətdə artıq ilk praktik addımları görürük. Bu o deməkdir ki, biz birgə səylərlə ölkələrimizin iqtisadi inkişafına və enerji təhlükəsizliyinə töhfə verə bilərik.
Eyni zamanda, biz Ermənistan-Azərbaycan, Dağlıq Qarabağ münaqişəsinin həlli məsələsində Cənubi Koreya rəhbərliyinin tutduğu ədalətli mövqeyə görə minnətdarıq. Bu münaqişə yalnız beynəlxalq hüququn normaları və prinsipləri, o cümlədən Azərbaycanın ərazi bütövlüyü prinsipi çərçivəsində həll oluna bilər. Ermənistan tərəfindən Azərbaycan torpaqlarının 20 faizinin işğalı azərbaycanlılara qarşı aparılmış etnik təmizləmə siyasəti ilə müşayiət olunmuşdur. Bunun nəticəsində bir milyon soydaşımız qaçqın və məcburi köçkün vəziyyətinə düşmüşdür.
Ermənistan qüvvələrinin Azərbaycan torpaqlarından dərhal və qeyd-şərtsiz çıxarılmasını tələb edən Birləşmiş Millətlər Təşkilatının Təhlükəsizlik Şurasının 4 qətnaməsi Ermənistanın qeyri-konstruktiv mövqeyi nəticəsində yerinə yetirilməyibdir. Bütün beynəlxalq ictimaiyyət Dağlıq Qarabağ da daxil olmaqla, Azərbaycanın ərazi bütövlüyünə hörmətlə yanaşır. Əminəm ki, bu məsələnin yeganə həll yolu beynəlxalq hüququn normaları və prinsiplərinə tam əməl etməkdən və Ermənistanın işğalçı qüvvələrinin torpaqlarımızdan çıxarılmasından ibarətdir. Əminəm ki, bu, belə də olacaqdır.
Gördüyünüz kimi, Cənubi Koreya ilə bizim əməkdaşlığımız çox genişdir və o, siyasi, iqtisadi və habelə mədəni aspektləri əhatə edir. Azərbaycandakı universitetdə Koreya dili, tarixi və mədəniyyəti tədris edilir və biz bunu görməkdən çox məmnunuq.
Mən göstərilmiş qonaqpərvərliyinə və gözəl ölkənizə səfər etməyə dəvətinə görə koreyalı ev sahiblərinə bir daha öz minnətdarlığımı bildirmək istəyir, Koreya xalqına rifah və uğurlar arzulayıram.
Mən badəmi Koreya Respublikasının Prezidentinin, Birinci xanımının şərəfinə və dost Koreya xalqının şərəfinə qaldırmaq istəyirəm.
X X X
Sonra incəsənət ustalarının konserti oldu.
Bölmənin digər xəbərləri
