AZƏRBAYCAN PREZİDENTİ İLHAM ƏLİYEVİN NİTQİ
-Hörmətli xanımlar və cənablar!
Əziz dostlar!
Bu gün mənim ölkənizə rəsmi səfərimin ikinci günüdür. Dünən Koreya Respublikasının Prezidenti ilə olduqca səmərəli və konstruktiv müzakirələrimiz oldu. Nümayəndə heyətimizin üzvləri də öz həmkarları ilə görüşmüşlər. Əməkdaşlığımızın bütün sahələrini əhatə edən bir çox sənədlər imzalanmışdır. Bütün bunlar ölkələrimiz arasında tərəfdaşlığın qurulmasına və əlaqələrimizdə yeni mərhələnin başlanmasına hər iki tərəfin çox böyük marağının olmasından irəli gəlir.
Azərbaycan gənc müstəqil ölkədir. Müstəqilliyimizi cəmi 15 il bundan əvvəl qazanmışıq. Bir sistemdən digər sistemə keçid dövrü asan olmamışdır, lakin biz bütün əsas çətinliklərin aradan qaldırılmasına nail ola bildik. Bu gün isə Azərbaycan öz iqtisadiyyatını sürətlə inkişaf etdirən ölkədir. İqtisadi artım göstəricisinə görə, artıq üçüncü ildir ki, Azərbaycan dünyada birinci yeri tutur. Əminəm ki, gələn illər ərzində bu meyil davam edəcəkdir.
Hazırda biz öz infrastrukturumuzu təkmilləşdiririk və bazar prinsipinə əsaslanan müasir iqtisadiyyatın qurulması məqsədi ilə müxtəlif layihələr həyata keçiririk ki, ölkə əhalisinin həyat tərzi daha da yaxşılaşsın. Bu, artıq baş verir. Biz bunları xalqın gündəlik həyatında, artan iqtisadiyyatda və həyata keçirdiyimiz çoxmilyardlıq layihələrdə görürük.
Bu gün Azərbaycan ilə Cənubi Koreyanın biznes dairələri arasında görüş keçirilmişdir və əminəm ki, bunun çox mühüm və praktik nəticələri olacaqdır. Ötən il Koreya Respublikasının Prezidenti Azərbaycana səfər etdiyi zaman biz müxtəlif sənədlər imzaladıq. Dünən isə biz bir daha imzalanma mərasimi keçirdik. Əminəm ki, bu sənədlər yaxın zamanlarda nəticə verəcəkdir. Biz bu gün həmin sazişlərin praktik nəticələrini görürük. Şirkətlərimiz əməkdaşlıq etməyə başlayır. Hökumət və nazirliklərin rəsmiləri qarşılıqlı səfərlər edirlər. Birgə əməkdaşlığın qurulması üçün olduqca böyük planlar var.
Koreya Respublikası çox qısa tarixi dövr ərzində güclü iqtisadiyyatı qurmağa nail oldu. Ölkəniz yoxsulluqdan rifaha doğru irəlilədi. Bu, sizin bir neçə onilliklər bundan əvvəl çəkdiyiniz eyni əziyyətləri çəkən ölkələr üçün yaxşı nümunədir. Hazırda siz bizə lazım olan müasir texnologiyalara maliksiniz. Bizim isə təbii sərvətlərimiz var ki, sizin üçün cəlbedici ola bilər. Ona görə də həmin amillərin bir-biri ilə uzlaşması ikitərəfli münasibətlərimizin çox yaxşı elementidir. Bizim olduqca güclü siyasi əlaqələrimiz var. Bir-birimizi beynəlxalq təşkilatlar çərçivəsində dəstəkləyirik. Cənubi Koreya hökuməti Ermənistan-Azərbaycan, Dağlıq Qarabağ müaqişəsinin beynəlxalq hüququn normaları və Azərbaycanın ərazi bütövlüyü əsasında həllində ölkəmizi hər zaman dəstəkləyibdir.
Biz çox qısa müddət ərzində səfirliklərimizi açdıq və hazırda tərəfdaşlığımızın və əməkdaşlığımızın davam etdirilməsi üçün bütün əsaslar var. Hazırda biz Azərbaycanda iqtisadiyyatın şaxələndirilməsinə, güclü qeyri-neft sektorunun formalaşmasına, informasiya texnologiyalarının, infrastrukturun və nəqliyyat yollarının inkişafına, təhsil sahəsinə diqqət yetiririk. Ümid edirik ki, əməkdaşlığımız çox səmərəli ola bilər.
Əlbəttə ki, enerji sektoru gələcək onilliklər ərzində Azərbaycan iqtisadiyyatının əsas hissəsini təşkil edəcəkdir. Həyata keçirdiyimiz çoxmilyardlıq layihələr Azərbaycanda iqtisadiyyatın ümumi inkişafına birmənalı şəkildə təkan verəcəkdir. Biz bu sektorda mühüm tarixi nailiyyət əldə etdik. Azərbaycanın nefti və qazını Avropa və dünya bazarlarına çıxaran boru kəmərləri artıq mövcuddur. Gələcək illərdə biz dünyada neft və qaz hasil edən ən mühüm ölkələrdən birinə çevriləcəyik.
Bütün bunlar ölkəmizdə tamamilə yeni vəziyyət yaradır. Biz bu inkişafın bəhrəsini görəcəyik, daha çox maliyyə vəsaitləri toplayacağıq. Həmin vəsaitləri ölkənin rifahı üçün istifadə etməyi planlaşdırırıq. Onları iqtisadiyyatın və infrastrukturun müasirləşdirilməsi, o cümlədən qabaqcıl texnologiyaların Azərbaycana gətirilməsi və nəhayət, güclü iqtisadiyyatın qurulması üçün istifadə edəcəyik. Bunu etməyi çox arzulayırıq. Cənubi Koreyada isə həmin mühüm xidmətləri göstərə biləcək və yaxşı nüfuza malik olan peşəkar şirkətləriniz var. Bəlkə, hazırkı qarşılıqlı marağın da səbəbi məhz budur.
Şəxsən mən çox məmnunam ki, Cənubi Koreya şirkətləri Azərbaycanda bizneslə məşğul olmaqda çox maraqlıdır. Onlar çox fəaldır. Biz Azərbaycanda nəqliyyat və yol hərəkəti sisteminin idarə edilməsi və tikinti sahəsində həyata keçiriləcək müxtəlif özəl və hökumət layihələri üzərində artıq işləyirik. Bir sözlə, bütün bunlar olduqca qısa müddət ərzində özünü büruzə vermiş əməkdaşlığın çox vacib meyarlarıdır. Mən bir daha bildirmək istəyirəm ki, müstəqillik qazandıqdan sonra bizim Cənubi Koreya ilə münasibətlərimiz inkişaf etmişdir. Lakin bu, ötən il Koreya Respublikası Prezidentinin Azərbaycana səfərinə qədər belə fəal olmamışdır.
Hər halda, əməkdaşlığımız üçün yaxşı gündəlik mövcuddur. İmzalanmış sənədlər iqtisadi əməkdaşlığın bütün aspektlərini əhatə edir. Yaxşı tərəfdaşlıq iradəsi var. Adət-ənənələr və yaşlılara hörmətcil münasibət, mədəniyyət və tariximizin qorunması baxımından xalqlarımız arasında çox oxşarlıqlar mövcuddur. Bütün bunlar əməkdaşlığın çox vacib elementləridir. Təbii ki, biznes maraqları əsas yer tutur, lakin insanlar arasında ünsiyyət də vacibdir.
Azərbaycanın Cənubi Koreyada bu səviyyədə təqdim olunması tərəfdaşlığın yaxşı göstəricisidir. Əminəm və şübhə etmirəm ki, çox qısa müddət ərzində biz iqtisadi əməkdaşlığımızın praktik nəticələrini görəcəyik. Bunun üçün bizim arzumuz var. Diqqət mərkəzində olacaq prioritetləri artıq müəyyən etmişik. Bir neçə layihəyə başlamaqla, digər layihələr də irəli sürüləcəkdir. Ölkələrimiz bir-birinə daha yaxın olacaq və bizim hamımız bundan bəhrələnəcəyik.
Azərbaycanda olduqca əlverişli sərmayə mühiti var. Biz adambaşına düşən birbaşa xarici sərmayələrin həcminə görə regionda aparıcı ölkəyik. Bizim ölkədə xarici sərmayələrin qorunması üçün münasib sistem qurulubdur. Xarici şirkətlərlə işləməkdə artıq böyük təcrübə qazanmışıq. Misal üçün, enerji sektorunda dünyanın bütün əsas şirkətləri bizim tərəfdaşlarımızdır. Azərbaycanda biznesin aparılması faydalıdır, çünki vəziyyəti proqnozlaşdırmaq olar. Siyasi vəziyyət sabitdir. Hökumət yerli sahibkarlığa diqqətlə yanaşır və onu dəstəkləyir və xarici şirkətlərlə də əməkdaşlığa açıqdır. Ona görə hesab edirəm ki, bizimlə işləyəcək Cənubi Koreya şirkətləri peşman olmayacaqlar. Mən artıq qeyd etdim ki, çox yaxın vaxtlarda biz əməkdaşlığımızın praktik nəticələrini görəcəyik.
Çox şadam ki, bugünkü forumda biznes dairələrinin nümayəndələri müxtəlif təklifləri müzakirə edirlər. Eyni zamanda, bu gün Azərbaycanın iqtisadi inkişafı və müxtəlif sektorlardakı imkanları nümayiş etdirilmişdir. Əminəm ki, yaxın zamanlarda hazırkı görüşün yaxşı nəticələrini görəcəyik.
Mən bir daha demək istəyirəm ki, ölkələrimiz arasındakı münasibətlər bizim üçün çox vacibdir və burada özümüzü çox rahat hiss edirik. Koreya torpağına qədəm qoyduğumuz andan etibarən bizə göstərdiyiniz səmimi qonaqpərvərliyi duyduq. Biz də Koreya xalqına eyni hisslərlə yanaşırıq.
Mən əməkdaşlığımıza verdiyiniz töhfəyə görə bir daha sizə minnətdaram və hamınıza uğurlar və rifah arzulayır, bu badəni Koreya xalqının şərəfinə qaldırıram.
Sağ olun.
Bölmənin digər xəbərləri
