AZƏRBAYCAN PREZİDENTİ İLHAM ƏLİYEVİN NİTQİ
-Hörmətli cənab Prezident!
Hörmətli xanım Alma Adamkiene!
Xanımlar və cənablar!
İlk növbədə, cənab Prezident, məni ölkənizə rəsmi səfərə dəvət etdiyinizə görə Sizə təşəkkür edirik. Litva torpağında mənə və nümayəndə heyətinə göstərdiyiniz səmimi qonaqpərvərliyə görə dərin minnətdarlığımı bildirmək istəyirəm.
Bu, son bir il ərzində bizim dördüncü görüşümüzdür. Azərbaycana
2006-cı ildə rəsmi səfərinizdən sonra 2007-ci ildə Krakov enerji sammiti çərçivəsində və Bakıda GUAM ölkələri dövlət başçılarının sammiti zamanı görüşmüşük. İndi isə mənim Litva Respublikasına ilk rəsmi səfərimdir.
Litva və Azərbaycan xalqları arasındakı əlaqələr sabit və genişdir. Ötən əsrin əvvəllərində Bakıda yaşayan litvalılar Azərbaycanın ictimai həyatında fəal rol oynamışlar. Litva ədəbiyyatının klassiki, Azərbaycanda dərc olunmuş əsərlərin müəllifi Vintsas Kreve-Mitskyaviçyus o dövrdə Bakı Universitetinin professoru olmuş, Azərbaycan Xalq Cümhuriyyətinin quruculuğu işlərində fəal çalışmış və Litvanın Azərbaycandakı ilk konsulu işləmişdir. Həmin dövrdə xalqlarımız arasında ədəbi-mədəni əlaqələr də genişlənmişdir. Azərbaycan xalqının məşhur qəhrəmanlıq dastanı “Kitabi- Dədə Qorqud”, dahi Azərbaycan şairi Nizaminin və digər görkəmli simaların əsərləri Litva dilinə, görkəmli Litva ədiblərinin əsərləri Azərbaycan dilinə tərcümə edilmişdir.
Sovet İttifaqının süqutu ərəfəsində milli azadlıq hərəkatının önündə getmiş Litva və Azərbaycan xalqlarının həmrəyliyi, Bakı və Vilnüs faciələri xalqlarımızın azadlıq mübarizəsinin parlaq qəhrəmanlıq səhifələrindəndir.
Xalqlarımızın yenidən müstəqillik əldə etməsi hər iki ölkə arasında tarixi əlaqələri keyfiyyətcə yeni mərhələyə yüksəltmiş, müntəzəm diplomatik əlaqələr yaradılmış, səfirliklər təsis olunmuş, siyasi-iqtisadi, mədəni və digər sahələrdə əməkdaşlığa dair müqavilə və sazişlər imzalanmışdır.
Məmnuniyyətlə qeyd etmək istəyirəm ki, ölkələrimiz arasındakı ikitərəfli münasibətlərin səviyyəsi yüksəkdir. Ötən il Azərbaycana rəsmi səfəriniz, səfər zamanı apardığımız danışıqlar, imzalanmış sənədlər əlaqələrimizin inkişafı üçün perspektivlər açmışdır.
Ölkələrimiz beynəlxalq terrorizmin, nüvə silahlarının yayılması və digər müasir çağırış və təhlükələrə qarşı mübarizə sahəsində uğurlu əməkdaşlıq edir. Beynəlxalq və regional təşkilatlar, o cümlədən Avropa İttifaqının “Yeni qonşuluq siyasəti” proqramı və NATO-nun “Fərdi tərəfdaşlığın fəaliyyət planı” çərçivəsində sıx əlaqələrimiz məmnunluq doğurur. GUAM-ın Bakı sammitində digər həmkarlarınızla birgə iştirakınız bu təşkilata beynəlxalq dəstəyin təzahürüdür. Bu, Baltik dənizi, Qara dəniz və Xəzər dənizi regionu ölkələrinin Avropaya inteqrasiyasına, eləcə də Avropa İttifaqı ilə Azərbaycan arasında siyasi, iqtisadi, enerji və digər sahələrdə tərəfdaşlıqda mühüm rol oynayacaq və daha geniş məkanda əməkdaşlığımız üçün yeni üfüqlər açacaqdır. Biz Litvanın Avropa İttifaqının enerji siyasətinə həsr olunmuş sammitinə ev sahibliyi etmək niyyətini alqışlayırıq. Əminəm ki, sammitdə Krakovda aparılan səmərəli danışıqların davam etdirilməsi və qarşılıqlı surətdə faydalı əməkdaşlığın yeni yollarının müəyyənləşdirilməsi prosesinə öz töhfəsini verəcəkdir.
Mən Azərbaycanın, eləcə də regionun ən aktual problemlərindən biri olan Ermənistan-Azərbaycan, Dağlıq Qarabağ münaqişəsinin beynəlxalq hüquqi normaları və prinsiplərinə uyğun şəkildə, Azərbaycanın ərazi bütövlüyü çərçivəsində həlli məsələsində Litvanın və cənab Prezident, şəxsən Sizin ədalətli və əsaslandırılmış mövqeyinizi yüksək qiymətləndirirəm.
Cənab Prezident!
İcazə verin, mənə və nümayəndə heyətinə göstərdiyiniz qonaqpərvərliyə görə Sizə bir daha öz minnətdarlığımı bildirim və bu badəni Sizin sağlığınıza, xanımınız Alma Adamkienenin sağlığına, Litva xalqının xoşbəxtliyi və rifahı şərəfinə qaldırım.
Bölmənin digər xəbərləri
