Hörmətli xanımlar və cənablar!

Hörmətli din xadimləri!

Mən sizin hamınızı ürəkdən salamlayıram, bütün qonaqlara Azərbaycana “Xoş gəlmisiniz!” deyirəm.

Bu gün bizim həyatımızda çox əlamətdar və unudulmaz bir gündür. Azərbaycanda katolik kilsəsi açılır və mən bu münasibətlə Azərbaycanda yaşayan bütün katolikləri ürəkdən təbrik edirəm. Bu hadisə onu göstərir ki, Azərbaycanda dinlərarası münasibətlər çox yüksək səviyyədədir. Bu sahədə görülən işlər, tədbirlər Azərbaycanın hərtərəfli inkişafına xidmət göstərir. Çünki hər bir ölkənin normal, uğurlu inkişafı üçün iqtisadi və siyasi uğurlarla bərabər, sülh olmalıdır, əmin-amanlıq, sabitlik olmalıdır, millətlərarası və dinlərarası münasibətlər yaxşı səviyyədə olmalıdır. Biz bütün bunları Azərbaycanda görürük. Azərbaycan xalqı əsrlər boyu bütün başqa xalqlarla mehribanlıq şəraitində yaşamışdır, Azərbaycanda, Azərbaycanın tarixində heç vaxt milli, yaxud da dini zəmində nəinki münaqişə, hətta narazılıq da olmamışdır. Azərbaycanda yaşayan insanlar bütün bunları çox yaxşı bilirlər. Əlbəttə, burada dövlət siyasətinin çox önəmli rolu vardır. Eyni zamanda, Azərbaycanda yaşayan insanların qəlbində olan qardaşlıq, mehribanlıq duyğuları çox mühüm rol oynayır.

Mən Vatikana öz səfərimi də xatırlayıram. 2005-ci ildə Vatikanda olarkən orada keçirilən danışıqlar, müzakirələr bir daha imkan verdi ki, ikitərəfli münasibətlərimizi təhlil edək. Bugünkü tədbirin baş verməsi üçün o vaxt lazımi tədbirlər görülmüşdü. Bakıda kilsənin tikintisi üçün çox gözəl yer ayrılmışdır və qısa müddət ərzində gözəl kilsə tikilmişdir. Mən bu hadisəyə müxtəlif aspektlərdən yanaşıram. İlk növbədə, bu gün Azərbaycanda yaşayan katoliklərin bayramıdır. Katolik kilsəsinin fəaliyyətə başlaması onların böyük bayramıdır. Digər tərəfdən, bu, tarixi həqiqətin bərpasıdır. Çünki biz bilirik ki, XX əsrin əvvəllərində Azərbaycanda katolik kilsəsi tikilmişdir, lakin bolşevik inqilabından sonra o, dağıdılmışdır. Bu gün kilsənin tikilib istifadəyə verilməsi o tarixi həqiqətin bərpası deməkdir. Digər tərəfdən, əminəm, dünyada yaşayan bütün katoliklər üçün çox vacib və əlamətdar hadisədir ki, Azərbaycanda bu kilsə tikilibdir. Bu, bir daha onu göstərir ki, Azərbaycanda dini dözümlülük, dini tolerantlıq çox yüksək səviyyədədir. Bu, bizim böyük sərvətimizdir. Azərbaycanda bütün xalqların, dinlərin nümayəndələrinin bir ailə kimi, qardaşlıq, mehribanlıq şəraitində yaşaması bizim ölkəmizi gücləndirir. Ölkəni gücləndirən müxtəlif amillər var. Həm siyasi nüfuz, həm iqtisadi potensial, həm sosial məsələlərin həlli və həm də digər məsələlər. Ancaq millətlərarası münasibətlər, xüsusilə çoxmillətli ölkələrdə çox böyük əhəmiyyət kəsb edən məsələdir.

Azərbaycan çoxmillətli ölkədir. Biz bununla fəxr edirik və Azərbaycanda yaşayan bütün milli azlıqlara öz qayğımızı göstəririk və bundan sonra da göstərəcəyik. Azərbaycan o ölkədir ki, burada bütün dinlər sərbəst fəaliyyət göstərir. Eyni zamanda, din dövlətdən ayrıdır, Azərbaycan dünyəvi dövlətdir və bu da bizim üçün çox vacib olan məsələdir. Biz bütün dinlərə böyük hörmətlə yanaşırıq və Azərbaycanda bütün dinlərin fəaliyyəti üçün şərait var.

Bir daha qeyd etmək istəyirəm ki, biz kilsənin tikilməsinə çox böyük diqqət göstərmişik - həm yerin seçilməsində, həm də lazımi sənədlərin hazırlanmasında. Mən çox şadam ki, bu gün biz hörmətli kardinal Bertone həzrətləri ilə bərabər bu kilsənin açılışında iştirak edirik. Bir daha demək istəyirəm ki, bundan sonra da Azərbaycanda bütün millətlər dövlət tərəfindən qayğı ilə əhatə olunacaqlar. Azərbaycanda bundan sonra da heç vaxt nə milli, nə də dini zəmində heç bir problem olmayacaqdır. Bütün milli azlıqlar bizim qardaşlarımızdır. Azərbaycanda yaşayan bütün dinlərin nümayəndələri bizim qardaşlarımızdır və bu qardaşlıq davam etdiriləcəkdir. Azərbaycan dostluq ölkəsidir, qardaşlıq ölkəsidir. Azərbaycan o ölkədir ki, uğurla inkişaf edir, irəliyə baxır və tərəqqi yolunu seçibdir.

Əziz dostlar, bu gözəl hadisə münasibətilə sizi bir daha təbrik edirəm, sizə cansağlığı, uğurlar arzulayıram. Sağ olun.

-Cənab Prezident, Sizin şəxsiyyətinizə olan hörmətimiz yalnız Sizin yüksək səlahiyyətli vəzifəniz və Sizin ölkə ilə Vatikan arasında yüksək səviyyəli əlaqələrin olması ilə məhdudlaşmır. Bu hörmət həmçinin Azərbaycanda, bu torpaqda və əsasən, Bakı kimi şəhərdə dini tolerantlığın hökm sürməsi üçün görülmüş işlərlə bağlıdır.

Cənab Prezident, sizin iştirakınız mənə fürsət verir ki, atanız, unudulmaz Prezident Heydər Əliyevin bu çox dəyərli əməlinə görə Sizə Katolik kilsəsinin dərin minnətdarlığını çatdırım. O, bu kilsənin tikintisi üçün şəhərin mərkəzində torpaq ayrılmasına razılığını, istəyini bildirmişdir. Onun bu istəyi yaddaşlardan silinməyən Roma Papası II İoann Pavelin Azərbaycana səfərindən bir gün əvvəl həyata keçirilmişdi. Bu, onun tərəfindən ən böyük və ən gözəl “Xoş gəldiniz!” addımı oldu. Onun istəyi nəticəsində, dini tolerantlığın Azərbaycan həyatının gündəliyində bir sütuna dönməsi mümkün oldu. O, bu mövzuya aid olan unudulmaz bir çıxışında bu dəyərlərin zəngin mədəniyyətə malik olan Azərbaycanın hər zaman xüsusiyyəti olduğunu bildirmişdi.

Cənab Prezident, istərdim Sizə Roma Papası XVI Benediktin və bütün Katolik kilsəsinin adından ümummilli lider Heydər Əliyevin əziz xatirəsinə böyük hörmət bəslədiyimizi bildirim. O, qarşısına qoyduğu məqsədin öhdəsindən cəsarətlə və qətiyyətlə gəlirdi.

Kardinal Tarçizio Bertone kilsənin tikintisinə hərtərəfli dəstəyinə, Azərbaycan-Vatikan əlaqələrinin inkişafında xidmətlərinə görə Prezident İlham Əliyevə Vatikan Dövlətinin və şəxsən Papa XVI Benediktin xüsusi minnətdarlığını çatdırdı: XVI Benedikt bilir ki, bu gün bu kilsənin açılışı Sizin böyük rolunuz, dəstəyiniz və dövlət işindəki adamlar ilə birgə zəhmətiniz nəticəsində reallaşdı.

Kardinal Azərbaycanda milli, dini tolerantlığın daha da möhkəmləndirilməsi üçün ulu öndər Heydər Əliyevin siyasətinin davam etdirildiyini və beynəlxalq birliyin bunu yüksək qiymətləndirdiyini bildirdi.

Sonra çıxış edən Qafqaz Müsəlmanları İdarəsinin sədri şeyxülislam hacı ALLAHŞÜKÜR PAŞAZADƏ dedi:

-Vaxtilə Roma Papası II İoann Pavel Azərbaycanda olarkən mərhum Heydər Əliyevlə görüşündə, daha sonra isə Azərbaycanda yaşayan müxtəlif dini konfessiyaların nümayəndələrini Vatikanda qəbul edərkən Azərbaycandakı mövcud tolerantlıqla fəxarət duymağa tam mənəvi haqqımızın olduğunu xüsusi vurğulamışdı. Azərbaycanın tolerantlıq sahəsində örnək rolunu Moskvanın və bütün Rusiyanın Patriarxı II Aleksi həzrətləri və bir çox başqa tanınmış şəxslər olduqca yüksək dəyərləndirmişlər.

Bugünkü uğurlarımız da məhz yüksək ənənələri davam etdirən Azərbaycan Respublikasının Prezidenti möhtərəm İlham Əliyev həzrətlərinin dini-mənəvi dəyərlərə verdiyi önəm, göstərdiyi böyük qayğıdan qaynaqlanır. Biz, dindarlar dövlət rəhbərinin müqəddəs dəyərlərə ehtiramlı münasibətini dərin minnətdarlıqla qarşılayır, olduqca yüksək qiymətləndiririk.

Hər kəs özünə arzuladığını başqalarına da arzulamalıdır. Bugünədək təcavüz və terrorizmin acı nəticələrini üzərində hiss etməkdə olan Azərbaycan xalqı bütün dünya xalqlarına əmin-amanlıq, rifah, səadət diləyir və bunu həm sözdə, həm də əməldə nümayiş etdirir. Bu gün iştirakçısı olduğumuz mərasim buna bariz nümunədir.

Bizim ən ümdə məqsədimiz ərazi bütövlüyümüzün bərpası, doğma Qarabağın təcavüzkarlardan azad olunması, vətəndaşlarımızın öz torpaqlarına qayıtmasıdır. Biz, inşallah, Qarabağa qayıdaraq, erməni vandalları tərəfindən dağıdılmış müqəddəs ibadətgahlarımızın yenidən həyata qaytarılacağı günü səbirsizliklə gözləyirik. Biz, bəşəriyyət adına ləkə olan Xocalı faciəsinin harayını bütün dünyanın eşitməsini, ermənilər tərəfindən azərbaycanlılara qarşı törədilmiş soyqırımının lənətlənməsini, haqq səsimizə səs verilməsini istəyirik. Bu işdə biz sizdən də dəstək umuruq.

Rus Pravoslav Kilsəsinin Bakı və Xəzəryanı yeparxiyasının başçısı ALEKSANDR ATA Azərbaycanın bütün sahələrdə uğurla inkişaf etdiyini vurğuladı:

- Azərbaycan XXI əsrə cəsarətlə qədəm qoymuşdur. Bu əsrin ötən illərində baş vermiş dəyişikliklər hətta bütövlükdə iyirminci əsrdəki dəyişikliklərlə müqayisəyəgəlməzdir. Bu illər ərzində baş vermiş hadisələrdən xüsusilə ikisi Azərbaycanın gələcəyə necə can atmasını göstərir. Bunlardan biri gənclərə münasibətdir: biz gənclərimizin necə oxuduğunun, onların fiziki cəhətdən necə möhkəmləndiyinin, gənclərin həqiqətən Azərbaycanın dayağına və gələcəyinə çevrilməsi üçün çox işlər görülməsinin şahidiyik.

Şəxsən məndən ötrü ikinci əlamətdar hadisə dini icmaların həyatının dirçəlməsidir. Biz ibadətxanaların abadlaşdırılmasını, Azərbaycanın memarlıq və mədəniyyət irsi olan gözəl məscidlərin bərpa olunmasını müşahidə edirik. Bu yaxınlarda biz pravoslav kafedral kilsəsinin və sinaqoqun yeni gözəl binasının bərpa edilməsinin şahidi olduq. Ən başlıcası isə, biz hamımız həmin hadisələrin iştirakçıları olduq. Biz bu binaların layihələrini də birlikdə işləyib hazırlamışıq, bütün bu işlərin həyata keçirilməsi üçün maliyyə vəsaitlərini də birlikdə tapmışıq.

Bu gün isə biz sizinlə birlikdə şəhərimizdə yeni kilsə binasının açılışında iştirak edirik. Bu onu göstərir ki, Azərbaycan gələcəyini qurur, ölkəmizə gələn, burada çalışmaq istəyən, bu ölkə barədə fikir söyləyəcək hər kəsin Azərbaycanda sabitliyin olduğunu, burada sadəcə dini dözümlülük mənasında tolerantlığın deyil, müxtəlif dinlərə, müxtəlif millətlərə və müxtəlif mədəniyyətlərə mənsub insanlar arasında qarşılıqlı hörmət hisslərinin olduğunu, onların ölkəmizin xoşbəxt gələcəyini qurmağa çalışdığını təsdiqləmələri üçün lazım olan hər şeyi edir.

Dağ yəhudiləri dini icmasının sədri SEMYON İXİİLOV da ölkəmizdə millətlərarası və dinlərarası münasibətlərin ən yüksək səviyyədə olduğunu bildirərək dedi:

-İcazə verin, bütün yəhudilər adından, Azərbaycanda yaşadıqları bütün müddətdə antisemitizm kimi dəhşətli, biabırçı hadisənin nə demək olduğunu bilməyən bütün yəhudi dini icmaları adından katolikləri bu Allah evinin açılışı münasibətilə təbrik edim.

Bu məbəd Roma Papası II İoann Pavelin 2002-ci ildə Bakıya səfəri zamanı onun xahişi ilə Azərbaycan Prezidenti Heydər Əlirza oğlu Əliyev tərəfindən ayrılmış torpaq sahəsində tikilmişdir. Çox təəssüf ki, bu böyük insanlar bu gün bizim aramızda yoxdur. Hesab edirəm ki, onların xatirəsini bir dəqiqəlik sükutla yad etmək yerinə düşərdi. Allah onlara rəhmət eləsin.

Semyon İxiilov katolikləri təbrik etdi, onları Azərbaycanın ən ümdə arzularının reallaşması üçün dualar etməyə çağırdı.

Vatikan Dövlətinin Azərbaycandakı apostol nunsisi KLAUDİO QUCEROTTİ Bakıda katolik kilsəsinin açılışı münasibətilə sevinci məhz ulu öndər Heydər Əliyevin bəxş etdiyini vurğuladı, tolerantlığa töhfələrinə görə Vatikan Dövlətinin Prezident İlham Əliyevin də xidmətlərini yüksək qiymətləndirdiyini bildirdi:

-Bu dəvəti və burada iştirakımızı və bütün diqqəti yüksək dəyərləndirirəm. Bu, Azərbaycanın çox dəyərli mənəvi varlığıdır. Qardaşlar, bacılar və qonaqlar kimi öz üzərimizdə hiss etdik ki, biz heç vaxt düşmən ola bilmərik. Əksinə, biz sevgi dolu bir ailənin üzvləri ola bilərik.

Klaudio Qucerotti Azərbaycandakı katolik icmasına Papa XVI Benediktin təbriklərini yetirdi, ən xoş arzularını bildirdi.

X X X

Mərasimin rəsmi hissəsi Azərbaycan Dövlət Xor Kapellasının ifası ilə başa çatdı.

Tədbir iştirakçıları əlamətdar hadisə münasibətilə bir daha təbriklərini yetirdilər.

Prezident İlham Əliyev Roma Papası II İoann Pavelin Azərbaycana səfərini əks etdirən fotostendə baxdı. Dövlətimizin başçısına Müqəddəs Məryəm Ana kilsəsinin şəkillərindən ibarət albom nümayiş etdirildi.

Sonra Prezident İlham Əliyev və Vatikanın dövlət katibi kardinal Tarçizio Bertone kilsənin ərazisində görüləcək əlavə işlər barədə danışdılar.

Azərbaycan Prezidenti bir daha təbriklərini yetirdi.

######