AZƏRBAYCAN PREZİDENTİ İLHAM ƏLİYEVİN NİTQİ
- Hörmətli Vladimir Nikolayeviç! Hörmətli qonaqlar!
Əziz dostlar!
İndi biz Moldova incəsənət ustalarının konsertindən aldığımız dərin təəssürat içindəyik. Onlar Azərbaycanda Moldova mədəniyyəti günlərinin açılışında yüksək ustalıq nümayiş etdirdilər. Sizin ölkənin, Sizin xalqın qədim mədəniyyəti ilə ünsiyyətdə olmaq bizə böyük zövq verdi.
Bu gün, Azərbaycana rəsmi səfərinizin ilk günündə mən Sizi bir daha salamlamaq, başlanmış səfərin nəticələrindən dərin məmnunluq duyduğumu bildirmək istəyirəm. Ümidvaram ki, sabahkı gün də bugünkü kimi uğurlu olacaqdır.
Bu gün biz qarşılıqlı maraq doğuran regional məsələləri, iqtisadi əməkdaşlıq, siyasi qarşılıqlı əlaqələr məsələlərini çox geniş müzakirə etdik. Bütün məsələlər barədə bizdə tam anlaşma var ki, qarşılıqlı əlaqələrin və tərəfdaşlığın möhkəmlənməsi üçün səylərimizi artırmaqda davam etməliyik. Ölkələrimiz arasında siyasi dialoq, tərəfdaşlıq münasibətləri çox yüksək səviyyədədir. Bu gün ikitərəfli əlaqələrin inkişaf perspektivlərini müzakirə edərkən biz iqtisadi məsələlərə diqqəti daha çox cəmləşdirdik, Moldova və Azərbaycan xalqlarının tarixi əlaqələrinə, qarşılıqlı siyasi münasibətlərimizə, hesab edirəm, biz ən yüksək nöqtəyə, ən yüksək səviyyəyə çatmışıq.
İqtisadi planda isə biz hələ çox iş görməliyik. Bundan ötrü potensial imkanlar da var, istək də. Bu gün müvafiq strukturlara tapşırıqlar verilmişdir ki, onlar bu işi intensivləşdirsinlər və əmtəə dövriyyəsinin, qarşılıqlı investisiyaların artırılmasına dair konkret layihələri, ölkələrimizdə həyata keçirilən layihələrdə bizim şirkətlərin iştirakı və ümumiyyətlə, iqtisadi potensialımızdan tam istifadə olunmasına kömək edə biləcək bütün məsələlər barədə təklifləri təsdiqlənmək üçün ən yaxın vaxtda bizə təqdim etsinlər.
Ölkələrimiz dinamik inkişaf edir, biz müstəqillik əldə etdiyimiz vaxtda yaranmış iqtisadi böhranları geridə qoymuşuq, bu gün Moldovanın və Azərbaycanın uğurlu, dinamik inkişafı ölkələrimizin yerləşdiyi regionda sabitliyin mühüm amilidir.
Müstəqilliyin möhkəmləndirilməsi sahəsində qazandığımız uğurlar və nailiyyətlərlə yanaşı, təəssüf ki, bizi birləşdirən ortaq problemlərimiz də var. Bunlar separatizm, ərazilərin işğal edilməsi, etnik təmizləmə siyasəti və bizim ölkələrdə mövcud münaqişələrin həll olunmaması problemləridir. Münaqişələrin həlli məsələsində bizim mövqelərimiz tamamilə üst-üstə düşür. Moldova Azərbaycanın ərazi bütövlüyünü dəstəklədiyi kimi, biz də Moldovanın ərazi bütövlüyünü dəstəkləyir və belə hesab edirik ki, tənzimləmənin yeganə məqbul yolu məhz ölkələrimizin ərazi bütövlüyü çərçivəsində tənzimləmədir. Bu, beynəlxalq hüququn əsas prinsipidir. Millətlərin öz müqəddəratını təyin etməsi hüququna gəldikdə isə, separatçı regionlarda yaşayan xalqların nümayəndələri başqa dövlətlər çərçivəsində öz müqəddəratlarını artıq təyin etmişlər. Millətin öz müqəddəratını təyin etməsi hüququ heç bir halda ərazilərin bir hissəsinin ayrılmasını və de-fakto separatçı rejimlərin qanuniləşdirilməsini nəzərdə tutmur. Mən əminəm ki, bizim beynəlxalq mövqeyimizin daha da fəallaşdırılması, potensial imkanlarımızın, eləcə də ikitərəfli formatda əlaqələrimizin möhkəmlənməsi bu məsələlərin də müsbət həllinə kömək edəcəkdir.
Mən bu barədə öz fikrimi bu gün artıq demişəm, lakin rəsmi qəbul zamanı Moldova Prezidentinə və Moldova dövlətinə bir daha təşəkkürümü bildirmək istəyirəm ki, onlar ölkəmizdə münaqişənin həllinə dair BMT Baş Məclisinin iclasında Azərbaycanın təklif etdiyi qətnaməni dəstəkləmişlər. Biz bunu çox yüksək qiymətləndirir, dostluq və tərəfdaşlıq münasibətlərinin, eləcə də beynəlxalq hüquq normalarına əsaslanan prinsipial, möhkəm mövqeyin təzahürü hesab edirik.
Mən şübhə etmirəm ki, Vladimir Nikolayeviçin ölkəmizə səfəri, 2004-cü ildə Sizin birinci səfərinizdən və onun ardınca mənim Moldovaya səfərimdən sonra olduğu kimi - münasibətlərimizin daha da inkişaf etməsinə güclü təkan verəcəkdir. İkitərəfli əlaqələr baxımından biz xeyli irəliləmişik və ümid edirəm ki, bundan sonra da eyni sürətlə irəliləyəcəyik.
Mən bu badəni Moldovanın Prezidenti, mənim dostum Vladimir Nikolayeviç Voroninin şərəfinə, dost Moldova xalqının tərəqqisi şərəfinə, Moldova ilə Azərbaycan arasında dostluğun şərəfinə qaldırmaq istəyirəm.
######
Bölmənin digər xəbərləri
