- Möhtərəm Qurbanqulu Malikquliyeviç!

Hörmətli qonaqlar!

Xanımlar və cənablar!

Bu gün Türkmənistan Prezidentini Azərbaycan torpağında bir daha salamlamaq, bütün qonaqlara “Xoş gəlmisiniz!” demək istərdim.

Bizim xalqlarımızı çoxəsrlik dostluq və əməkdaşlıq telləri bağlayır. Onlar əsrlər boyu fəal əlaqələr saxlamış, dostluq etmiş, birgə çalışmışlar. Bu gün də bizim müstəqil dövlətlərimiz arasında münasibətlər bu möhkəm tarixi zəmin üzərində qurulur. Hazırda Türkmənistanın və Azərbaycanın dinamik inkişafı regional əməkdaşlığın çox mühüm amilidir. Ölkələrimiz müstəqillik əldə edəndən sonrakı dövrdə böyük irəliləyiş yolu keçmiş, böyük uğurlar qazanmış, öz müstəqilliklərini möhkəmləndirmişlər və bu indi onlar nəinki regionda, hətta dünya miqyasında ən dinamik inkişaf edən ölkələrdəndir. Biz keçid dövrünün problemləri ilə əlaqədar qarşımızda duran vəzifələri uğurla yerinə yetirmişik və bu gün gələcəyə inamla baxırıq.

Bu gün Türkmənistan Prezidenti ilə ikitərəfli əməkdaşlıq məsələlərini müzakirə edərkən bir daha yəqin etdim ki, ölkələrimizin ikitərəfli münasibətlər, regional əməkdaşlıq, regional təhlükəsizlik problemlərinə yanaşmalarında ortaq cəhətlər çoxdur. Bizim ölkələr müstəqillik əldə edəndən sonra öz potensialını tam həcmdə reallaşdırmaq imkanı qazanmışlar və indi müstəqil siyasət, milli maraqlarımıza əsaslanan siyasət yeridirlər. Çox sevindirici haldır ki, bu gün biz Türkmənistanın ali nümayəndə heyətini qəbul edərkən öz keçmişimizi bir daha təhlil etmək və irəliyə doğru hərəkət yollarını müəyyənləşdirmək imkanına malikik.

Bu gün imzalanmış sənədlər ölkələrimizin qarşıdakı illər üçün səmərəli əməkdaşlığını irəlicədən müəyyənləşdirəcəkdir. Son dövrdəki fəal siyasi dialoq sayəsində biz müəyyən müddət həll olunmamış qalan bir sıra problemləri həll etməyə, gələcək əməkdaşlığımızın perspektivlərini planlaşdırmağa və bununla da bizim gələcək münasibətlərimizin inkişafının möhkəm təməlini yaratmağa nail olmuşuq.

Mən belə hesab edirəm ki, Türkmənistan Prezidentinin Azərbaycana səfəri ölkələrimiz arasında münasibətlərin keyfiyyətcə yeni səviyyəsinin başlanğıcı olacaqdır. Biz iqtisadi əməkdaşlıq, qarşılıqlı siyasi əlaqələr məsələlərini, energetika kompleksi, nəqliyyat kompleksi ilə bağlı məsələləri müzakirə etdik. Qarşılıqlı surətdə faydalı planlarımız, ideyalarımız, layihələr çoxdur, artıq indi onların həyata keçirilməsi üçün çox möhkəm potensial vardır, infrastruktur yaradılmışdır və ən başlıcası, hər iki tərəfin bir-birinə daha çox yaxınlaşmaq, əməkdaşlıq etmək, qarşılıqlı ticarətin həcmini artırmaq, humanitar sahədə əməkdaşlığı inkişaf etdirmək arzusu böyükdür.

Bu gün mənə çox xoşdur ki, Türkmənistan Prezidenti, mənim hörmətli dostum böyük nümayəndə heyətinin müşayiəti ilə Azərbaycana gəlmişdir. Bu nümayəndə heyətində energetika, yanacaq, nəqliyyat sektorlarının və başqa sektorların nümayəndələri ilə yanaşı, incəsənət xadimləri, humanitar sektorun nümayəndələri də var. Bu, bizim möhkəm tarixi təməli olan münasibətlərimizin çox mühüm seqmentidir. Əminəm ki, bizim nümayəndə heyətlərinin üzvləri arasında keçirilmiş bugünkü görüşlər ən yaxın vaxtda əməli nəticələrə gətirib çıxaracaqdır. Bu gün bizim bu barədə danışmaq və ölkələrimizin nümayəndələri arasında alimlər, tədqiqatçılar, mədəniyyət xadimləri səviyyəsində fəal humanitar əməkdaşlığın konkret yollarını nəzərdə tutmaq imkanımız oldu. İkitərəfli münasibətlərimizin bu seqmenti hər hansı iqtisadi layihələrdən heç də az əhəmiyyət daşımır.

Demək istəyirəm ki, Türkmənistan Prezidentinin Azərbaycana səfəri mahiyyət etibarilə münasibətlərimizin tamamilə yeni mərhələsidir. Artıq dediyim kimi, qısa müddətdə biz elə məsələləri həll etməyə nail olmuşuq ki, onların həlli bəzən çox çətin görünürdü. Lakin prezidentlərin iradəsi sayəsində, ölkələrimiz arasında inteqrasiya prosesinin bütün iştirakçıları sayəsində bu, mümkün oldu.

Biz gələcəyə inamla baxırıq, bizim dövlətlər özlərini təmin edən, çox böyük intellektual potensialı, zəngin təbii ehtiyatları, əlverişli coğrafi mövqeyi olan dövlətlərdir. Bütün bunlar bizim əməkdaşlığımızı şərtləndirir.

Bu gün Türkmənistan Prezidentinin səfərinin birinci gününün sonunda artıq əminliklə deyə bilərik ki, səfərin ilk günü uğurlu olmuşdur və mən inanıram ki, yaxın vaxtlarda biz bu səfərin nəticələrini görəcəyik.

Fürsətdən istifadə edib, bir daha qardaş Türkmənistan xalqına dərin hörmət və məhəbbət hisslərimi bildirmək, qardaş ölkəyə yeni uğurlar, nailiyyətlər, yeni zəfərlər arzulamaq istəyirəm. Qonşularınız kimi, dostlarınız kimi, qardaşlarınız kimi biz sizin uğurlarınıza həmişə sevinirik.

Mən bu badəni Türkmənistan Prezidentinin sağlığına, qardaş Türkmənistan xalqının şərəfinə, Türkmənistanla Azərbaycan arasında münasibətlərin inkişafı şərəfinə qaldırmaq istəyirəm.

######