AZƏRBAYCAN PREZİDENTİ İLHAM ƏLİYEVİN NİTQİ
-Əvvəlcə mən cənab Prezident Saakaşviliyə və bütün gürcü dostlarımıza zirvə görüşünü əla təşkil etdiklərinə və səmimi qonaqpərvərliyə görə minnətdarlığımı bildirmək istəyirəm.
Azərbaycan GUAM-da sədrliyə başladığı Bakıdakı son zirvə görüşündən sonra biz önəmli işlər yerinə yetirmişik.
Biz regional əməkdaşlıq, regionda təhlükəsizlik məsələləri, enerji əməkdaşlığı, nəqliyyat, humanitar fəaliyyət sahələrində sıx işləyirik və bütün sahələrdə praktiki nəticələr görürük.
Biz Azərbaycanın işğal olunmuş ərazilərində vəziyyətlə bağlı ölkəmizin BMT-nin Baş Məclisində irəli sürdüyü qətnaməyə verdikləri dəstəyə görə GUAM-ın üzv ölkələrinə və digər dostlarımıza minnətdarlığımızı bildiririk. Ümumiyyətlə, ölkələrimizin ərazi bütövlüyünə beynəlxalq ictimaiyyətin və region ölkələrinin verdiyi dəstək çox vacibdir. Ümid edirik ki, ölkələrimizdə mövcud olan münaqişələr beynəlxalq hüquq və ölkələrimizin ərazi bütövlüyü prinsipi əsasında həll olunacaqdır. Bu, münaqişələrin həll olunmasının yeganə yoludur.
Münaqişələrin bizim üçün çox böyük siyasi, iqtisadi, sosial və mənəvi ağırlıq olması faktına baxmayaraq, Azərbaycan uğurlu inkişaf yoluna nail olub. İqtisadi nailiyyətlər və sosial problemlərin həlli sahəsindəki nəticələr ölkəmizdə tamamilə yeni vəziyyət yaradır. Biz dostlarımız və tərəfdaşlarımızla regional əməkdaşlıq üzərində sıx işləyirik. Bu gün biz Xəzər dənizi-Qara dəniz-Baltik dənizi regionları arasında enerji, daşıma sahələrində və yaxud siyasi sahədə regional əməkdaşlıq üçün çox yaxşı perspektivlərə malikik. İqtisadi münasibətlərimiz genişlənir. Bütün bunlar gələcək əməkdaşlıq üçün çox yaxşı əsaslar yaradır.
Əlbəttə ki, enerji dəhlizlərinin yaradılması regionların bir araya gətirilməsi istiqamətində atılmış əsas addım oldu. Bu gün biz həmin əməkdaşlığın praktiki nəticələrini görürük. Odessa-Brodı-Qdansk boru kəməri layihəsi uğurla irəliyə doğru aparılır. Ümid edirik ki, bu ilin payızında Bakıda keçiriləcək enerji sammitində biz əməkdaşlığın ilk əməli nəticələrinin şahidi olacağıq.
Azərbaycan özünün neft və qaz hasilatını artırır, neft və qazı dünya bazarlarına çatdıran bütün boru kəmərlərindən istifadə edir. İstehsalçı ölkələr ilə istehlakçı ölkələr arasında maraqların tarazlığı səmimi regional əməkdaşlıq üçün ilkin şərtdir. GUAM nümunəsi və zirvə görüşlərimizdə qonaqlarımızın tez-tez iştirakı maraqların tarazlığının mümkünlüyünü aydın şəkildə nümayiş etdirir. Dostluq, tərəfdaşlıq və strateji baxışlara əsaslanan həmin maraqlar tarazlığı davamlı və uzunmüddətli uğura zəmin yarada bilər.
Bu gün biz daşıma məsələləri üzərində çalışırıq. Bakı-Tbilisi-Qars dəmir yolu xəttinin tikintisi bütün region ölkələri üçün əlavə imkanlar yaradacaqdır. Bu, nəinki bizim ölkələrimizi, o cümlədən Asiya ilə Avropanı bir-biri ilə birləşdirəcək dəmir yolu xətti olacaqdır. Ona görə biz ölkələrimizdə qlobal transmilli enerjidaşıyıcılarının nəqli layihələri, siyasi dəyişikliklər, demokratikləşmə sisteminin, güclü siyasi sistemin yaradılması üzərində uğurla işləyirik. Biz forumlarımızda iştirak edən ölkələrə, ölkə başçılarına minnətdarıq. Onlar təşəbbüslərimizə verdikləri fəal dəstəklə bütün təşəbbüslərimiz üçün münasib şərait yaradırlar. Bu gün Polşa və Litva prezidentləri aramızdadır. Biz Polşa-Litva təşəbbüsü sayılan Krakov təşəbbüsünü belə bir xüsusi formatda birgə irəli sürdük. Bu gün, həmin format uğurla inkişaf etdirilir. Əminəm ki, gələcəkdə onun iştirakçıları daha çox olacaqdır.
Ümumiyyətlə, hesab edirəm ki, keçən ilin iyun ayında keçirilmiş sonuncu zirvə görüşü və Vilnüsdəki yubiley görüşümüzdən sonrakı dövr əməkdaşlığımız üçün çox faydalı və uğurlu olmuşdur. Çox şadam ki, Azərbaycanın sədrliyi dövründə birillik müddət üçün planlaşdırılan bütün nəticələr əldə olunmuşdur.
Bu gün biz məmnunluq hissi ilə sədrliyi Gürcüstana təhvil veririk. Əminəm ki, Gürcüstanın sədrliyi ölkələrimiz və tərəfdaşlarımız arasında münasibətlərin daha da genişlənməsinə və əməkdaşlığın dərinləşməsinə imkan yaradacaqdır.
Çox sağ olun.
X X X
Sonra Gürcüstan Prezidenti Mixeil SAAKAŞVİLİ çıxış etdi, GUAM-a sədrliyi dövründə göstərdiyi səylərə görə Azərbaycana təşəkkürünü bildirdi, Azərbaycanın etibarlı tərəfdaş olduğunu vurğuladı. GUAM çərçivəsində əməkdaşlıqdan danışan Gürcüstan Prezidenti bildirdi ki, GUAM ölkələri ərazilərindəki münaqişələrin həlli çox vacibdir. Regionun daha da inkişafı baxımından bu münaqişələr yalnız və yalnız ölkələrin ərazi bütövlüyü çərçivəsində həll olunmalıdır.
Ukrayna Prezidenti Viktor YUŞŞENKO çıxışında GUAM-a sədrlik dövründəki işlərinə görə Azərbaycan Prezidenti İlham Əliyevə təşəkkürünü bildirdi. Qeyd etdi ki, son vaxtlar GUAM-ın fəaliyyəti daha da genişlənmişdir. GUAM ölkələrinin qarşılıqlı ticarət dövriyyəsinin həcminin artması buna əyani sübutdur. Ukrayna Prezidenti enerji dəhlizlərinin reallaşmasında Azərbaycanın əhəmiyyətini xüsusi vurğuladı.
GUAM məkanındakı münaqişələrin həllinə toxunan Ukrayna Prezidenti, bu münaqişələrin dövlətlərin ərazi bütövlüyü çərçivəsində həllinin vacibliyini qeyd etdi. V.Yuşşenko bəyan etdi ki, Ukrayna Azərbaycan, Gürcüstan və Moldovanın ərazi bütövlüyünü dəstəkləyir.
Moldovanın daxili işlər naziri Valentin MEJİNSKİ, Litva Prezidenti Valdas ADAMKUS, Polşa Prezidenti Lex KAÇİNSKİ, Çexiyanın xarici işlər naziri Karel Şvartzenberq, Rumıniyanın, Yaponiyanın, Beynəlxalq Avtonəqliyyat İttifaqının, MDB İcraiyyə Komitəsinin nümayəndələri də iclasda çıxış etdilər.
X X X
Sonra GUAM zirvə görüşünün sənədləri imzalandı.
######
 |
 |
Bölmənin digər xəbərləri
