- Əziz idmançılar!

Əziz olimpiyaçılar!

Əziz dostlar!

Mən sizi və bütün Azərbaycan xalqını Azərbaycan milli olimpiya komandasının Pekin Yay Olimpiya Oyunlarında qazandığı böyük qələbə münasibətilə ürəkdən təbrik edirəm.

Biz hamımız yaxşı xatırlayırıq ki, idmançıları Pekinə necə yola salırdıq. Yola salanda inanırdıq ki, idmançılarımız Azərbaycanın idman şöhrətini yüksəklərdə saxlayacaqlar, Azərbaycanın idman şöhrətini qoruyacaqlar və Vətənə qələbə ilə qayıdacaqlar. Belə də oldu. Belə fikirləşmək üçün bizim bütün əsaslarımız var idi. Çünki Azərbaycan idman dövlətidir. Bunu həm biz deyirik, həm də beynəlxalq idman qurumlarının rəhbərləri etiraf edirlər.

Azərbaycanda idman çox sürətlə inkişaf edir. Azərbaycanda çox güclü idmançılar var, güclü məşqçilər var. İdmançıların peşəkarlığı yüksək səviyyədədir. Bizim idmançılarımız keçən dörd il ərzində müxtəlif beynəlxalq yarışlarda, dünya, Avropa çempionatlarında böyük uğurlar qazanmışlar, medallar qazanmışlar. Azərbaycanda çox güclü idman infrastrukturu yaradılır. Bütün bölgələrdə müasir olimpiya idman kompleksləri tikilir. Onların 13-ü istismara verilibdir, 23-ündə isə tamamlanma işləri gedir.

Azərbaycanda dövlət tərəfindən idmanın inkişafına çox böyük dəstək var və məqsədyönlü proqramlar icra olunur. Yəni bütün bu amillər və bununla bərabər, idmana məsuliyyət daşıyan bütün qurumların - Milli Olimpiya Komitəsinin, Gənclər və İdman Nazirliyinin, federasiyaların, idman cəmiyyətlərinin, klublarının birgə fəaliyyəti belə deməyə əsas verirdi ki, idmançılarımız Vətənə qələbə ilə qayıdacaqlar. Mən çox şadam ki, bu gün biz bu böyük qələbəni birlikdə qeyd edirik.

Olimpiya oyunları kimi çox böyük və dünyanın ən mötəbər, birinci idman yarışında 7 medal qazanmaq çox böyük nailiyyətdir, böyük uğurdur və bizim hamımızı çox sevindirir. Müstəqil dövlət kimi Azərbaycan Yay Olimpiya oyunlarında dörd dəfə iştirak etmişdir və hər dəfə daha da böyük nailiyyətlər qazanmışdır. İlk dəfə Atlantada 1 gümüş medal qazanılmışdı, sonra Sidneydə 2 qızıl, 1 bürünc, ondan sonra Afinada 1 qızıl, 4 bürünc və bu dəfə Pekində 1 qızıl, 2 gümüş və 4 bürünc medal qazanıldı. Bu, doğrudan da böyük nailiyyətdir və onu göstərir ki, idmançılarımızın çox böyük potensialı, çox böyük peşəkarlığı var.

Nəzərə alsaq ki, bizim idmançılarımızın bir neçəsi medala çox yaxın idi, yəni bir addımlığında idi, eyni zamanda, gümüş və bürünc medal qazanan idmançılar daha da böyük uğur əldə edə bilərdilər, - bəzən onların bəxti gətirmədi, bəzən təsadüf, bəzən hakimlərin qeyri-ədalətli qərarları ucbatından mümkün olmadı, - biz görürük ki, doğrudan da bizim çox böyük imkanlarımız var. Medalların sayı 10 da ola bilərdi, ondan da çox ola bilərdi, ondan da az ola bilərdi, çünki bu, idmandır. Siz idmançılar bunu yaxşı bilirsiniz ki, idmanda qələbə də olur, məğlubiyyət də olur. Qələbə bizi daha da ruhlandırır, məğlubiyyət isə nəticə çıxarmağa sövq edir. Hər bir yarışda idmançıların imkanları özünü büruzə verir, xüsusilə Olimpiya oyunlarında. Eyni zamanda, bu, idmançılarda çox böyük bir psixoloji gərginlik yaradır. Biz hamımız bunu da yaxşı başa düşürük. Bizim idmançılarımız göstərdilər ki, onlar həm fiziki cəhətdən, həm də mənəvi cəhətdən güclüdürlər, möhkəmdirlər və doğma Vətənin üçrəngli bayrağının dalğalanması üçün onlardan nə asılı idisə, onu etdilər.

Sevindirici hal ondan ibarətdir ki, medal qazanan bütün idmançılar Olimpiya oyunlarında ilk dəfədir ki, medal qazanırlar. Bu da çox vacib göstəricidir. Bu onu göstərir ki, son dörd il ərzində bu idmançılar belə böyük nailiyyətlərə çatıblar. Bu onu göstərir ki, keçən dörd il ərzində Azərbaycanda idmanın inkişafında, idmançıların hazırlanmasında çox böyük işlər görülmüşdür. Mən burada xüsusilə məşqçilərin fəaliyyətini qeyd etmək istəyirəm. Azərbaycanda çox güclü məşqçi korpusu yaranmışdır və bu da bizim uğurlarımızın vacib şərtidir. Yəni bütün bu amillər bizi idman dövləti kimi daha da gücləndirir, Azərbaycanın nüfuzu artır, Azərbaycanın idman imkanları daha da genişlənir.

Əlbəttə, mən tam əminliklə deyə bilərəm ki, bu uğurlu çıxışdan sonra gənc nəsildə, uşaqlarda idmanla məşğul olmaq üçün daha da böyük maraq olacaqdır. Bu, böyük stimul olacaqdır. Bizim çempionlarımız, medal qazanan idmançılar - onlar gənc nəsil üçün nümunədirlər. Bizim uşaqlarımız sizə oxşamaq istəyəcəklər. Onlar idman bölmələrinə daha da böyük həvəslə gedəcəklər. İndi bunu etmək üçün bütün imkanlar var. Qeyd etdiyim kimi, Azərbaycanda idman infrastrukturu çox güclənib və möhkəmlənibdir.

Əlbəttə, bütün bu amillər onu göstərir ki, müstəqil dövlət kimi Azərbaycan uğurla inkişaf edir. Müstəqilliyi şərtləndirən müxtəlif amillər var. Həm müstəqil siyasət aparmaq imkanlarımız, güclü iqtisadiyyat, güclü sosial siyasət, ölkəmizdə sabitliyin, əmin-amanlığın bərqərar olunması, Azərbaycanda təhlükəsizliyin təmin olunması - yalnız belə şəraitdə idmanın inkişafı mümkündür. Kasıb ölkələrdə, problemlərlə üz-üzə qalan ölkələrdə idman, adətən, sürətlə inkişaf etmir. Ümumiyyətlə, idmanın inkişafı hər bir ölkənin potensialının əlamətidir, onun təzahürüdür. Təsadüfi deyil ki, Azərbaycan - dinamik inkişaf edən ölkə, çox sürətlə inkişaf edən ölkə və iqtisadi artım baxımından son üç il ərzində dünyada birinci yerdə olan ölkə güclü idman imkanlarına da malikdir. Bütün bu məsələlər bir-biri ilə bağlıdır və bu gözəl bayram günündə bunları deməklə, sadəcə olaraq, mən bizim son illər ərzində gördüyümüz işlərin bir hissəsini sizin diqqətinizə bir daha çatdırmaq istəyirəm.

Mən bütün idmançılara, bizim bütün qəhrəmanlara öz minnətdarlığımı bildirmək istəyirəm. Siz Azərbaycan xalqını sevindirmisiniz. İki həftə ərzində bütün vətənpərvər insanlar televiziya vasitəsilə sizin yarışlarınızı izləyirdilər, sizə azakeşlik edirdilər və sizin qələbənizi öz qələbələri kimi qəbul edirdilər. Bu, Azərbaycan dövlətinin qələbəsidir. Hər bir idmançının və eyni zamanda, Azərbaycan dövlətinin qələbəsidir.

Mən xüsusilə medal qazanmış idmançılarımızın fəaliyyətini vurğulamaq istəyirəm. Onlar çox gərgin şəraitdə medallar qazanmışlar. Onlar bu medallara layiqdirlər. Hamı görürdü ki, onlar öz məharəti, peşəkarlığı hesabına bu medalları qazanmışlar. Bir daha demək istəyirəm ki, bizim idmançılarımız daha da böyük nailiyyətlərə çata bilərdilər, əgər bəzi subyektiv məsələlər ortaya çıxmasaydı, bizim qızıl medalların da sayı çox ola bilərdi. Ümumiyyətlə, medal alan idmançıların sayı çox ola bilərdi. Ancaq mən əminəm ki, gələcəkdə, gələcək yarışlarda siz bu uğurlu yolu davam etdirəcəksiniz.

Bu Olimpiya oyunları bir mərhələ idi. Bu mərhələ artıq arxada qalmışdır. Növbəti dövr başlayır. Növbəti dövr ərzində siz Avropa, dünya çempionatlarında, beynəlxalq yarışlarda artıq çempionlar kimi, medal qazanan idmançılar kimi iştirak, çıxış edəcəksiniz. Əlbəttə ki, siz bütün yarışlarda favorit olacaqsınız.

Mən bir daha demək istəyirəm ki, milli komandanın bütün fəaliyyətini yüksək qiymətləndirirəm. Bu günlər ərzində biz daha da birləşdik, bütün Azərbaycan xalqı daha da birləşdi və siz Azərbaycan xalqına sevinc gətirmisiniz, təbəssüm və qürur hissi bəxş etmisiniz.

Mən bu gün xüsusilə bizim gənc çempionumuzu, Elnur Məmmədlini qeyd etmək istəyirəm. Hesab edirəm ki, Elnur bütün Olimpiya oyunlarında bütün idman növləri üzrə ən istedadlı idmançılardan biridir. Onun qələbəsindən sonra mən dedim ki, araşdırın, görün, Olimpiya oyunlarında belə bir hal olubmu ki, bir idmançı bütün görüşləri təmiz qələbə ilə başa vursun və final görüşündə dünya çempionunu cəmi 13 saniyə ərzində məğlub etsin, özü də gözəl şəkildə. Həm onun peşəkarlığı, həm onun vətənpərvərliyi və həm də ki, fəndləri çox estetik şəkildə etmək bacarığı bizim hamımızı heyrətləndirdi. Belə insanlar, belə gənclər hər bir gənc üçün nümunə olmalıdır. Bütün başqa idmançılar da çox gərgin mübarizədə qələbə qazanmışlar.

Ölkə Prezidenti kimi və Milli Olimpiya Komitəsinin prezidenti kimi mən bütün Azərbaycan xalqı adından bütün idmançılara, onların məşqçilərinə, idman mütəxəssislərinə öz minnətdarlığımı bildirmək istəyirəm. İdmançıların uğurlu çıxışlarını nəzərə alaraq, mən bu gün onların və məşqçilərin dövlət tərəfindən mükafatlandırılması üçün müvafiq Sərəncam imzalamışam və bu, indi oxunacaqdır.

Sizi böyük qələbə münasibətilə bir daha ürəkdən təbrik edirəm, sizə növbəti qələbələr, uğurlar arzulayıram.

X X X

Azərbaycan Prezidenti İlham Əliyevin “Azərbaycan milli olimpiya komandasının üzvlərinin təltif edilməsi haqqında” Sərəncamı oxundu.

Prezident İlham Əliyev Azərbaycan idmanının inkişafındakı xidmətlərinə və XXIX Yay Olimpiya Oyunlarında göstərdikləri yüksək nailiyyətlərə görə təltif edilmiş idmançılara və onların məşqçilərinə “Şöhrət” ordeni və “Tərəqqi” medalları, habelə pul mükafatları təqdim etdi, onlara bir daha uğurlar arzuladı.

Görüşdən sonra Prezident İlham Əliyev olimpiyaçılarla və onların məşqçiləri ilə xatirə şəkli çəkdirdi.

######