Hörmətli xanımlar və cənablar!

Mən sizin hamınızı Azərbaycan xalqının ən əziz, ən

sevimli bayramlarından biri olan Novruz bayramı münasibətilə ürəkdən təbrik edirəm, bütün Azərbaycan xalqına sülh, əmin-amanlıq, xoşbəxtlik arzulayıram.

Azərbaycan xalqı bu gözəl bayramı əsrlər boyu qəlbində yaşatmışdır. Bütün dövrlərdə Novruz bayramı Azərbaycanda qeyd olunurdu. Ancaq biz dövlət müstəqilliyimizi bərpa edəndən sonra bu bayram dövlət bayramı kimi qeyd olunur, rəsmi bayramdır. Son bir neçə il ərzində isə bu bayram Azərbaycanda bir neçə gün qeyd edilir. Builki bayram günləri bir həftədən çox olacaqdır. Bu, bir tərəfdən, Azərbaycan xalqının, Azərbaycan dövlətinin bu bayrama olan münasibətidir, digər tərəfdən, bu, imkan verir ki, Azərbaycanın bütün bölgələrində hər bir ailə bir həftədən çox birlikdə olsun, istirahət etsin, dincəlsin və xoş günlər keçirsin.

Azərbaycan bu gün müasirləşir. Azərbaycan öz dövlət müstəqilliyini bərpa etdikdən sonra çox uğurlu yol keçmişdir, çox böyük sınaqlardan şərəflə çıxmışdır. Biz müasir dövləti köklü, əsaslı, milli dəyərlər üzərində qururuq. Milli dəyərlər, ənənələr Azərbaycan xalqı üçün həmişə əziz olubdur. Bu gün də bu möhkəm zəmin əsasında müasir Azərbaycanın qurulması prosesi uğurla davam edir. Azərbaycan öz imkanlarını artırır. İqtisadi inkişaf baxımından son beş il ərzində Azərbaycan dünya miqyasında lider ölkə olmuşdur. Əminəm ki, bu liderliyi bundan sonra da əldən verməyəcəkdir. Ölkədə aparılan geniş siyasi və iqtisadi islahatlar, quruculuq, abadlıq işləri ölkəmizin hərtərəfli inkişafına çox böyük töhfə vermişdir. Həm Bakı şəhərinin gözəlləşməsi, həm də bütün bölgələrdə gedən abadlıq-quruculuq işləri hər birimizi çox sevindirir.

Biz son beş il ərzində ölkə qarşısında duran çoxlu məsələləri, problemləri həll edə bilmişik, qarşıda duran bütün vəzifələr icra olunmuşdur. Regionların sosial-iqtisadi inkişafı Dövlət proqramı vaxtından əvvəl və daha da böyük həcmdə icra edilmişdir. Böyük infrastruktur layihələri, Azərbaycanda növbəti illər üçün lazım olan əsas infrastruktur layihələri son beş il ərzində, demək olar ki, öz həllini tapıbdır. Növbəti beş ildə biz bu siyasəti davam etdirəcəyik. Əlbəttə ki, əminəm, növbəti beş ildə bu vaxta qədər həll olunmamış problemlər də öz həllini tapacaqdır.

İqtisadiyyatımız beş ildə 2,6 dəfə artıb, yoxsulluğun səviyyəsi 49 faizdən 13 faizə düşmüşdür. Bütün bu göstəricilər insanların gündəlik həyatında öz əksini tapır. Azərbaycan iqtisadiyyatı bölgədə artıq sabitləşdirici amilə çevrilibdir.

Bütövlükdə Azərbaycanın artan nüfuzu, daxili siyasi sabitlik, bölgədəki vəziyyətə təsir imkanlarının artması və regional layihələrin təşəbbüsü nəticəsində biz beynəlxalq mövqelərimizi də böyük dərəcədə möhkəmləndirə bilmişik. Bu gün Azərbaycan dünya miqyasında etibarlı tərəfdaş kimi tanınır və dünya üçün bir çox mühüm layihələrin həyata keçirilməsində Azərbaycanın iştirakı başlıca şərtdir. Biz nəinki böyük layihələrin iştirakçıları, eyni zamanda, bu layihələrin təşəbbüskarıyıq. Bizim təşəbbüsümüzlə bölgədə enerji sahəsində köklü dəyişikliklər baş vermişdir. Demək olar ki, bu layihələr bölgənin geosiyasi vəziyyətinə çox böyük müsbət təsir göstərmişdir. Bu gün biz bu imkanlardan ölkəmizin hərtərəfli inkişafı üçün və beynəlxalq mövqelərimizin möhkəmləndirilməsi üçün istifadə edirik və bu da təbiidir.

Əlbəttə, bizim qarşımızda duran ən önəmli, ən əsas problem Dağlıq Qarabağ probleminin həllidir. Ermənistanın Azərbaycana qarşı hərbi təcavüzü nəticəsində uzun illərdir ki, torpaqlarımız işğal altındadır. Yüz minlərlə azərbaycanlı etnik təmizləmə siyasəti nəticəsində öz doğma torpağından didərgin salınmış, qaçqın-köçkün vəziyyətinə düşmüşdür. Biz bütün imkanlardan istifadə edirik ki, bu məsələni ədalətli, beynəlxalq hüquq normalarına uyğun şəkildə həll edək. Həm iqtisadi imkanlarımızı, həm də diplomatik səylərimizi artırırıq. Eyni zamanda, hərbi gücümüzü artırırıq və ötən il Azərbaycanda keçirilmiş hərbi parad bizim nə qədər güclü ordu potensialına malik olduğumuzu bütün dünyaya sübut etdi. Biz çalışırıq ki, məsələ sülh yolu ilə həll olunsun. Ancaq, eyni zamanda, məsələ ədalətli həll olunmalıdır, beynəlxalq hüquq normalarına uyğun şəkildə, Azərbaycanın ərazi bütövlüyü çərçivəsində həll edilməlidir. Qondarma Dağlıq Qarabağ rejiminə heç vaxt müstəqillik verilməyəcəkdir. Azərbaycan öz torpaqlarının itirilməsi ilə heç vaxt barışmayacaqdır. Biz nə qədər güclü olsaq, məsələnin həlli bir o qədər yaxın olacaqdır. Son beş il ərzində bu istiqamətdə çox böyük diplomatik, siyasi, iqtisadi, hərbi tədbirlər, təbliğat işləri görülmüşdür.

Bu gün bölgədə vəziyyət tamamilə başqadır. Xüsusilə dünyanı bürümüş və bölgəyə çox böyük təsiri olan iqtisadi böhran açıq-aydın göstərir ki, kim nəyə qadirdir, kim kimdir və kimin imkanları nədən ibarətdir. Azərbaycan bu böhrandan ən az əziyyət çəkən ölkələrdəndir. Əgər bölgəyə və bütövlükdə postsovet məkanına nəzər salsaq görərik ki, çoxlu problemlər var. Bəzi ölkələr öz hesabına yaşaya bilmirlər, bəzi ölkələr xarici maliyyə yardımı olmadan öz iqtisadiyyatını inkişaf etdirə bilmirlər və hətta sosial problemlərin həllində də çətinlik çəkirlər. Bəzi ölkələrdə milli valyutanın məzənnəsinin kəskin şəkildə düşməsi nəticəsində kütləvi müflisləşmə, kasıblaşma gedir. Müəssisələr dayanır, insanların alıcılıq qabiliyyəti azalır və beləliklə, sosial gərginlik yaranır.

Əlbəttə, biz gələcəkdə də çalışacağıq ki, ilk növbədə, Azərbaycanın dayanıqlı inkişafını, iqtisadi inkişafını təmin edək. Eyni zamanda, bölgədə yaranmış vəziyyətə bizim münasibətimiz də adekvat olacaqdır.

Azərbaycan bir daha göstərdi ki, bütün sınaqlardan şərəflə çıxır. Keçən ilin yayında bölgədə yaranmış hərbi, siyasi böhran Azərbaycanda hissi olunmadı, Azərbaycan xalqı bunu hiss etmədi. Halbuki, bizim qonşuluğumuzda çox gərgin vəziyyət yaranmışdı. Bu gün dünyanı bürümüş, ən böyük ölkələrə təsir göstərən və bölgədə çox böyük problemlərlə nəticələnən iqtisadi böhran da Azərbaycanda hiss olunmur. Manatın məzənnəsinin sabit qalması, - gələcəkdə də sabit qalacaq, - istehlak qiymətlərinin aşağı düşməsi nəticəsində insanların alıcılıq qabiliyyəti daha da artıbdır. Büdcə təşkilatlarında çalışan insanların maliyyə vəziyyəti daha da yaxşılaşıbdır. Yenə də demək istəyirəm ki, bu böhran hər bir ölkəyə öz təsirini göstərir və biz elə etməliyik və əminəm, buna nail olacağıq ki, Azərbaycan xalqını maksimum dərəcədə bu böhrandan qoruyaq.

Biz gələcəyə nikbinliklə baxırıq. Bu vaxta qədər verilmiş bütün sözlər icra olunub, qarşıda duran bütün vəzifələr yerinə yetirilmişdir. Ancaq hələ çoxlu problemlər var, gələcəkdə biz onları həll etməliyik. Azərbaycan xalqının rifah halının yaxşılaşdırılması üçün əlavə tədbirlər görülməlidir və görüləcəkdir. İqtisadi inkişaf strategiyamız davam etdiriləcəkdir. Baxmayaraq ki, dünyada neftin qiyməti 3-4 dəfə azalıb, bu il və növbəti illərdə investisiya layihələrinin tam əksəriyyəti, bütün sosial proqramlar icra olunacaqdır. Bu il və növbəti illərdə məktəb tikintisi, xəstəxanaların tikintisi, mədəniyyət ocaqlarının tikintisi, bərpası davam etdiriləcəkdir. Yəni ki, bizim planlarımızda heç bir dəyişiklik olmayacaqdır. Bu yaxınlarda növbəti beş ili əhatə edən müfəssəl iqtisadi inkişaf proqramı təsdiq olunacaqdır. Əminəm ki, bu proqramın icrası nəticəsində beş ildən sonra Azərbaycan daha da qüdrətli, daha da imkanlı olacaq və bizim təsir dairəmiz daha da genişlənəcəkdir.

Bu günlərdə Azərbaycanın demokratik inkişafına böyük təkan verən və demokratiyanı inkişaf etdirən çox önəmli hadisə baş vermişdir. Azərbaycan xalqı referendumda Konstitusiyaya əlavələr və dəyişikliklərə öz münasibətini bildirmişdir. Bu təklifləri dəstəkləməsinə görə bütün Azərbaycan xalqına öz dərin minnətdarlığımı bildirmək istəyirəm.

Bu gün bizimlə bərabər bu bayram şənliklərində YUNESKO-nun baş direktoru Kouşiro Matsuura iştirak edir. Mən onu səmimiyyətlə salamlayıram. Qeyd etmək istəyirəm ki, cənab Matsuura Azərbaycanın dostudur, ölkəmizdə dəfələrlə olmuşdur və Azərbaycanda, Bakıda bir neçə mədəniyyət ocağının təməlinin qoyulması mərasimlərində iştirak etmişdir. Bu gün biz yenə də təzə muzeyin açılışında birlikdə olacağıq. YUNESKO ilə Azərbaycan arasında əlaqələr çox yaxşıdır, çox işgüzardır. Bu əlaqələr, ilk növbədə, bizə imkan verir ki, öz mədəniyyətimizi, öz zəngin tarixi irsimizi dünyaya çatdıraq, özümüzü tanıtdıraq. Eyni zamanda, icra olunan birgə layihələr, birgə proqramlar Azərbaycanda mədəni irsin qorunması, elmin, təhsilin inkişafı, təkmilləşməsi sahəsində əlavə işlərin görülməsi üçün də çox vacibdir.

Mən bu gözəl bayram günündə bir daha bütün Azərbaycan xalqını ürəkdən təbrik etmək istəyirəm, bütün Azərbaycan xalqına xoşbəxtlik və cansağlığı arzulayıram.

Bayramınızı mübarək olsun!

X X X

Sonra Prezident İlham Əliyev İçərişəhərdə keçirilən Novruz şənliklərində də iştirak etdi. Şənliyə toplaşanlar dövlətimizin başçısını hərarətlə salamladılar. İncəsənət ustaları, bədii özfəaliyyət kollektivləri xalqımızın adət-ənənələrini, qədim el sənətlərini nümayiş etdirdilər, “Kosa və Keçəl” tamaşasını göstərdilər, rəngarəng konsert proqramı ilə çıxış etdilər. Bir tərəfdə isə gənc pəhləvanlar xalça üzərində qurşaq tutur, idmançılar məharətlərini göstərirdilər. Şənlik iştirakçıları qədim xalq mahnılarını, aşıq havalarını və muğam dəstgahlarını ifa edir, milli musiqinin sədaları altında rəqs edirdilər.

Prezident İlham Əliyev və şənliyin digər iştirakçıları aşıqların və meyxanaçıların çıxışına, habelə Dövlət Pantomim Teatrı aktyorlarının ifasında “Muğam-trio” səhnəciyinə, qədim el sənətlərinin nümayişinə baxdılar, kəndirbazın çıxışına maraqla tamaşa etdilər, bişirilən yeməklərdən, habelə Novruz şirniyyatından daddılar.

Novruz şənliklərinin əsas personajları olan Kosa və Keçəl Prezident İlham Əliyevlə və YUNESKO-nun baş direktoru Kouşiro Matsuura ilə yumurta döyüşdürdülər.

Dövlətimizin başçısı şənliyə toplaşanlarla səmimiyyətlə görüşərək, hal-əhval tutdu, onları bayram münasibətilə təbrik etdi.

Dünya memarlığının gözəl nümunələrindən olan qədim Qız qalası ətrafında folklor və rəqs qruplarının çıxışı da maraqla qarşılandı. Burada Azərbaycanın qədim el sənətləri nümunələrindən ibarət sərgi də açılmışdı.

Prezident İlham Əliyev, xanımı Mehriban Əliyeva və YUNESKO-nun baş direktoru Kouşiro Matsuura sərgiyə çıxarılmış və Azərbaycan xalqının milli varlığını, ulu baba və nənələrimizin mənəvi aləminin zənginliyini, sənətkarlığın ən incə çalarlarını nümayiş etdirən xalı-xalçalara, kilimlərə, geyim dəstlərinə, müxtəlif sənətkarlıq nümunələrinə baxdılar.

Dövlətimizin başçısına, Mehriban xanıma, Leylaya və YUNESKO-nun baş direktoru Kouşiro Matsuuraya milli hədiyyələr təqdim olundu.

Novruz bayramı münasibətilə keçirilən şənliklərdə Milli Məclisin sədri Oqtay Əsədov, Prezidentin Administrasiyasının rəhbəri Ramiz Mehdiyev və digər rəsmi şəxslər iştirak edirdilər.

Bayram şənliyi incəsənət ustalarının ifasında rəngarəng konsert proqramı ilə davam etdi.